¹ Loshi la Patekote, waki vo tshee lo fashi keko kame. ² Kanoo wakeni ma l'olongo looka oko lone la lopepe la kudu, ko lakalole lo loodu lekiwo kita. ³ Eteketa, wefona la eteketa wa dja, wakatombe, kakitola amotshi l'akina, ko wakakitaka ladiko da vo tshee. ⁴ Ko vo tshee wakalodama la nyuma k'ololo, ndo wakateketaka eteketa ekina, oko nyuma akanalangiya da teketa. ⁵ Koko, akiko loshi lomotshi le Yerusalema ase Yuda, ato wa koolo, wa lo wodja tshee wele lese ke kete. ⁶ Lo looka leki lo kiko fashi, leemba l'ato lakalawo, ko wakoto ko ohokohoko lote vo wakawokaka wa teketa l'oteketa ande. ⁷ Vo tshee weki la yambelo ndo l'ohokohoko, ko wakayate amotshi l'akina: enda, ane ato tshee wateketa vo kema ase Galileya? ⁸ Ndo woho wakona wotowoka l'oteketa waso shotshee lasaso, l'oteketa waso w'ashidi? ⁹ Parthesi, Medesi, Elamitesi, wane wakita Mezopotamiya, le Yuda, le Kappadose, le Potiya, l'Aziya, ¹⁰ Le Firigiya, le Pafiliya, l'Egibito, wodja wa Libiya suke la Kirene, ndo wane wakaye ma le Roma, Yuda la ekonyanya, ¹¹ Ase Keritoya ndo Arabe, okonde w'okaso teketa l'eteketa waso akambo wadimena wa Zambi? ¹² Vo tshee waki la daambo, ndo, wakeyaka paka mbaza, wakayateeka amotshi l'akina: na keta kene? ¹³ Koko akina wakolaka, ndo wakataka: wambolola la wana wa dimena. ¹⁴ Laso Petero, akayatondja la dikumi l'otoyi d'asonami, akeda doyi, ko akateketa lo nyeyoho: ase Yuda, ndo nyu tshee wakita le Yerusalema, nyeye okone, ndo nyononge lo eteketa wami! ¹⁵ Aneeto vo kema ndewo, oko woho wafonyanyu, ne da saa ke sato ke lo loshi. ¹⁶ Koko lane akakate Ombutshi Yoeli: ¹⁷ Lo shii ya mwisho, keta Zambi, lakoloda nyuma kemi lo demba tshee; ananyu w'apami la w'adimato wako tabiri, elongolongo wenyu wakoyala la wenyelo, ndo esombe wenyu wakena alo. ¹⁸ Mete, le ekambi wami w'apami la w'adimato, lo shii yako, lakoloda nyuma kemi; ndo wakotabiri. ¹⁹ Lako tondja ahindo ma le diko d'olongo ndo ahindo lese ke l'edinga ²⁰ Wonya wakakadimo didjima, ndo wedi kadimo dikila, tondo ke loshi k'Owandji koma, loshi lako la woke ndo la lotombo. ²¹ Laso one tshee lele lokombo l'Owandji akoka. ²² Ato wase Izariele, nyolonge eso eteketa! Yeso y'ose Nazareta, oto one lele Zambi akatondja oshuuda letondo kenyu lo ahindo, aloho ndo tolembetelo takatshema lende lateyi wanyu, oko weyanyu nywame; ²³ One oto, pakema oko didjango d'olembe ndo lo eyelo ke Zambi, nyu nyakohane lo kurusen nyu nyakodake ma lo lonya lase koolo. ²⁴ Zambi akowolola, la mbotshungola l'ekodi wa nyoyi, lote wa monga la dihombo nde mbokime. ²⁵ Ne da Davidi akate lote wande: lakenaka la kyokomiya Owandji le tondo kemi, lote nde laleko lo lonya lami la lomi, kele aha lemi ndotshu mbama. ²⁶ Lokina otema wami waleko l'olo, ndo lolemi lami l'ongenongeno; ndo kanga demba dami dakokita l'ekongelo, ²⁷ Ne da wee homo lo anima wami lo loshi l'edo, ndo we hokimwe ekila keye mena osedisedi. ²⁸ Okambeyanyu to woka ta loseno, oko ndoda l'olo le tondo keye. ²⁹ Ato ana lengo, nyodimanyiya da nyote hwehwe, lo dikambo da omboledi Davidi, nde akavu, akembama, ndo dombo dande daleko ndo lelo lasaso. ³⁰ Oko wakinde Ombutshi, ndo wakaneyaka one Zambi akolake la ndapa da mbokitsha omotshi la lolonga la edee kende, ³¹ Keso ele mbolo ke Kristo kekanakonge ndo mbuta, ata howotshika lo loshi l'edo ndo demba dande hena otshimba. ³² Oso ele Yeso one lakolola Zambi; shotshee taleko atemo. ³³ Akedama lo lonya la lomi la Zambi, akalongola ma le mbapa nyuma k'ololo kekanalake, ndo wokanyu. ³⁴ Ne da Davidi kombude poo l'olongo, koko akate ndendame: Owandji akate Owandji wami kita lo lonya lami la lomi, ³⁵ Polo edja komotshee atoni waye lese kekolo waye. ³⁶ Loodu tshee la l'Izariele leye okone la loshikike da Zambi akatsha Owandji ndo Kristo one Yeso lakanyadje lo kuruse. ³⁷ Kisha mbuka oso wotelo, etema wewo wekakomo, ko wakate Petero ndo le Atomami: ato analengo, ototshee? ³⁸ Petero akawate: nyotubu, ndo oto tshee lateyi wanyu abatizami lo lokombo la Yeso Kristo, lo edimanyelo ke pekato yanyu; ndo nyakolongola woshasha wa nyuma k'ololo. ³⁹ Ne da dakadaleko lenyu, le ana wanyu, ndo le wane wele etale, lokina leemba l'efula kele Owandji waso Zambi akawele. ⁴⁰ Ndo, ma lo efula k'eteketa ekina, akalaka ndo akasengasenga, ata: nyoya tsha nyweme lo lolonga lakashisho. ⁴¹ Wane wakalange oteketa wande wakabatizama; ndo, lo loshi lako, leemba l'Ambeki lakongezama suke l'ato midiyo shato y'anima. ⁴² Wakashikimala lo mafundisho w'Atomami, lo lolango l'analengo, lo pakana ekate, ndo lo maombi. ⁴³ Woma wakoto le oto tshee, ndo wakatshee ahindo l'aloho efula ma le Atomami. ⁴⁴ Wane tshee wakokaka woma weki lo fashi keko, ndo weki vo tshee kame. ⁴⁵ Wakasondjaka dango dawo ndo ekondji wewo, ndo waka dikahanyu woho lasawo, ndjelana la ahombo w'oto l'oto. ⁴⁶ Weki loshi tshee votshee kame la bidi lo tepelo, wakataka okate lo mvudun ndo wakosaka dango dawo dande l'olo ndo la lokitshakitsha l'otema, ⁴⁷ Watombola Zambi, ndo watana ketshi le ngelotshee. ko Owandji akakotshee loshi tshee lo kanisa wane weki mbika.