¹ Teofile, lakateketa, lo kitabo kemi ke tondo, kene tshee ketate Yeso tshee ndo fundisha tate l'etatelo ² Polo ndo lo loshi lakandembama l'olongo, kisha nde mbisha elembe wende ma le nyuma k'ololo, le Atomami wakanasone. ³ Kisha nde soama, akatombe la loseno, ndo akawasha tolembetelo efula, akenama lewo shii nyeni, ndo ateketa akambo wendana la Dolelo da Zambi. ⁴ Oko weki nde lawo, akawadjange da aha vo ndjala etale la Yerusalema, koko da kanga kene kekalake mbapa, kene kekamanyote, kekandawate; ⁵ Ne da Joani akabatiza l'ashi, koko nyu, lo shii ya tshiki, nyakobatizama la nyuma k'ololo. ⁶ Laso Atomami wakatshumani wakawombola: Owandji, lo etena keko koyokaloya Dolelo d'Izariele? ⁷ AKakadimola: aha lenyu da mbeya tena kana wenya kekashikike mbapa lo lowandji lande ndame. ⁸ Koko nyakolongola kudu, nyuma k'ololo kekokita ladiko danyu, ndo nyakoyala ameni le Yerusalema, ndo Yuda tshee, le Samariya, ndo polo ndo lo mipaka wa kete. ⁹ Kisha mbuta keso, akadee ko akendaka, ko dunge dakoshisha lo washo wawo. ¹⁰ Ndo oko wekiwo la wendelo tsha l'olongo lo saa kekanatadeka, enda, ato ahende woloti ahondo wa wema wakatombe, ¹¹ Ko vo mbuta: ase Galileya, lote wana wemalanyu la menda l'olongo? one Yeso, lakade l'olongo ma lateyi wanyu, akoya yoho yako yame yakanyaweni atatshu l'olongo. ¹² Laso wakakaloya le Yerusalema ma lo kidima kelewo Oliva, kele suke la Yerusalema, etale la mboka ke Sabato. ¹³ Lo saa kekawakomi, wakade lo tshumba ke lediko lene akawtanemoka leko; waki Petero, Joani, Yakobo, Andele, Fidipe, Thomas, Bartelemi, Matayo,Yakobo ona Alufo, Simona lakaweleka Zelote, ndo Yuda, ona Yakobo. ¹⁴ Vo tshee kame wakakikeka lo mawombi, l'adimato, ndo Madiya, nyango Yeso, ndo l'anango wa Yeso. ¹⁵ Lo shoshi, Petero akemala lateyi w'analengo, lofulo l'ato wakwahomana eki suke la lokama l'akumi ahende. ko akate: ¹⁶ Ato analengo, ahombama kotshama kene kele nyuma k'ololo, lo mukanda, akatama tondo, ma l'onyo wa Davidi, lo dikambo da Yuda, one leki olombodi wa wane wakande Yeso. ¹⁷ Akademaka lateyi waso, ndo leki l'akoka lo lolombo lako lame. ¹⁸ One oto, kisha nde nongola mushara wa ndjaka, akoka, akayakakitola lateyi wa demba, ndo esohi tshee wende wekakakitona. ¹⁹ So dikambo dakeyama lo Yerusalema tshee da okonda akelame l'oteketa wawo hakeledama, mbuta ate okomba wa dikila. ²⁰ Koko, akandikama lo kitabo k'esambo: ekitelo kende keyale shenga, ndo oto akokitake! ko: okina embe wotsho wande! ²¹ Paka okone, lateyi wa wane wakatotshinde saa tshee kekatase naka la Owandji Yeso, ²² Tate lo obatieo wa Joani polo loshi lakandembama lateyi waso, aleko omotshi lo wosukanya oko temo lo elwelo kende. ²³ Wakatondja ahende: Yozefu lakaweleka Barsabani, lakawade Yusutusa, ndo Matiyasi. ²⁴ Ko wakalombe ne dombelo: Owandji, we keya tema waso tshee, sonola one lo vwahende lakasonola, ²⁵ Kele apate lolombo lone ndo lo kene esambishelo, kene kele Yuda akatshike ko tsho lo fashi kende. ²⁶ Wakoke longanda, ko bahati wakako le Matiyasi, lakawakotsha l'oloyi w'Atomami dikuùi l'otoyi.