¹ Opalanga Kohani akate: akambo waleko okone? ² Etsheni akakadimula: ato analengo ndo wambapa, nyolonge! Zambi ke lotombo akene le sheso Abrahama, lo saa kekinde le Masedoniya, tondo ke ndjayenya le Sharana; ³ Ndo akawote: tomba lo wodja waye ndo kumbo keye, ndo tshoka lo wodja komokenya. ⁴ Akatombe lo wodja w'ase Shalada, ndo tokita le Sharana. leko, kisha nyoyi ke shende, Zambi akotondja lo wodja wakitaye kakiye; ⁵ Nde kombosha kanga yango otoyi yande lo ngelo keko, kana yango ya lokolo, koko akalake da mbisha kele kende, ndo lolonga lande kisha nde, kanga wakinde k'ona. ⁶ Zamb akateketa okone: lolonga lande lakotshikala lo wodja wokina; wakowondja polo leese ndo wakohenyahenya shi kama nyeyi. ⁷ Koko wodja wone wakawasoyama, lemi kowolombosha, keta Zambi. kisha laso, wakatomba, ndo wakotumike lo kene fashi. ⁸ Ko ZAmbi akasha Abrahama daka da kumbini; ndo okone, Abrahama, akote Isaka, akawodje kumbini loshi l'enaneyi; Isaka akote ndo akadje Yakobo kumbini, ndo Yakobo epalanga dikumi l'ahende. ⁹ Epalanga, kele ke Yozefu, wakosondja da mbotola l'Edjibito. koko Zambi atshi lande, ¹⁰ Ndo wakotowe la esukusuku tshee; akawosha yimba ndo akawosha ketshi letondo ke Farawo, kumekanga k'Edjibito, lakawodje Guvelenele wa l'Edjibito ndo loodu lande tshee. ¹¹ Akayala ngala lo wodja wotondo w'Edjibito, ndo wone wa Kanana. okeyi waki woke, ndo ambotshi waso kotana kene kende. ¹² Yakobo akoke da maa deki l'Edjibito, ko akatomi ambotshi waso maka ketondo. ¹³ Ndo mala kehende, Yozefu akeyama le analengo wande, ko Farawo akeya na kumbo kende. ¹⁴ Ko Yozefu akato da tona shende Yakobo, ndo kumbo kende tshee, weki ato akumi esambele l'atanu. ¹⁵ Yakobo akaholo l'Edjibito, lene akandavu, polo ndo washeso; ¹⁶ Ndo wakawembe otsha le Sishema, ndo mbokitsha lo dombo dakasombe Abrahama, lo beyi d'akuta, d'ana wa Hemora, mbapa kende la Sishema. ¹⁷ Etena kekasukana kele daka dakalake Zambi le Abrahama dakahombe kotshama, ndo wodja wakoto ndo weki efula lo Edjibito, ¹⁸ Polo edja kekatombe kumekanga kikina, laki kombeyaka Yozefu. ¹⁹ Kumekanga keko, akoke kele lote wa dangi daso, akasoya washeso, la lokani la mbayenya le ana wawo, daha vo sena. ²⁰ Lo shoshii, kekoto Mose, leki dimena lo washo waZambi. akaleshama wedi esato lo loodu la shende; ²¹ Ndo, kakawawenya, osekaseka wa Farawo akolongola, ndo mboda oko onande. ²² Mose akalakema la yimba tshee y'ase Edjibito, ndo eki kudu l'oteketa ndo l'akambo. ²³ Aki la miaka akumi aneyi, lo saa kekandaye l'otema da menda anango, ana w'ase Izariyele. ²⁴ Akeni otoyi lakawasoyaka, ndo, akotekete, akatomboke kanga lakawasoyaka, ndo komola ose Edjibito. ²⁵ Akawaze da anango koka mboka one Zambi koka tshungola lo lonya lande; koko vo komboka. ²⁶ Loshi lokina, akene lateyi wawo oko wakalokaka, ndo akalombe lote wa kii: ato, kekandate, nyaleko analengo; lote wane asoyananyu omotshi l'okina? ²⁷ Koko kanga soya wonyande lo mbotshanya, la mbuta: akakokitsha owandji ndo shushi ladiko daso? ²⁸ We nangaka dakami, oko wakadake loyi ose Edjibito? ²⁹ Lo oso oteketa, Mose akalawo, ndo akatshu totshikala lo wodja wa Madiyana, lene akandote ana ahende. ³⁰ Kisha miaka akumi aneyi, ondjelo akotombe, lo shenga ya lo kidima ke Sinayi, l'osase wa kuka ke dja. ³¹ Mose, akeni okoko, akambe lote wa kiko menamo; ndo, oko wakandatasukanaka da mbombola, doyi d'Owandji akoke: ³² Lemi kele Zambi ke washeye, Zambi k'Abrahama, k'Isaka ndo Yakobo. ndo Mose, yango tshee yakadidima, ko pima menda. ³³ Owandji akawote: nya elato waye wa l'ekolo, ne da fashi kele kemadiye keleko kete y'ekila. ³⁴ Lakeni sowi da wodja wami wone wele l'Edjibito, lakoke ekoko wawo, ndo lakaholo da ndjatshungola. kakiye, tshoka, lambokotoma l'Edjibito. ³⁵ One Mose, lakawangula, wata: akakokitsha owandji la shushi? one lele Zambi akatomi oko owandji ndo oko otshungodi la musaada w'ondjelo wakotombe l'oswee. ³⁶ Oso kakatondja l'Edjibito, atonga aloho ndo ahindo lo wodja w'Edjibito, lateyi wa ndjale ke Bela, ndo lo shenga miaka akumi aneyi. ³⁷ One Mose kata le ana w'Izariyele: Zambi akonyotondjiya lasa analengo wanyu Ombutshi oko lemi. ³⁸ Ele one lele, lo wonya wa losanganya lo shenga, laki la ondjelo lakawoteka lo kidima ke Sinayi ndo la washeso, akalongola mana ya sena, da ndjotosha. ³⁹ Washeso vo konangaka mbolenya, wakawotshanya, ndo wakewoya etema wewo l'Edjibito, ⁴⁰ Ata le Arona: otosha tozambizambi takendakenda letondo keso; ne da one Mose lakatotondja lo wodja w'Edjibito, sho hateye kene keyande. ⁴¹ Ndo, lo sho shii, wakatshee fete, wakasha olambo edimu, ndo ngenangena lo lotomu l'anya wewo. ⁴² Okone Zambi akakadimo, ndo akatshungola lo mukusano w'otonga wa l'olongo, oko wakandandikama lo kitabu k'Ambutshi: nyakambisha dango ndo weshasha lo miaka akumi aneyi lo shenga, loodu l'Izariyele?... ⁴³ Nyakalote dihoso da Moloka ndo yooto ya zyambizambi Ramfa, sandamu yande yakanyatshee da mbatemola! lokina lakoyembe polo ndekana Babilona. ⁴⁴ Washeso watshi lo shenga ya tabelenakele oshuuda, oko akasha one lakate Mose da mbotshee lo yoho nye yakandeni. ⁴⁵ Ko washeso, lakawalongola, wakawotshiya, leese ke lolombo la Jashua, lo wodja waki wedja wakatshanya Zambi letondo kewo, ndo akatshikala polo ndo lo shii ya Davidi. ⁴⁶ Davidi akatani ketshi le Zambi, ndo akalombe da mbuduya loodu la Zambi ke Yakobo; ⁴⁷ Ndo eki Salomona kekawoke loodu. ⁴⁸ Koko kanga lele lediko hakite lo lone lakatshema la lonya l'oto, oko wata Ombutshi: ⁴⁹ Olongo ele edee kemi, ndo kete ele ekolo wemi. na loodu lonyombike, keta Owandji, kana na fashi komomuya? ⁵⁰ Aha lonya lami kekatshee ne dango tshee?... ⁵¹ Ato wokeleka lo wodi, eteama ndo atoyi kudu! nyu nyundjatshikitolaka la nyuma k'ololo. kele keki washenyu, kelenyu ndonyu. ⁵² Na Ombutshi lasawo washenyu kondjaka? wakadake wane wakateketaka tondo oyelo wa meye, konyotowa kakiye, ndo kekinyo andjakatani, ⁵³ Nyu wane wakalongola olembe oko amuri w'andjelo, ndo nyu konama olembe wako!... ⁵⁴ Kakawoke eso eteketa, wakomala l'etema wewo, ndo wakaketemola wanyu lende. ⁵⁵ Koko Etsheni, ndodama la nyuma k'ololo, ko akeda washo l'ololo, akeni lotombo la Zambi ndo Yeso memala lo lomi la Zambi. ⁵⁶ Ko akate: enda, lambena ololongo hwee, ndo ona oto memala lo lomi la Zambi. ⁵⁷ Wakade okone ekoko wa kudu, wasotshasotha atoyi, ndo wakayasukanya vo tshee lende, ⁵⁸ Wakawemade l'andja wa ngelo, ko wakokomola. atemo wakakitsha ahondo wawo l'ekolo w'olongolongo lokombo lande Sawolo. ⁵⁹ Ko wakakomola Etsheni, lakalombaka ndo mbuta: Owandji Yeso, longola nyuma kemi! ⁶⁰ Ko, akake adwe, akawana la doyi da kudu: Owandji, hawadiyake kene pekato! ndo, kisha eso eteketa, akashama.