¹ Paulo, washo tee le Sanehedeina, akate: ato analengo, lotema wa dimena keyalombolami polo lelo letondo ke Zambi... ² Opalanga Kohani Ananiasa akate wane watshi suke lande da mbokomola lonyo. ³ Laso Paulo akawote: Zambi ako kokomola, ohafu wa wema! wee oleko kita da nomboshami oko wele olembe, ndo ombova olembe la mbuta da komolami! ⁴ Wane watshi suke wakawote: wee lotola opalanga Kohani le Zambi! ⁵ Ndo Paulo akate: haleye analengo, kene ketshi opalanga Kohani; ne da akandikama: wee hakoke teketa koolo ke owandji wa wodja waye. ⁶ Paulo, akeye da yetshi yoloyi atshi tshanga lakanga wa kashi ndo yetshi kyina ase Farisayo, akawana lo Sanehedrina: ato analengo, ndeko ose Farisayo, ona ase Farisayo; loote wa lokani ndo elwelo ke nyoyi kemomoto lo kilombo. ⁷ Saa kekandate osoku, taamu takayala lasa ase Farisayo ndo akanga wa kashi, ndo oloyi waka hembona. ⁸ Ase kashi wakataka da elxelo hakoyala poo, ndo kanga ondjelo kana nyuma kema, koko ase Farisayo waketawoka akambo wako ahende. ⁹ Lofunge la woke lakayala, ndo Endele nombe amotshi lo leeke lase Farisayo, wakemala, wakadje taamu, ndo wata: sho hateni ko koolo le one oto; kana nyuma kana ondjelo akotekete. ¹⁰ Oko wele wotonganelo kondjala, tuminadi akoke woma da Paulo hayoto lakambo la ane ato, akatomi asoda da ndjowonya lateyi wawo ndo mbotola lo muyololo. ¹¹ Otsho okina, Owandji akenamo le Paulo, ndo mbuta: yala la lohetete; ne da yoho yako yakayasha oshuuda wami lo Yerusalema, paka wee lokna mbisha oshuuda le Roma. ¹² Saa kekahoto wonya, ase Yuda wakoto sheke, ndo wotonganelo kondjala lewo vwame, wata wayashimbe dahande ndo noo polo lowodaka Paulo. ¹³ Wane wakoto sheke watshi ndeka akumi aneyi, ¹⁴ Ndo wakatshu totana epalanga wa Wakohani ndo wazee, wane wakawate: shoshwame takoshi, taamu le sho shwame, da ahande polo lotodaka Paulo. ¹⁵ Nyu okone, kakiye, nyoyate la Sanehedrina lo tuminadi, da nde mbotola letondo kenyu, oko nangaka mombola munga kende hwehwe; ndo sho, tondo kende sukana, taleko tayadi da mbodaka. ¹⁶ Ona kadiyo la Paulo, akeyaka loodu lako, akatshu lo muyololo tewoya Paulo. ¹⁷ Paulo akele omotshi lenami, ndo mbote: tola olongolongo one otshale tuminadi, ne da aleko la dikambo dimotshi dambote. ¹⁸ Olami akoshi olongolongo, akatshu lande le tuminadi, ndo mbuta: ose muyololo Paulo akambele, ndo akanombi da kela one olongolongo, lele la dikambo dimotshi dakote. ¹⁹ Tuminadi, akoshi olongolongo lo lonya, ndo akatshu lande lomamu, akawombola: naa dikambo deleye laa dambutemi? ²⁰ Akokadimula: ase Yuda wakokani da ndjokolomba da mbela Paulo loyi letondo ke Sanehedrina, oko weyaye dande hwehwe. ²¹ Talongake, ne da ndeka akumi aneyi lasawo wakokomola, ndo wakate, mbidjana ebishi vwame, ahande koyango kana noo polo edja lowodaka; kakiye waleko tayadi, ndo weloko lo konga lokani laye. ²² Tuminadi akakaloya olongolongo, kisha mbote da aha nde teketa le oto lo kene kemondowote. ²³ Le mwisho akele elami ehende, ko mbuta: nyoyale tayadi, tate eshidi esato wotsho, asoda kama hyende, epalanga akumi esambele ndo akonga kama hyende, da tsho polo le Sezara. ²⁴ Paka ndjala ato walama Paulo, kele totole ekila ndo koyango le guvelenele Felix. ²⁵ Akandika barua okone wa dimena: ²⁶ Klode Lysiyasa le guvelenele la dimena efula Felix, moyo! ²⁷ One oto, lele ase Yuda wokiti, akahombe ndjakema lawo, saa kekamakomi lasoda ndo lakakumuyawo, wata da atshi ose Roma. ²⁸ Lo nanga mbeya okoko wakona wakawoshite, lakotole letondo ke Sanehedrina kewo. ²⁹ Lakeni da akashitama lo dikambo da wembola wendana la olembe wawo, koko nde kotshe kodikambo dakokandevo kana muyololo. ³⁰ Lamboka da ase Yuda wamba tolonga, lambokotome ndowe, la mbewonya le wane woshita da wayaewoya vo vame leye. lo nyoyi. ³¹ Asoda, ndjelana la didjango dakawapate, wakoshi Paulo, ndo wakotole lotsho polo le Atipatrisa. ³² Lapendju, akatshike epalanga mboto lo mboka lande, wakakaloya lo muyololo. ³³ Wakakomi le Sezara, epalanga wakasha barua le guvelenele, ndo mbosha Paulo. ³⁴ Guvelenele, kisha soma barua, akambola naa djimbo yatshi Paulo. akoke datshi ose Silisiya: ³⁵ Lakokolombosha, kekandate, saa koya wane wakoshita. ndo akate da mbolama lo loodu la Herode.