¹ Kisha shii tshanu, kekakomi opalanga Kohani Ananiya, la wazee ndo oteketi lokombo lande Tertula. wakashite Paulo le guvelenele. ² Paulo akelame, ndo Tertula akatate nombola, nyee yoho: ³ Opalanga wa kinemo Felix, wee lotosha kii kefula, ndo wodja wone wakalongola waho wa dimena oma lo tokonge taye; keso keyaso lo tshee ndo fashi tshee la losaka la mete. ⁴ Koko, da aha kokime efula, lambokolomba da nonga, lo kyomba yaye, kene kelangaso mbuta lo tshena pee. ⁵ Takatani one oto, lele lokeso, lakombola datanelo lateyi wase Yuda wa lo duniya, lele owandji wa tshunda yase Nazareta, ⁶ Ndo lele akapime nanya tepelo. ndo takoshimbi. takalangi mbosambisha oko wele olembe waso; ⁷ Koko tuminadi Lysiyasi akakomi, akawoshi lanya waso la kudu tshee, ⁸ Ate wakoshite da ndja letondo keye. wee kokaka weme, lo mombola, mbeya lende kene tshee koshitaso. ⁹ Ase Yuda wakangenangena, wakate da aso akambo watshi osoku. ¹⁰ Kisha guvelenele mbenya lo tshapa da teketa, Paulo akakadimula: la mbeya one, aya miaka efula, oleko shushi ya wone wodja, la lokani lako kemomosa oteketa da nombola loote wami. ¹¹ Atayala shii dikumi lahende, wee koka mboho, da lakade otsha le Yerusalema da totemola. ¹² Vo kotanami kanga lo tepelo, kanga lo Sinagogi, kanga lo ngelo, lamanee loto omotshi, kana mbele ohomanelo kadimula oloyi wato. ¹³ Ndo haweye menya kene keshitawo kakiye. ¹⁴ Lambokoshikike da ndeko lo kambe Zambi ke washemi lo mboka keteketawo ke koolo, la mbetawo kene tshee kekandikama lolembe ndo le Ambutshi, ¹⁵ Ndo ndjala la Zambi lo kitumayini, oko welewo la lewo vame, akoyala elwelo ke ase losembwe ndo wane wele kema losembwe. ¹⁶ Dako dele lamboyasha da ndjala la kyokomiya lotema waha munga letindi ke Zambi ndo letondo ke ato. ¹⁷ Kisha kosa ekomelo wa miaka efula, lakaye da ndjo kimo weshasha lo wodja wami, ndo ndjokimo weshasha. ¹⁸ Laso kele ase Yuda amotshi wa le Aziya wakatani mbedama lo tepelo, aha la lofunge kana looka. ¹⁹ Atshi lewo da manamo letondo keye ndo vo ndjashita, kana watshi la dikambo dimotshi lemi. ²⁰ Kana, wane wate naa ondjakatani wakawatani ladakana, saa kekamalombola letondo ke Sanehedrina, ²¹ Paka kanaaha mala otoyi lo mbawana kekamotsha lateyi wawo: loote wa elwelo ke wane wakavu kemomolombola lelo letondo kenyu. ²² Felix, lakeyaka yema dimena kene kekendanaka la one mafundisho, akakitsha, ata: saa koya tuminadi Lysiyasi, lakohembola dikambo danyu. ²³ Ndo akate olombodi da nama Paulo, lambotshike yema ya ohuru, ndo aha shimba ato wande ndjowenda. ²⁴ Kisha shii miotshi mbeta, Felix akaye la Drusila, wadende, latshi ose Yuda, ndo akale Paulo. akawombola lo mbetawo le Kristo. ²⁵ Koko, oko Paulo akadjaka tamu lo losembwe, lo takitaki, ndo lo kilombo keyaye, Felix, akoke woma, akate: keso saa kaloya; saa komotana daaso, lakokele. ²⁶ Akafonyaka kako da Paulo akowosha akuta; lokina akotoma da mona yema esadi esadi, da sawola lande. ²⁷ Kisha miaka ehende mbeta okone, ndo Felix akapate ohena Porkiusa Festusa. la lolango la ngenyangenya ase Yuda, Felix akatshike Paulo lo muyololo.