¹ Ato analengo ndo mbapa, nyolonge kene kelemi laa kakiye da nyote loote wa ndjasele! ² Saa kakawoke da akawateketeka loteketa wa kihebero, wakonohala kii. ndo Paulo akate: ³ Ndeko ose Yuda, lakoto le Tarsa lo ngelo ke Silisiya; koko lakole lo kene ngelo, ndo soma lekolo wa Gamaliyela lo wweyelo wa kokele wolembe wa washeso, ndodama la ngandji le Zambi, oko welenyu nyutshee lelo. ⁴ Lakokiya polo nyoyi one mafundisho, kelekama ndo mbidjana lo muyololo apami ndo adimato. ⁵ Opalanga Kohani ndo wanyami wedjejda waleko atemo wami. lakalongola lewo barua le analengo wa le Damaseke, lene akamatshu kele ndjokele le Yerusalema wane watshi lanoo ndo da mbakaripiya. ⁶ Oko watshimi lo mboka, ndo akamasukana la Damaseke, kako, otsha lo midi, osase wa woke wakaye oma lolongo wakangaziya lateyi wami. ⁷ Lakako lo kete, ndo lakoke doyi dakambuteka: Sawulo, Sawulo, loote wana wasoyaye? ⁸ Lakakadimula: eleye, Owandji? ndo akambute: lemi kele Yeso yose Nazareta, lasoyaye. ⁹ Wane watshi lami wakenaka dimena osase, koko vo komboka doyi dane wakateketaka. ¹⁰ Laso lakate: ahombami tshe, Owandji? ndo Owandj akambute: emala, tshoka otsha le Damaseke, ndo leko wakotokote kene kehombaye tshe. ¹¹ Oko watshimi komena koyango, loote wa mwangaza wosasz, wane watshi lami wakakime lo lonya, ndo lakakomi le Damaseke. ¹² Koko, oto omotshi lokombo lande Ananiyasi, oto la losembwe oko olembe, ndo lende ase Yuda tshee wokiti le Damaseke wakashaka oshuuda wa dimena, ¹³ Akaye ndjoyaenyanya lemi, ndo akambute: Sawulo, onangemi, sena lokina. kako, lakasene lokina ndo lakawendaka. ¹⁴ Akate: Zambi ke washeso akapange da wee mbeya lolango lande, la mena losembwe, ndo la mboka eteketa wa lonyo wande; ¹⁵ Ne da okokimanyiya oko temo, letondo ke ato, akambo wakayeni ndo mboka. ¹⁶ Ndo kakiye akongaye? emala, batizama, ndo sola pekato yaye, la mbele lokombo lOwandji. ¹⁷ Lo kaloya yande le Yerusalema, oko wakamalombaka lo tepelo, lakandama la nyuma, ¹⁸ Ndo lakeni Owandji lakambuteka: sada, ndo tomba esadi esadi lo Yerusalema, loote hawolongola oshuuda waye lemi. ¹⁹ Ndo lakate: Owandji, vo mbeyaka vame da lakadjaka lo muyololo ndo komola adanga lo Sinagogi wane waketawoka leye, ²⁰ Ndo kele, saa kekawatshola dikila da Etsheni, temo daye, lemi leme latshi lanoo, kotsha koolo kami le akina, ndo nama ahondo wa wane wakadakaka. ²¹ Laso akambute: tshoka, lakokotome letale otsha le wedja.... ²² Wakolongaka polo loteketa wako. koko laso wakeda doyi, wata: nyaa oma lo kete nyee yoho yoto! kema dihombo sena. ²³ Ndo wakade ekoko, wasokola ahondo wawo, wafumboloa otoko lo lopepe. ²⁴ Tuminadi akadjange da mbidja Paulo lo muyololo, ndo mbosha dimbola oma lohafu, kele da mbeya nandena wawanawo okone lende. ²⁵ Saa kekawokitsha lo lohafu, Paulo akate olombodi latshi lanoo: nyaleko ladikoka da komola ehafu le okitshi wa lo Roma, lele kema la dilanya? ²⁶ Lo eso eteketa, olombodi akatshu le tuminadi da mboshimba, ata: onaye letshe? one oto aleko ose Roma. ²⁷ Ko tuminadi, akaye, akate Paulo: ombute, oleko ose Roma? mete, kekandokadimula. ²⁸ Tuminadi akakaloya: la akuta efula kekamalongola haki kokitshi. ndo lemi, kekate Paulo, ndeko laa oma lo mboto yami. ²⁹ Kako wane wakahombe mbosha dimbola wakakaloya, ndo tuminadi, akeni da Paulo atshi ose Roma, atshi la woma loote wa akokeleka. ³⁰ La wediapendju, nanga mbeya la lpshikike loote wana ase Yuda wakoshite, tuminadi akokelekola lo kodi yande, ndo akasha mamulaka le epalanga Kohani ndo le Sanehedrina tshee da pomana; ko, poloya Paulo, akokitsha lateyi wawo.