¹ Sho takoto lo wato, kisha sho tshikana lawo, ndo takatshu muno otsha le Kosa, la wediapendju le Rhodasa, ndo oma lanoo otsha le Patara. ² Ndo takatani wato wakatatenyanyaka otsha le Fenesiya, takoto loko ndo takatshu. ³ Saa kekatakomi lo tsheke ya Shypra, takayitshike lo lonya la lomoso, takatetemala la lokendo lo leeke la Syriya, ndo takasele le Tyra, leko kekawapunguza dango. ⁴ Takatani Ambeki, ndo takatshikala leko shii esambele. Ambeki, wakalombwama la nyuma, wakate Paulo da aha mbude le Yerusalema. ⁵ Koko, saa kekatakomi le mwisho wa loshi lesambele, takoto lonongo da tsho, ndo shotshee wakatotshinde la wadi wawo ndo ana wawo polo etale la ngelo. takako ladwe lomamu woduwa, ndo takalombe. ⁶ Ko, takalakana lamotshi lakina, takoto lo wato, ndo wakakaloya lekawakawo. ⁷ Takamani odukelo waso, takatshu le Tyra otsha le Potolemayisa, kene akatemula analengo, ndo takatshikala lawo loshi otoyi lawo. ⁸ Takatshu la wediapendju, ndo takakomi le Sezareya. Takoto lo loodu la Filipe omembi wa lokumu lololo, latshi omotshi lesambele, takapange lakande. ⁹ Atshi la esekaseka eneyi wa bikira wakatabirikaka. ¹⁰ Oko watshiso lanoo lo efula ke shii, Ombutshi, lokombo lande Agabusa, akaholo oma le Yuda, ¹¹ Ndo akaye ndjototana. akoshi okawa wa Paulo, akakeleka lekolo ndo lanya, ndo mbuta: nyende kene keta nyuma kekila: oto lakanga one okawa, ase Yuda wakokeleka woho wako wame le Yerusalema, ndo wakokeleka lanya wapagani. ¹² Saa kekato osoku, sho ndo wane watshi lanoo, takalombe Paulo da aha mbude le Yerusalema. ¹³ Laso akakadimula: atshenyu, lo ndela ndo nendjami otema? ndeko tayadi, aha da kelekama, koko lokina da ndjakema le Yerusalema lo lokombo lOwandji Yeso. ¹⁴ Oko wakinde kondjatshika mbokiyama, sho kotetemala, ndo takate: lolango lOwandji latshemi! ¹⁵ Kisha shii yako, takayatayarisha, ndo takade le Yerusalema. ¹⁶ Ambeki amotshi wa le Sezareya wakatshu laso ndovo, ndo wakatotole le oto omotshi lokombo lande Manasona, tsheke ya le Shypra, Ombeki wedjedja, lekande kekatapange. ¹⁷ Saa kekatakomi le Yerusalema, analengo wakatolongola longenongeno. ¹⁸ La wediapendju, Paulo akatshu laso le Yakobo, ndo le wazee tshee wakahomana. ¹⁹ Kisha mbaemula, akate otoyi lotoyi kene kekatshe Zambi lateyi wapagani lo lolombo lande. ²⁰ Saa kekawoke, wakatombola Zambi. ko wakawote: wee lomena, onalengo, efula ke ase Yuda wambetawo, ndo votshee wambotshunda lolembe. ²¹ Koko, wakafundishama one wee lofundisha le ase Yuda wele lateyi wapagani da manuna Mose, owate da ha mbidja anawo kumbini ndo aha ndjela loshidi. ²² Naa ketshee okone? aha la mashaka oloyi wato wakohomana, ne da wakeya done wee okaye. ²³ Dako dele tshe kene kotokote. koleko lateyi waso apami aneyi wakakimo woshasha; ²⁴ Osawo, yaeda lawo, ndo dipa eshishelo kewo, kele kawohembole divo lo ote. ndo okone votshee wakeya da keso kekawoke lo kene kendana laye keleko kashi, koko ndowe lokina yalombola lo sedingola olembe. ²⁵ Oko apagani wane waketawo, takate ndo takawawandike da aha vo mbosa nyama yalambolawo dikishi, dikila nyama yovwe ovovo, ndo loseka. ²⁶ Laso Paulo akoshi aso apami, akayaeda, ndo mboto la wediapendju lo tepelo lawo, da mbuta naa loshhi edelo kekokotshama ndo naa woshasha wakoka tondja le oto loto lasawo. ²⁷ Le mwisho wa shii esambele, ase Yuda wa lAziya, wakeni Paulo lo tepelo, wakatombosha oloyi wato tshee, ndo wakawonde, ²⁸ Wawana: ato wase Izariyele, nyotokimanyiya! nyende oto lasambisha fashi tshee ndo le oto tshee lo wodja, tshikitana lolembe ndo tshikitana la kene fashi; akadjasha ndase Ngirika lo tepelo, ndo ambolanya kene fashi kekila. ²⁹ Ne da wakeni tondo tondo Trofinima kEfeso lande lo ngelo, ndo wakafonyaka da Paulo kekawodje lo tepelo. ³⁰ Ngelo tshee kekalange, ndo wodja wakaye fashi tshee. wakande Paulo, ndo wakotondja etale la tepelo, yele ndo milango yakadihama. ³¹ OKo wakawonaka da mbodaka, looka lakaye lo tuminadi loloyi da ose Yerusalema tshee atshi lohokohoko. ³² Kako akoshi asoda ndo elombodi, ndo wakalawo lewo. wakeni tuminadi ndo asoda, wakatshike komola Paulo. ³³ Laso tuminadi akasukana, akawoshi, ndo akokeleka tosheni tohende. ko atshinde, ndo akandatshe. ³⁴ Koko loloyi wato amotshi wakawanaka woho wawo, akina yoho kyina; nde kokoka mboka ke hwehwe, loote wa leemba, akalamula da mbotola lo muyololo. ³⁵ Saa kekakomi Paulo le mwisho, akahombama nde membama lasoda, loote wa wovi woloyi wato; ³⁶ Ne da leemba la wodja wakatayelaka, wawana: dakande! ³⁷ Saa ke mbodja lo muyololo, Paulo akate tuminadi: kokaka lemi mbuta dikambo dimotshi? tuminadi akakadimula: wee mbeyaka kingirika? ³⁸ Wee kema one ose Edjibito lakatomboka lokongo, ndo lakela lo shenga atomboki midiyo nyeyi? ³⁹ Ndeko ose Yuda, kekaloya Paulo, ya le Tarsa le Silisiya, okiti wa ngelo kele kema la kinemo. okimwe, lambokolomba, da tekete wodja. ⁴⁰ Tuminadi akokimwe, Paulo, memala ladiko da mwisho, akenya lo lonya le wodja. kii kefula kekayala, ndo Paulo, akateketa loteketa wa kihebero, ate: