¹ Naomi boilana inde, akabeke linde ani: Wana ange, lolangi lofe'owe liheumi, loka kembo ombe bolo. ² La kanikani Boasa, la baseka beke ombaka libo, yeiti ye ambe ise iso? Tene, atofefia le lotiyo befonga bieye bimbe ta etwangelo. ³ Kpelaka ikuli la uwaka baina, la kikolaka tulu yao, la suluwaka ta etwangelo lo bofonga. Oitokela kembo aluwe'owe, tii kani embosilisaka ye ola la omwa. ⁴ La ta mbile etoka ye okalala'se, moilaka eseke leke lotokpa ye ilo. La mbisa kaaka, tina la bakolo binde, kpaka ilo onga. Ye angene atobeisa lao eni kanda otokela. ⁵ Akabinoisela ye mbo: Lombokelaka itotina ye okabeka lange. ⁶ Akasuluwa ta etwangelo, la akawa itotina yeke boilana inde abekelaka ye. ⁷ Boasa akalaa la akamwa, botema winde bokaomala. Akaaka oka kpa ilo tinatina la tchwambo. Luta akaaka iniyo-iniyo, akaena bakolo binde, la akakpa ilo. ⁸ Katikati ee lotiyo, bototlome amo akaoka bofiyo; akainyama, la tene, botaali amoi ambaka atolalase ta bakolo binde. Akabeka mbo: Ombe ndai? akainoisela ye mbo: Lombe Luta, bokowa wao; lalisaka tulu ao ambe bokowa wao, loka ombe nduku. ¹⁰ La akabeka ani: Utchelomoko la Mungu, wana ange! Losamo lao lo liko lofoeta le lofelo, eke oikeli mbisa ii liemba litolome, lamba bee balifoka, lamba be ba tobube. ¹¹ Kani-kani, wana ange, oibangaka; lotokela loka lao itotina ye ombobekaka; loka baito bange batotina baluwi mbo ombe botaali bolo. ¹² Imbe wewe mbo lombe nduku, ndjo nduku asiya ambe felo. ¹³ Tikalaka koni le lotiyo. La elengo, yomba mbo atokela loka lao lobeko lo nduku, imbe bolo akele ongoma, yomba aleko mbo alangi okelelowe lobeko lo nduku, ndjo ani embe yo ambe Mungu, lotokelowe lobeko lo nduku. Lolaka eke tii kota nongo. ¹⁴ Kola ongoma ye akalala ta bakolo binde tii kola nongo, la akaemala ani buto aitaka luwa olembela buto. Boasa akabeka mbo: Tikaka mbo yeiluwamanaka mbo botaali akome ta etchwangelo. ¹⁵ La akabeka alekombo: Ɛsaka tulu ene ombe lamo, la ilaka amo likolo. La ye akaunda yo la Boasa akatoka kopa liambe ii bofonga akatolisa ye yo. Kola ongoma Luta akaota ta boki. ¹⁶ Luta akakoma ambe boilanainde, la Naomi akabeka mbo: Yomba ase isani wana ange? La Luta akabeisa ye itotina yeke buto amo akakelelaka ye. ¹⁷ Akabeka mbo: Afei kopo liambe ii bofonga, la akabeka ani mbo, yeiyengani mbo okee elo embe boilana ao baoo bule. ¹⁸ La Naomi akabinoisela ye mbo: Moilelaka koni, wana ange, tii kani etoluwo'we tunga ee le lobeko, loka buto amo aitofeuma, kani etosilisa ye lobeko lamo laboni.