¹ Boasa akalila ta boinda la akangala se onga, tene, nduku ono Boasa akabeka akaeta. Boasa akabeka linde ani: Owe fulani, yo'oko, oyangalase, la akaya, akangala se. ² Boasa akaosa batolome liou ta batoolo ba boki, la akabeka mbo: Ngalakai'se eke, la bakangala'se. ³ Akabeka la ono ambaka la lobeko lo nduku mbo: Naomi ono akafowa ta boki bo Mowaba, alangi oungisa ekende lo nyele leke lombaka loa nduku iso Ɛlimeleke. ⁴ Kola ongoma, lokaenyela mbo lotobeisa lao lobeko le, obeka mbo: Sombaka lo felo ii baito bangalise eke la felo ii batoolo bange; yomba mbo olangi osangola, sangolaka, yomba mbo oilangi osangola, beisekei loka lo luwe, loka buto asiya aosangola yo aiti, ko'owe ango, la lotomba mbisa yao. Akabeka mbo: Lotosangola. ⁵ Boasa akabeka mbo: Ta lisiyo litosombo'we nyele yamo ta baoo baya Naomi, itoengana aleko mbo osombe yo ta baoo baya Luta buto a Mowaba, boali a bongbei, loka lobinoisa lina liya bongbei ta bondanda winde. ⁶ Ndjo ono ambaka la lobeko lo nduku akabinoisa mbo: Loiyengani osangola yo loka lange imbu loka loiseisaka bondanda wange; osaka loka lao bokota wange, loka ei loiyengani osangola yo. ⁷ Kowala ta Isalaele, bomuna bombaka ani ta litina liosangola lamba loetekaniso mbo, loka loofa liimeli bofoka, buto amoi ekofoya lipapa linde ekofa la buto asiya: Yamo imbaka lbekelomu ta Isalaele. ⁸ Ono ambaka la lobeko li nduku akabeka la Boasa mbo: Sombaka yo loka lao! La akafoya lipapa linde. ⁹ Boasa akabekala batoolo la baito batotina mbo: Ɛnu ombei babekeli laboni mbo ei lofoosha ta baoo baya Naomi itotina ye imbaka la Ɛlimeleke la yamo itotina yeke imbaka la Kiliyona la Mayelona, ¹⁰ lofosa aleko Luta buto a Mowaba, boali aya Mayelona kee boali ange loka lo'obinoisa lina liya bongbei ta bondanda winde, loka kembo lina liya bongbei liefoyomoko ta banduku bindela ta bootelo bo boki winde, ombei baeni laboni! ¹¹ Baito batotina beke bambaka ta boinda la batoolo bakabeka mbo: Ɛsu tombe babekeli! Mungu asele botaali ono akaota ta mbele ao kee Laele la Leya, beke baele bashwaka mbele ee Isalaele! Mbakala ngelo ilo ta Ɛfelata la mbe la lokuku ta Beteleme! ¹² Tikaka mbo bofindi we bototomowa ta ndole ee ono botaali bombe kanda emoi la mbele eya Pelese, ono Tamala abotelaka Yuda! ¹³ Boasa akaosa Luta, la akamba boali inde, akaota elo embe ye, la Mungu akatika mbo Luta ambe la lieme, la ye akabota wa botolome. ¹⁴ Bataali bakabeka la Naomi mbo: Mungu asimolomoko, ono aikatikowe oeno nduku laboni. Tikaka lina linde lioshe lokuku ta Isalaele! ¹⁵ Wana oko atomba atofowe bofoka ta bolimo wao la bokuku bo botoolo wao, loka mbo boali a wana ao alangi owe, ono afoeta ango bana batolome bosambale la boolo loka lao, ono akabota ye. ¹⁶ Naomi akaosa wana akalalisa ye ta bokuku winde, la akamba bokuki winde. ¹⁷ Kendisani linde bataali bakafa ye lina obeka mbo: Wana botolome ao botomo la Naomi. Bakata ye lina mbo Obede ye ambaka ise a Yisai, ise a Dawidi. ¹⁸ Tene befindi beya Pelese: ¹⁹ Pelese akabota Heselone; Heselone akabota Lama; Lama akabota Aminadaba; ²⁰ Aminadaba akabota Naesona; la Naesona akabota Salemona; ²¹ Salemona akabota Boasa; Boasa akabota Obede; ²² Obede akabota Yisaï, la Yisaï akabota Dawidi.