¹ Yesu akalila ta wato, lolekiso ta libande la akaka ta boki bofi winde. ² Baito bakatoela ye buto amoi asingile alalise ta litamba. Loeno liimeli libo, Yesu akabeka la buto asingile: "Osaka bofoka, wange, bebe biao beomesilomo". ³ La ongoma, baito basiya bee baluwi loka lobikela bakabeka ambe bo angene mbo: Buto ono atosela Mungu. ⁴ Kumbi Yesu aluwaka baenyeli bibo; akabeka: Loka loingi ombei la baenyeli babe ambe'nu? ⁵ La ongoma, ini yeiti la bofoka loka lo'obeka mbo: Bebe biao beomesilomo, lamba mbo: Emalaka la kendaka? ⁶ Loka mbo oluwi kembo Wana a Buto ambe ta nyele la bofoka bo lomesilo bebe, emalaka-owe-akabeka la buto asingile- osaka litamba liao la binowaka ete ambowe. ⁷ Botolome akaemala la akabinowa ete ambe ye. ⁸ Mbile ene linginda akaena yamo, bakamba la lisomi li liomali la bakaomala talaa iya Mungu, ono akafa we bofoka ambe baito. ⁹ Yesu akaka ko'onga. Ta loeto, akaena buto amoi angali se ta eseke lo'olipa bingbende la buto amo atomu mbo Matayo. Akabeka linde: "Tutekei". Buto oko akaemala la akatuta ye. ¹⁰ Ani Yesu ambaka ta mesa munga ee mbele, basondji likama ba bieto la baito ba bobe bakasama ongala ta mesa linde la baeki binde. ¹¹ Bafalisai bakaena yamo la bakabeka ambe baeki binde: loka loingi boekesi wino botola la basondji ba bingbendele la baito ba bobe? ¹² Ndjo Yesu, ono aokaka, akabeka libo: Beke bambe la bindo bofoka baiti la yeme iya bonganga, ndjo ko'bee ba bemusi. ¹³ Kakai okaekisomoi la yeke ikabeka mbo: Losami ngandi, la loisamile bakambomu. Kola ongoma, loikaya oyata bee baengni, ndjo ko' baito babe, loka lo'oetekaniso befomo be baenyeli bibo. ¹⁴ Baeki baya Yoani bakaya ambe Yesu la bakabeka: Loka loingi esu la Bafalisai totokila mala la mala, kola ongoma baeki bao baitokila? ¹⁵ Yesu akasamoela bo: Batomu lioi ta lobeko baengani omba la lisomi ani bosongi ambe libo? Basiyo batoya ete bosongi bambo'foyaka ye, la ongoma bambo kilaka. ¹⁶ Buto aimbo taliya laki lo tulu eyai ta tulu ene ekaokolo, loka mbo botuku we bokataliomo botofaamisa botuku bo tulu la eseke lofaami lokoengana. ¹⁷ Bayata baana bayai ta bibengu bikaokolo, loka mbo bibengu bikaokolo bio kofaama, baana ko'eta la bibengu biokoseisama; ndjo batoka baana bayai ta bibengu biyai, la baana la bibengu bio ko'kukama. ¹⁸ Kumbi abeisaka bo bee baoi, bokota bomoi bokakoma, akauma baluwi se felo inde la akabeka: Wana ange botaali aongba iyowa saaekikelike; ndjo yo'oko, loka mbo oyataliye boo wao likolo linde la ye atouwa. ¹⁹ Yesu akaemala la akatuta ye la baeki binde. ²⁰ Onga ndjo botaali amoi ambaka la bokili kota miaka liou la yele akashushama mbisa inde la akamata ta tunga ee tulu inde, ²¹ Loka mbo batobekamana bo angene: Lokafouwana ango la tulu inde, ei koanya liuwesi. ²² Yesu akamoila la mbisa, la akabeka, ta ani akaena bo: Osaka bofoka, wana ange botaali, liimeli liao lifouwiso we. La botaali bokauwa ta saa ko'amo. ²³ Mbile ene Yesu akakoma ta mbele eya bokota, la akaena baumi ba tofonge la linginda litongalangala, ²⁴ akabeka libo: Binowakai; loka mbo wana botaali aikangba, kumbi ndjo atokpa ilo. La baka iyana linde. ²⁵ Ta mbile ene linginda likabinoisomo la mbisa, akaota, akaosa boo boya wana botaali, la wana botaali akaemala. ²⁶ Iyeli ikamelanisomo ta fangi itotina ii yese. ²⁷ Ekaaka ye okaeta elo, Yesu akatutomo la baito baele ba botutu, bee batomama: Mbaka la ngandi liso, Wana aya Dawidi! ²⁸ Ta mbile ene akomaka ta mbele, baito ba botutu bakashushama tina linde, la Yesu akabeka libo: Otoenyelai mbo loengani okela yoko? Hii, Ngene, ye akamutoela bo. ²⁹ La ongoma akaunda baiso bibo, ta lobeko mbo: Iwomoko kotutana la liimeli lino. ³⁰ La baiso bibo bakalikolama. Yesu akawela bo ishosha yoko ii fololo: Wakai mbo buto ailuwaka. ³¹ Ndjo mbile ango ene bakatomowa, bakamelanisa bofono winde ta yese itotina. ³² Ani ekaka bo, tene, bakatoela Yesu bolimo bobe amoi abebe. ³³ Bolimo bobe bokashayomo, ebebe akabeka. La linginda bamwala mbo: Ango lisiyo limoi mbeko iye bofono yeitakaenamanaka ta Isalaele. ³⁴ Ndjo Bafalusai bakabeka mbo: Imbe amoi ta baito babe atoshaya belimo bebe. ³⁵ Yesu akakenda ta beki befi la beki beke betotina, akaekisa ta bisondjamanelo, ato nangola mboli itanu ii bokota,la atouwisa baito ba biale batotina la bee ba ndjoso batotina. ³⁶ Akaena linginda, akayala la ngandi likama loka libo, lokambo bangalaka la lilewi kee nama ye ikosile bakuki. ³⁷ La ongoma akabeka la baeki binde: Likuwa limbe lifi, ndjo bakuwi bambe bake. ³⁸ Sembolakai mbo Ngene a likuwa aese bakuwi ta likuwa linde.