¹ Yesu akata baeki binde liou la baele, akafa bo bofoka bosaya belimo bebe, la ouwisa biale betotina la bemusi betotina. ² Baina ba Batomomu liou la baele oye: Afelo Simona ono atomoko mbo Petelo, la Andeleya, nduku inde, la Yakobo, wana aya Jebedai, la Yoani, nduku inde; ³ Filipo la Balattolomai, Toma la Matai bokongoli bo lindjandja, Yakobo, wana aya Alafai, la Tadai, ⁴ Simona, buto a Kanana, la Yuda Mokeliota, ono akana ye. ⁵ Yesu akatoma bo liou la baele, akalaka bo mbio, oikakai ta boki bo beenda la ndotai ta boki ango bomoi bo Samaliya, ⁶ Ndjo kakai kono felo ambe bekoko bieke bakaobunga ta Yelusaleme. ⁷ Oko etokenu, Nangolakai mbo, Bokota bo likolo botoya. ⁸ Uwisakai baito ba biale, fufukisakai bangbei, tanisakai baito ba baandi,tomoisakai belimo bebe. Oiyani la lilipi la ndo fai aleko la lilipi. ⁹ Ndosai mbela lamba falanga lamba bieto ta mokaba wino, ¹⁰ Lamba litanga li lokendo, tinga tulu yele, lamba bilato, tinda ango isandu loka bokuwi aengani owanya bieka binde. ¹¹ Etokomenu ta boni beki befi la boni beki beke, lingakai lamba ndai ambe buto boolo katikati ibo. Umoakai onga tii kani otofowai. ¹² Etotenu ta boki, fakai samo onga. ¹³ Yomba aleko mbo mbele embe boolo, tikaka mbo hai ino engaleke onga. Yomba mbo yeiti la hai, tikaka mbo hai ino ibinowe ambenu angene. ¹⁴ Ono aito tukumaelenu, yomba mbo aiyoki baoi bino, oko etofowenu ta mbele amo, kusakai bouta bo batindi bino. ¹⁵ Lotobeka lino wewe mbo, ta lisiya li lisambi, itomba boolo ta boki bo Sodomo la Gomola koeta boki wamo. ¹⁶ Lototomenu kee Bekoko katikati i koi. Mbakai la weli kee fele la boongu kee tokuku. ¹⁷ Kebakai loka lo baito, batokesenu ta bakita la batoumenu ta bisongamelo. ¹⁸ Batoka lino feloi bangene ba wenda la bekota loka lange, loka lo libekelomu ambe bo la ambe beenda. ¹⁹ Emboanaka bo enu, oitungisamanakai lamba otobekai ingi. Loka omboanyakai baoi baobeka kota elo mbile. ²⁰ Loka enu oitobekai ndjo Bolimo boya Ise ino ambo bekaka ta eseke lino. ²¹ Nduku atokesa nduku inde ta lingba, la ise atoana wana, la bana batoemaela baise bibo, la batoita bo. ²² Batookenu wale loka lo lina liange; la ono atomba la bofilili kota liko atouwa. ²³ Oko eto'okisa bo enu wale ta boki bomoi, kimbiakai ta boki bosiya. Lobeise'nu ta wewe, oitosilisai okenda ta beki be Yelusaleme ani Wana a Buto aitakaya. ²⁴ Boeki aiyeti boekesi winde, la bokowa aleko aiyeti ngene inde. ²⁵ Iyengani la boeki ambe kee boekesi winde, la bokowa ambe kee ngene inde. Yomba mbo bakaota ngene a mbele Belezebule, la batomola-mola baito ba mbele inde! ²⁶ Oimbakai la bowa loka libo, lokambo yeiti la mbeko ango imoi ii liisami yeke yeimbo enenaka ta fololo, ango liisami yeke yeimboluanaka. ²⁷ Yeke lokabekele'nu ta lilima, bekakai yota lowa; yeke ikaokenu ta batoi, nangolakai yo likolo li bosambu bo mbele. ²⁸ Oibangakai bee batoita bindo bailuwi oita bolimo; bangakai ndjo ono ambe la bofoka boseisa bolimo la bindo ta Geena. ²⁹ Batoungisa noli ikikelike loka lo ngbele? Ango amoi ibo aitokpase ta nyele ani Afa ino aitaka luwa. ³⁰ La sowe ino itotina ii bochwe itangomo ta batina. ³¹ La oibangakai, enu oeti yo noli ikikelike. ³² Kolayamo, buto la buto ono atobeka loka lange felo ii baito, ei aleko lotobekela loka linde felo iya Afa ange ta bose; ³³ la ono atoanganyei felo ii baito, ei aleko lotoanganya ye felo iya Afa ange ta bose. ³⁴ Oiynyelakai mbo loye ndjo oyata kimia ta wenda; loiyeli oyatakimia, la bopanga. ³⁵ Loye oyata liyanani katikati ee buto la ise inde, katikati iya wana botaali la inango inde, aiteni eya boali aya wana la boilana inde. ³⁶ La baiyani ba buto bambe baito ba mbele inde angene. ³⁷ Ono atosama ise la inango inde koetei, aiyengani lange, la ono atosama wana botolome ao wana botaali inde koetei, aiyengani lange; ³⁸ la ono aleko aitoila lieka linde la otuei, aiyengani lange. ³⁹ La ono atoisa liwawi linde, atobungisa, ono atobungisa liwawi linde loka, atoosha lio. ⁴⁰ Ono atokuamele'nu, aokuamelei; la ono atokuameeli, aokuamela ono akatomekei. ⁴¹ Ono atokumaela bonangoli kee banangoli atoosha lilipomu li bonangoli, la ono atokuamela boengani kee boengani, atoosha lilipomu liya boengani. ⁴² Lamba ndai atofa keni ee baye ba bofiyo ta amoi ta beke bambe bakikelike, lokambo ombe boeki, wewe lotobeka lino, aimbo bongisa lilipomu linde.