¹ Ta mbile ene Yesu akasilaka oesa toshosha ambe baeki binde liou la yele, kola ongoma akaka loka lo loekiso la otondola ta beki bibo. ² Kumbi, ta lokandjomo linde, Yoani aokaka ta yeke Kilisito akelaka. Akatoma baele ta baeki binde loiyolo ye: ³ Imbe ono atoya lamba iyengani to'oke osiya? ⁴ Yesu akamutoela bo: Kakai okabeisa la Yoani yeke okaokai la ye okaenai: ⁵ Baito ba botutu bafoena, bitukulu biokenda, baito ba mbala baotanisomo, bee babooko bafo'oka, beliyo beoyayowa la mboli itanu iobekilomo ambe tobube. ⁶ Lopambolomo ambe ono ototina aito'oka soni loka lange. ⁷ Embaka bo batoka, Yesu akambaatobeka la linginda ta litina liya Yoani: Okaakai okaena ta liombele? Bokombe bomoi bokabuneya la lofofo? ⁸ Ndjo okaakai okaena? Botolome amoi abati tulu ilo-ilo? Beke batobataka tulu ilo-ilo bambeke ta mbele ii bekota. ⁹ Okaakai okaena amboko? Botondoli bomoi? Hii, lotobeka lino mbo, ono atoeta ambe botondoli bosiya, ¹⁰ loka mbo embe ye ndjo akaesa baenyeli bee basonomu mbo: Tene, lototoma botomomu wange felo yao loka lo'oenisa lao ndole. ¹¹ Lotobeka lino ta wewe, ta beke babotomu ta ndole ee bataali, baimboya buto bofi koeta Yoani Batisimo. Kola ongoma, ono ambe yana ikikelike ta bokota bo buse ambe buto bofi koeta ye. ¹² Kota elela loya Yoani Batisimo kota kani, bokota bo buse bongalisomu la bofoka, la baseisomu bafoenena la kanda ibo. ¹³ La ongoma, batondoli batotina la ekela iyotondolomo ko'ambe Yoani. ¹⁴ Yomba mbo olangi bolo mbo oimile, imbe ye Eliya aengani oya. ¹⁵ Ono ambe la batoi baoka aokeke. ¹⁶ Ambe oni buto otofananisa ye la we bofindi? Botofanana la bana bee bangalise ta bongaelo bo baito likama la bee batobeisa ambe bana basiya ¹⁷ mbo: Enu oumei tofonge la oikabinai, totchwele'nu beele be ngandila enu oikalelai. ¹⁸ La ongoma Yoani ayaka, la aitimba atola la atomwa la bakabeka mbo: Ambe la bolimo bobe. ¹⁹ Wana a Buto aoya, oko embeye atola la atomwa, la bakabeka mbo: Tene bolei la bomwei, lisau li basondji ba pako la baito basiya. Ndjo akili efoeta ta bakuwa binde. ²⁰ A'andjaka omamila boki we bowaka ye tokesa likama to bofoka, loka baikakikoliya betema bibo: ²¹ Ngandi lao, Kolaji! Ngani lao, Betesaida! Loka mbo tokesa toekelomo katikati ino, towomoko aleko ta Tulu la Sidona, la esiyo bakakikiliya betema, la bakabata bakoniya la bakangala ta beuta. ²² La ongoma lotobeka lino: Loka lo lisiyo li lisambisomu, Tula la Sidona batomba bolo koeta enu. ²³ Owe aleko, Kapalanaume, otoilomo likolo kota lobola? Ango. Otosuluwa kota bongaelo bo bangbei, loka mbo tokesa towomoko ambowe tokelomo aleko ta Sodomo, la yamo ikombe kota laboni. ²⁴ Kola ongoma lotobeka lino mbo: Ta lisiyo li lisambisomu, itomba bolo loka lo boki bo Sodomo koeta owe. ²⁵ Ta mbile amo, Yesu akamutola mbo: Lombe la loluwo owe, Afa, Ngene a Lobola la nyele lokambo oisile ndjoso ye felo ii baito ba bieyeli la bee baliluwi la ofoena yo ambe bana bakikelike. ²⁶ Ɛe Afa, ongoma iyenene bolo felo ii baiso bao. ²⁷ Ndjoso itotina iofomo ei la Ise ange; buto ailuwi Wana ko Afa ango la buto ailuwi Afa ko Wana ango la ono Wana akaimila mbo aenise ye. ²⁸ Yokoi felo yange, enu atotina ombei otolewai la likuwa la lotolo bolito la lopemiso enu. ²⁹ Baoseke ekandelo lange likolo lino la okei eii; lokambo ei lombe la boongu la botema bolo; otoanyai lopemo loka lo belimo bino. ³⁰ Loka mbo toshosha tchwange tombe tolo la bolito wange boiti la bolito.