¹ Ta mbile amo, Yesu akaeta ta bilanga bi bakokosi lisio li Yenga. Baeki binde, bakambaka la semba, baka akola obuna bakokosi la bakala. ² Bafalisai, bakaena ongoma, baka beka linde mbo: Tene, baeki bao batowa yeke yeiyengani lokelomo lisio li Yenga. ³ La Yesu akabinoisela bo mbo: Oikatangakai yeke Dawidi awaka, mbile aokaka semba, ye la beke bambaka linde? ⁴ Ani eotakae ta mbele ee Mungu, la akala boila we bombaka, yeke yeikaengana linde mbo ale, la ango aleko beke bambaka linde, la imbaka ango loka lo benganga. ⁵ Oikatangai ta bikela ani benganga batoseisa lisiyo li Yengaa iteni ee Tepelo lisiyo li Yenga la baiti aleko la lichuanelo? ⁶ Lotobeka lino wewe mbo yeke ikaeta Tepelo imbe eke. ⁷ Yomba mbo okaluwakai ye mbo, losami ngandi, la loisami liano, ani oitosuluwisai baito beke baiti la lichuanilo. ⁸ Loka mbo Wana a buto ndjo ambe Ngene ee lisiyo li Yenga. ⁹ Akafowa onga la akakoma ta esongamanelo. ¹⁰ Enaka, buto a boo bo'omeli ambaka bakaiyolae loka lo'ositakae mbo: Iyengani ouwisa buto lisiyo li Yenga? .... ¹¹ Ye akabeka libo mbo, Oni buto ambenu ambe la bokoko, atokusama ta likemba lisiyo li Yenga, aitoundaye loka loila ye likolo? ¹² Buto aiti bokoko la loketi fafo! Iyengani ndjo okela bolo lisiyo li Yenga. ¹³ La akabeka la buto mbo, nyanyolaka boo wao. Aka nyanyola wo, la bokauwa kee we bomoi. ¹⁴ Bafalisai bakatomowa la bakakomanya loka linde mbo baite ye ta ndole amo. ¹⁵ Yesu akaluwa ongoma la akafowa onga. Linginda bakatutae la akauwisa batotina. ¹⁶ Akaekisa bo mbo bailuwanisakae fololo, ¹⁷ loka mbo lioi libekaka bonangoli Yisaya lienganisomo mbo, ¹⁸ enaka, bokuwi wange ono loka'ochakolae; bolimo wange bofomala linde, lototae bolimo wange la atongala lisambisomu lino ta befindi bii Beenda. ¹⁹ Aitongbanela, aitomama, la buto ango amoi imbo'oka limiki linde katikati ee ndole. ²⁰ Aitobuna liwa lieke likaochuangomo, aitotiamisa lotambi leke lokao'baanisomo; tii kani aitosilisae osambisa wewe. La befindi be Beenda bato lendolomo ta lina linde. ²² Kola ongoma, bakayelae la buto a bolimo botuku, la aitobeka. Akauwisae tii kani buto ono aitobeka akabeka la aka'ena. ²³ Linginda litotina bakamwaala, bakabeka mbo, ono aiti Wana ay Dawidi? ²⁴ Bafalisai, bakaoka ongoma, bakabeka mbo, ono atofoya belimo bebe ta bofoka boya Belezabula, bokota bo belimo bebe. ²⁵ Akaluwa baenyeli bibo, la akabeka libo mbo, bokota la bokota weke baka'anana aiteni ibo boitoemala. ²⁶ Yomba mbo Satana atotomoisa Satana, anani aiteni inde engene; Lino bokota winde botoemala eni kanda? ²⁷ Yomba mbo ei lotofoya belimo bebe ta bofoka boya Belezabula, bana bino batofoya ase yo langi? La bo batomba batosambise'enu. ²⁸ La yomba mbo ei lotofoya belimo bebe ta ndole ee Bolimo boya Mungu, ani Bokota boya Mungu bo'osila oya ambenu. ²⁹ Buto atoota ta mbele eya lokulu ta eni ndole la atoseisa biongo binde eni kanda ani koni felo aitakaunda lokulu? ³⁰ Lambisa yamo ndjo aengani oseisa la obuna mbele inde. Ono aitii lange eseke lomoi, atoemaelei, la ono aitoota lange eseke lomoi atomeanisa. ³¹ Kola ongoma lotobeka lino mbo: Bobe bototina la limoli li baito litomesilomo, ndjo limoli liomola blimo boengani baitomesila bo yamo. ³² Ye ndai atobeka lioi lioemaela Wana aya Buto atomesilomo. Ye ndai atobeka lioi lioemaela Bolimo Botanu aibo mesilomo, lamba ta ene mbile lamba ta mbile etoya. ³³ Komanyaka isandu ilo la touma chuinde totomba tolo la aleko mbo komanyakai isandu ibe la touma chuinde totomba tobe; Loka isandu itoluwamana loka lo touma chuinde. ³⁴ liboti li fele, oengani obeka bolo ene kanda ani ombei koni babe? Loka bonoko botobeka otutana laye iwali ta botema. ³⁵ Buto bolo atotomoisa mbeko lio ofowa ta eiselo lolo linde la buto bobe atotomoisa mbeko ibe ofowa eiselo linde lobe. ³⁶ Lotobeka lino mbo: Lisiyo li lisambisomu, baito bambo sambaka loka (lo bobeka beka) bototina botobeka bo; ³⁷ Loka mbo baoi bao bato longisowe la baoi bao batosuluwiso'owe ao batokpesowe. ³⁸ Basiya ta bandiki la Bafalisai baka beka linde mbo: Boekisi, tolangi toene ikesa ofowa amboe. ³⁹ Akabinoisala bo mbo: Fecho ao liboti limbe la bolefe la lotolengila ikesa, la baito osha ikesa kanga ko ikesa iya bonangoli Yona. ⁴⁰ Ani embaka Yona ta soolo ee suwe efi basiyo basaso la tiyo isaso, etomba Wana a Buto aleko basiyo basaso la tiyo isaso aiteni ii soolo ee nyele. ⁴¹ Batolome ba Niniwe batoemala ta lisambisomu eske lomoi la bofindi wee la batouwisa bo; Loka mbo bakikolie betema bibo ta inango iya Yona la enaka ono aeti Yona ambe eke. ⁴² Bokota botaali ta fangi eembele atoemala ta lisambisomu la bofindi wee eseke lomoi atosuluwisa bo, loka mbo ye afowe ta ikenge ii wenda loka looka weli boya Solomo la ono aeti Solomoambe eke. ⁴³ Ta mbile bolimo bobe akafowa ta buto, atokenda kenda ta biseke bieti la baye loka looluka engaelo la aito'osha. ⁴⁴ La atobeka mbo: Loto binowa ta eseke leke loka fowaka. Etokomaye, atoena mbo lmbe bule la loosila oombomo la lokomanyomo. ⁴⁵ La atoka la atoya belimo besiya bosambale bieke baeti ye la tale; La batoota loka loongala elo. La lingali li tunga ee buto amo litomba libe oeta lingali linde li felo. Itomba aleko ongoma ta wee bofindi bobe. ⁴⁶ Ekambakae atobeka la linginda, enaka inango inde la banduku binde batolome baemali lousa loka loolinga mbo babekane linde. ⁴⁷ Buto amoi akabeka linde mbo: Tene inango ao la banduku bao batolome bambe ete lousa batolinga obekana lao. ⁴⁸ Ye akabinoisela buto ono akabekaka linde mbo: Inango ange mbo ndai? La banduku bange mbo ba ndai? ⁴⁹ Akaila boo winde ambe baeki binde, akabeka mbo: Tene inango ange la banduku bange. ⁵⁰ Loka mbo ono atowa losamo loya Ise ange ono ambe ta bose, oko ndjo ambe nduku ange botolome la nduku ange botaali la inango ange.