¹ Ta lisiyo liamo, Yesu akatomowa ta mbele akangala pembeni ii bomongo. ² Baito ba bule bafibafi bakasondjamana felo inde, la ongoma akaota ta wato la akangala se onga. Ba bule bakaemala ta bomongo. ³ Akabeka libo mbeko likama ta bembila, ye mbo: Moilakai bolobi aofowa okaloba. ⁴ Eko elobaka ye boloba bosiya bokakpase tina la ndole la noli ikaya ikala boloba we bokpase. ⁵ Boloba bosiya bokakpase ta batale onga eikambaka la nyele ii bule. Mangungu ikatomowa onga loka eseke lamo loikamba la nyele ii bule. ⁶ La ongoma lowa lokatomowa boloba bokafia la imbe, loka mbo boikamba la likuwa, bokaomela. ⁷ Bosiya bokakpa'se ta keke; keke ikaunda la ongoma ikaita wo. ⁸ Bosiya bokakpa'se ta nyele ilo-ilo ikatomoisa touma, mia-mia, yeke tuku liambe, tuku lambe, tuku isaso la isaso. ⁹ Ye ono ambe la batoi, aokeke. ¹⁰ Ekakoma baeki, bakabeka linde mbo loka loingi otobeka libo la bembila? ¹¹ Ye akamutoela bo mbo: Mbeko ii kuku ii bokota bo likolo, enu oenganii oka yo, la ongoma bo baiyengani o'oka yo. ¹² Ongoma ambe ye ono akaoka lisiya bieka, atoanya bisiya bi bule. Kola ongoma ambe ye ono aiti, batokpola ango ye ye imbe linde. ¹³ La litina lie lombobekaka libo ta bembila loka mbo: Etomoila bo baimboena loka itokomela bo baimbo'oka, baimboluwa litina. ¹⁴ Li mboli iya Yisaya liengani libo, oto'okai la batoi la otoluwai litina. Otomoilai la baiso la oto'enai. ¹⁵ Loka mbo betema be baito bee bekaosila omba bofoka, bofoka ta batoi la balundu, ongoma bakaufa baiso bibo, loka baenaka la baiso la baiokaka la batoi, la baluwaka ta betema, la baibinowaka loka lo'louwisa bo. ¹⁶ Ongoma baiso bino bafoitomo loka mbo imbe lenesi litoena loka batoi bino kee loka mbo bato'oka. ¹⁷ Lotobeka lino wewe mbo banangoli la bee ba wewe ba bule bakambaka la yeme baene mbeko imoili enu la baiyeni loko o'oka mbeko ikaoke'nu bo baiyoki. ¹⁸ Enu o'okakai bombila bo bolobi. ¹⁹ Etoka oni buto lioi li bokota, la aimbotena litina, bobe botoya la botokpola yamo ilobomu ta botema winde. Ye ono alobomu tina la ndole. ²⁰ Ye ono alobomu likolo li batale, ye ono akaoka lioi la otukumaela lio mangu la liomali. ²¹ Ye aiti'imbu la litina aiteni inde ongoma afoumowa iniyo ii mbile onga wale la lotungisamo ioya loka lo lioi, mangu mangu ato'oka soni. ²² Ye ono akalobomo ta katikati ii keke, ambe ono akaoka lioi la mbeko ii wenda la yeme ii bakute itouwisa lioi la yeitobota touma. ²³ Ye ono akalobomo likolo li nyele ilo-ilo ambe ye ono akaoka lioi la akatena litina li lioi; ye a'obota yuma la a'otomoisa yo, isiya mia, mia, isiya tuku isaso, la tuku isaso. ²⁴ Akatela bo bombila bosiya mbo: Bokota bo likolo imbe kee buto akalobaka boloba bolo ta elanga linde. ²⁵ Ongomma ekambaka baito'olala se, boiyani winde akaya akoloba liwa libe katikati ii bakoke la akafowa. ²⁶ Ikaotomowa bakoke la ikabota tcho touma, ongoma liwa libe likaenena aleko. ²⁷ Bekowa beya ngene a mbele bakaya la bakabeka linde mbo: Ngene, oikaloba boloba bolo bolo ta elanga lao'ii? Loka lombe la liwa libe loka lo'ingi? ²⁸ Ye akabeka libo mbo: Boiyani buto akakela ongoma. Bekowa bakabeka linde mbo: Ani osami mbo toke tokote yo? ²⁹ Ye akabeka mbo: Oto, mbo oko etolokote'nu liwa libe oibushakai bakoke. ³⁰ Tika itotina yele ikonde eseke lomoi tii ko'mbile itobunomo. Ta mbile eobuna, totobeisa babuni mbo: Lokotai felo liwa libe la okandei eseke lomoi loka itumbomo; la osondjei bakoke ta ekukelo lange. ³¹ Akatela bo bombila bosiya mbo: Bokota bo likolo bombe kee yuuma ii bochicha yeke buto akaosa loka lo'oloba ta elanga linde. ³² Yamo imbe boke koeta touma tototina, etokonda yo, imbe yuuma yeke imbe bofi la itokoma isandu, la noli ii bosee batoya oya chua ndowe ta betaa binde. ³³ Akatela bo bombila bosiya bo: Bokota bo bose bombe kee fulu ene botaali akaosa la akaisa ta lopimo isasobi fufutu kani ee kumaka yo. ³⁴ Yesu abekaka ye mbeko ta linginda ta ndole ee bembila; Akabeka libo kota bembila. ³⁵ La'ani lobeko lobekaka banangoli likaengananisomo mbo Lototikala bonoko wange ta bembila, lotobeka ndjaso ye iisami owakola ta liako li wenda. ³⁶ Akatika linginda la akaota ta mbele inde. Baeki binde bakaya tina linde, la bakabeka mbo: Luwiseke'esu litina li bembila li liwa libee ta bilanga. ³⁷ Akabinoisela mbo: bolobi bo yuuma ilo imbe Wana a Buto; ³⁸ Elanga imbe wenda; Mbeku ilo imbe bana ba bokota; Liwa libe imbe bana bayaono bobe. ³⁹ Boiyani ono akaloba yo imbe Satana. Mbile ee buna imbe tunga ee wenda; Babuni bambe bakeitomo. ⁴⁰ Ani eltolokta bo liwa libe labatofecha yo, itomba ongoma ta liko li wenda. ⁴¹ Wana a Buto atotoma bakeitomo binde la batolokota aiteni ee bokta winde ndjaso itotina yeke ito'okisa soni la bakeli batotina ba bobe. ⁴² La batokusayo ta litundulundu li imbe, oko etomba bileli la ngelete ii baino. ⁴³ Baengani batomba ta liangangi kee lowaaiteni ee Bokota boya Afaibo. Ono ambe la batoi, aokeke. ⁴⁴ Bokota bo bose bombe kee leka lo litina loisami aiteni ii elanga la buto akaoshayo la akaufa amo ongoma, la liomali linde, akaaka oka'ungisa biongo bitottina bieke ambaka la biho la akasomba elanga lamo. ⁴⁵ Lisiya Bokota bo bose bombe kee boungisi ono atoluka tulu ilo. ⁴⁶ Akafo'osha tulu emoi ee loketi fafo, ekoka la ekoungisa itotina ye ambaka layo la ekosomba yamno. ⁴⁷ Lisiya, bokota bo bose bombe kee wengo we bokakusomo ta katikati ee libande la bokalokota suwe ii befono betotina. ⁴⁸ Etowala yo, baito bo koluta yo ta ngonge, la bokongalasee, bakaana ye ilo otayo ta bonyongo, la bokokusa ye imbe ibe. ⁴⁹ Itomba aleko ongoma ta liko li wenda; Bakeitomo batosuluwa oya foya bobe katikati ii bolo; ⁵⁰ La batokusa bo ta litundulundu li imbe. Bileli bitomba elo la ngelete ii baino. ⁵¹ Osilai loluwo litina li yeke itotina? Bakabeka linde mbo: Eeeh. ⁵² Ye akabeka libo mbo, boandiki la boandiki ono akaekisomo loka lo'otuta bokota bo bose ambe kee Ngene a mbele ono atotomoisa ta eiselo linde leka loyai la leka lo kwaala. ⁵³ Ekasilisaka Yesu bembila bihe, akafowa onga. ⁵⁴ Ekakomaka ye te boki winde engene akaekisa bo ta esongamelo ibo la bakamwala la bakabeka mbo; Ono aoshe weli we la bakuwa binde ba bofoka endei? ⁵⁵ Ono aiti wana a bokeli bo mbao? Lina liya inango inde lieti Maliya? Banduku binde baiti Yakobo la Yosefela, Simona la aleko Yuda? ⁵⁶ Bawelo binde bataali baiti liso eke? Buto ono aoshe ndaso itotina ye endei? ⁵⁷ Akambaka likulia loka libo. La Yesu akabeka libo mbo: Bonangoli aiti la lokuku ta boki winde la aiteni ee mbele inde. ⁵⁸ Akawaka bakuaw likama la bofoka loka lo'okosa libo liimeli.