¹ Tambile amo, bokota Helode akaoka lokuku loya Yesu, la akabeka la bakuwi binde mbo: imbe Yoani bolufi! ² Aofufuka ta bangbei, la yamo bakuwa ba bofoka batowomo aiteni inde. ³ Helode, akakanda Yoani, la akaata ye ta bonyololo, loka loya Elodia boali aya nduku inde Filipo, ⁴ loka Yoani abekaka linde mbo, ye iyengani lao osonga ye. ⁵ Akambaka la yeme iyoita ye, la akamba la bowa loka lo- baito babule, loka akaenaka ye kee bonangoli. ⁶ Mbile enganaka lisiyo lionyelisa libotomu liya Helode, wana botaali aya Elodia akabina bisha aiteni ibo la akaomalisa Helode, ⁷ kani elapakae mbo atofae leka le- atolengilae. ⁸ Otutana la liekesi liya inango inde, akabeka mbo: Fekei bochue boya Yoani bolufi likolo li saani. ⁹ Bokota akaoka ndandi fafo; otutana ase la lilapi linde, laloka lobeke bakambaka batola eseke lomoi kee kendisani, akalaka mbo aosheke. ¹⁰ La akatoma la bakatena Yoani bochue ta bonyololo. ¹¹ Bakaesa bochue winde likolo li saani, la bakafaa la wana botaali, akatola ambe inango inde. ¹² Baeki baya Yoani bakaya oya osa bolio la bakaomba wo; la bakaaka okabeisa la Yesu. ¹³ Ekaokaka Yesu ye mboli, akafowa ta wato akaka ta eseke lo- liombele engene. Ekaokaka linginga ongoma, bakatutae la bakolo ofowa ta beki bifi. ¹⁴ Akafowa ta wato, akaena linginda lifi, la akaokela bo ngandi, la akauwisa baito bibo ba biale. ¹⁵ Ikakoma la likolosé, baeki bakaya ambe ye la bakabeka linde mbo, eseke le lombe liombele, la lowa loka lambole; tomaka linginda lifi bake ta boki boke loka basombe loka libo bieka. ¹⁶ Yesu akabeka libo mbo: baiti la yeme iyoka; enu fakai bo bieka. ¹⁷ Bakabeka linde mbo tombe ango la bekati liondo la suwe yele. ¹⁸ Ye mbo: yelekei layo eke. ¹⁹ Akangalisa linginda ta liwa, akaosa bekati liondo, la suwe yele, akaila baiso likolo ta lobola, akaesa ngbengbele. la akabuna bekati, akafaa la baeki, la baeki bakanela linginda. ²⁰ Batotina bakaala la bakakuma soolo, bakatola tochunga liou la yele ta bikende bieke bitika laka. ²¹ Beke balaka bambaka baito elefu liondo, ofoya bataali la bainenge. ²² Tambile amo, akabeka la baeki baote ta wato lsa balekise fangi esiya felo inde, ani ye atomeanisa linginda. ²³ Ekasilakae omeanisa linginda, aka lila ta longo engene loka losembola. Ikakoma mbile ee likolosé, akambaka onga engene. ²⁴ Wato bokambaka oko esika la bomongo, ikaumomo la ngumba loka lofofo lokauma felo ibo. ²⁵ Tambile ee inati lotiyo, akaya elo embe bo akakola okenda ta libande lifi. ²⁶ Ekaenaka baeki mbo atokenda ta libande lifi, bamamba la bowa fafo, bo mbo imbe ende bolimo! ta bowa wibo, bakamama fafo. ²⁷ Yesu akabeka libo: Imbei, mbakai la bofilili, oibangakai! ²⁸ Petelo aka binoiselae ye mbo: Ngene, yomba mbo imbowe, fekei ishosha loye felo yao likolo li baye. ²⁹ Ye mbo, yokoo! Petelo akatomowa ta wato la akakenda likolo li- baye la akaya felo iya Yesu. ³⁰ La ekaenakae mbo lofofo lombe lofi, akabanga, la akakola olinda, akamama mbo: Ngene! uwisekei! ³¹ Mangu mangu, Yesu akaila boo winde la akaundae, akabeka linde: buto a limeli liki kelike, loka loingi otowa fiye? ³² Bakaota ta wato, la lofofo lokasila. ³³ Beke bambaka ta wato, baka suluwelae se, bo mbo: wéwé ombe wana aya Mungu. ³⁴ Mbisa ibo ii yolekisa fangi ene moi, bakakoma ta boki bo Genesaleta. ³⁵ Baito ba eseke lamo, bakaluwa Yesu, bakatoma buendi biseke bitotina, la bakaya la baito batotina beke bambaka la biale. ³⁶ Bakalengila linde mbo baunde tunga ee tulu inde. Beke baundaka bakauwisomo.