¹ Ta mbile Yesu asuluwakata longo, baito likama batutaka ye. ² La enakai, buto a baandi akaya akauma baluwi felo inde, akabeka: Ngene, yo'omba mbo osami, okotanisei la okouwisei. ³ Yesu akaila boo likolo, akauwana linde, la akabeka: Losami, atanisomoko. La mangu akatanisomo la baandi binde. ⁴ La Yesu akabeka linde: La oibekaka ango la buto amoi; la kaaka okaenise kanga iya Mungu, enisaka lifaefi kee liya Mose lieke aemalaka, kola ongoma yamo imboenisomoko. ⁵ Kee ani Yesu aotaka ta Kapelanaume, bokota bomoi bokasombola ye, ⁶ akasombola la akabeka: Ngene, buto ange a likuwa aokpa ilo ta mbele, aitokenda ale ato'oka wale bo likama. ⁷ Yesu akabeka linde: Bokota, la etokomei elamo lotouwisa ye. ⁸ Bokota wo bokabeka: Ngene, loiyengani mbo o'ote ta sekala ii losambu lange; la bekaka ango lioi limoi, la buto ange a likuwa atouwa. ⁹ La mbo, ei lombe aleko la basola sekala yange; la lotobeka la amoi: Kaaka! La atoka; la asiya: Yo'oko! La atoya; la buto ange a likuwa: Kelaka ani! La atokela. ¹⁰ Mbisa iyo'oka, Yesu ambaka la limoali, la akabeka labe batutaka ye: Lotobeka lino wewe, ango ta Yelusaleme loiyanyi ango liimeli limoi lifi-lifi. ¹¹ Mbo, lotobeka lino mbo baito likama batoya ta etomoelo lo lowa la basiya ta elalelo lo lowa, la batomba eseke lomoi ta mesa la Abalayama, Isaka la Yakobo, ta bokota bo bose. ¹² Kola ongoma bana baya bokota batokusomo ta lilima lousa, elamo itomba la bileli la baino obunekeya. ¹³ La ongoma Yesu akabeka la bokota bo basola: Kaaka, ikelomowe oengana la liimelo liao. Kota mbile amo buto a likuwa akauwa. ¹⁴ Yesu akaka lisiya ta mbele eya Petelo, ndjo aenaka bobili botaali alali se ambe la bomusi. ¹⁵ Akauwa la boo winde, la bomusi bokafowa; la akaemala, la akatukumaela ye. ¹⁶ La likolase, bakatoela Yesu belimo bebe likama. La akashaya belimo la lioi linde, akauwisa baito batotina ba bemusi. ¹⁷ La mbo aenganise yeke ibekomoko la Isaya, bonangoli: Akaosa bemusi biso, la akaemaela biale biso. ¹⁸ Yesu, la baito ba likama pembeni inde, akaesa ndole mbo baete fangi esiya ee pembeni ii baye ba Galilai. ¹⁹ Bosoni bo kasa bomoi akasusama, la akabeka linde: Boekesi lototutowe biseke bitotina bie otoka. ²⁰ Yesu akamutoela ye: Ngaa imbe la biseke, ango noli ii lobola imbe la ndowe; kola ongoma Wana a Buto aiti ango la eseke lo'opemisa bochwe. ²¹ Amoi, aiteni ii baeki, akabeka linde: Ngene, fayekei koni fofe loke okasiliya ise ange. ²² Kola ongoma Yesu akabeka linde: Tutekei, la tikaka bangbei baseliomo la'ange. ²³ Akalila ta lisuwa, la baeki binde bakatuta ye. ²⁴ La moilakai, aemalaka likolo li baye lofofo lomoi lofi-lofi mbo lisuwa liunndukamaka. La ye, ambe ta ilo. ²⁵ Baeki bakasoma la bakalingisa ye, la batobeka: Ngene, Sungeke'su, tolangi ongba! ²⁶ Akabeka libo: Loka loingi ombei la bowa, baito ba liimeli like? Ongoma akaemala akamamela lofofo la ngumba, la kimia ekamba talibande. ²⁷ Bee baito bamwalaka: Ono ambe ase ndai, ebekaka bo, ambe ye ono lofofo la baye bakalitisa ye? ²⁸ Mbile ekomaka ye fangi ee baele, ta boki boko Gadalene, belimo bebe biele, bekafowa bekakpase felo inde. Bambaka la lobango mbo buto ango amoi ndoengana oeta la onga. ²⁹ Moilakai, bakamama: Ndai ambe aiteni iso la owe, Wana aya Mungu? Oye'ke loko loka'loenyelisatepelo felo yao? ³⁰ Imbaka esika libo ekukelo lo bana ba ngulube osukumomo. ³¹ Belimo bebe bekasombola Yesu, obeka: Yomba mbo otoshaye'su, tomeke'su ta engaelo lo bana ba ngulube. ³² Akabeka libo: Kakai! Batofoya la bato'ota aiteni ii bana ba ngulube. La moilakai, bikukelo bitotina bitoka la manhu ta libande lifi, la batongba ta baye. ³³ Beke bauwomoko batokimbiya, la batoka mangu ta boki bofi obeka ye itotina ikaeta la ye bakaena la yeke itotina ikomelaka belimo bebe. ³⁴ Kola ongoma boki bofi bokatomowa oya'anyamana la Yesu; kembo baene ye, bakabeka linde mbo afowe ta ekende libo lo boki.