¹ Tikaka losambiso, loka mbo oisambisomoko ango mala emoi. ² Loka mbo batosambise'nu lisambisomu lieke osambisakai, la batokote'nu la lokoto leke okotakai. ³ Loka loingi oto'ena ngoto ta liso liya ao, la aimbo'anya ango lilo lie limbe ta liso? ⁴ La ongoma otobekala nduku ao: Tikekei lofoye ngoto ta liso liao; owe ono ombe la lilo ta liso? ⁵ Buto a lolanga, foyaka koni mala emoi lilo ta liso lao. La otoena ongoma ofoye lilo ta liso liya nduku ao. ⁶ Oifayaka ngba bieka bitanu, la oikuselaka ngulube bieka felo, la mangu batomatekela bio la benoko bibo, bakikowe la babinoise la baimbo faa. ⁷ Lengilakai, la batofaya lino; lukakai, la oto'anyai; umakai, la batofungolele'nu. ⁸ Ndai ono atolengila ato'anya, ono atoluka ato'anya, la batofungola ambe ono atouma. ⁹ Amoi ino atofa wana inde lisase, ani wana oko akalengilaka bokati? ¹⁰ La, aolengila suwe, akofayomo fele? ¹¹ Kola ongoma, la yenisa ani embe'nu, oluwii ofoya baito bieka bilo ambe bana bino, koeta mala yanga oengana la Ise ino ambe ta bose atofayomo bieke beieka bilo ambe bee bakalengila ye. ¹² Itotina ye ombe la yeme mbo baito bakele loka lao, kelaka yo namuna emoi loka libo, loka mbo imbe ekela la banangoli. ¹³ akaota ta boinda bo bokamu. Ta mbo boinda bombaka bofi, ndole elo-elo etotola ta libungisomu, la baito babule bato'ota la boinda wamo. ¹⁴ La boinda bo bokamu, wamo ndjo bototolowe ta ndole ee liuwisi, imbe ango iniyo bee bato'ota. ¹⁵ Kukakai banangoli ba lolanga. Bamboya ambe'nu la tulu ii bana ba bekoko, la aiteni ibo imbe nama ii bokale. ¹⁶ Omboluwakai bo la touma. Tombotchwakai likolo li keke, la fangi ongoma mbo? ¹⁷ Isandu itotina ilo-ilo imbe la touma tolo-tolo, la isandu ibe-ibe imbe la touma tobe. ¹⁸ Isandu ilo-ilo yeimbotola touma tobe, ango isandu ibe-ibe ndotola touma tobe. ¹⁹ Tosandu tototina chweke toitoesa touma tolo iyotenomo la lokuso ta imbé. ²⁰ Loka mbo touma chwibo ndjo okaluwai tcho. ²¹ Beke batobeka lange: Ngene, Ngene! Baitomba bo batotina ta bokota boya Mungu, la ongoma ye angene atokela oengana la bofono boya Afa ange ono ambe ta bose. ²² Babule ta lisiyo liamo batobeka: Ngene, Ngene, toikanangola la lina liao? Toikafoya belimo bebe la lina liao? Toikakela tokesa la lina liao? ²³ La lokabeka libo fololo: Leiluwi enu, fowakai tina lange, enu bakeli ba bobe. ²⁴ Loka loingi, ono ato'oka bee baoi lotobeka la atokuwela bo, atomba eseke lomoi la buto a weli ono ashwaka mbele inde likolo li litale. ²⁵ Ndjaluke eyakase, la fofo ikaya ikakusama ta ene mbele: Mbele eibunei, loka mbo eshwomo ta litale. ²⁶ La buto la buto ono ato'oka baoi bange la aitolitisa bo aengani la buto a ebebe ono akashwa mbele likolo li nyele ii botchanga. ²⁷ Ndjaluke ekaya se, lofofo lokaya la lokananisa ene mbele: Mbele ekabuneya, lokambo kutu imbaka ifi-ifi. ²⁸ Mbisa iya Yesu osilisa baoi, la baito babule baumomoko la baoi binde; ²⁹ ta mbile e'ekisaka ye kee bokota, la ndomba kee bo'soni.