¹ Yesu akabeka aleko la baeki mbo: Buto amoi a bakute likama la boemali bo likuwa, boemali wamo akositokomo ambe ye mbo atoseisa bibongo bindebule. ² Akata ye lioi, akabeka linde mbo: Ini mbeko loto'oka loka lo litina liao? Yo'oko oyaesa mboli ii likuwa liao, loka mbo oiyengani ale omba boemaeli bo likuwa. ³ Boemaeli bo likuwa akabeka ta liwawi linde mbo: Lo'okela ingi? Lokambo ngene ange atofoyei ta likuwa lieyeke limbei boemaeli loiti la bofoka bo lubusho nyele, la lombe la bowa bo loanganyo. ⁴ Loluwi yeke itokelei, mbo kamba loka lo lofoyomo ta likuwa liange, baomale alnge aiteni ii mbele ibo aleko. ⁵ Akata bo beke bakambaka la belima beya ngene ibo, amoi la amoi, ongoma akabeka la ono a felo mbo, ombe la bolima boya ngene ange yange? ⁶ Akabeka mbo: Bandjandja mia ba baina, akabeka linde mbo: Osaka lokasa lao. Tiamisaka ye ifelo la andikaka kani tuku liondo. ⁷ La liko akabeka la asiya mbo: Owe aleko ombe la bolima bo yanga? Akabeka mbo: Iotunga mia emoi ee bakoke. Akabeka linde mbo: Osaka lokasa lao la sonaka tuku bonanei. ⁸ Ngene a bokuwi bo likuwa wamo bobe akaila ye likolo loka mbo aokela bolo. Bainenge ba basiyo bee basieta bainenge ba lowa la bieli aiteni ii befindi bibo aleko. ⁹ Ei aleko lo'obeka lino mbo: Osakai baito lino loka lino ta mboli ibe mbo lamba ikaosila, batukumaele enu aiteni ii bengaenelo be momongo. ¹⁰ Ono ambe la momongo ta lobeko loeti lokikelike ambe aleko lala momongo ta lobeko loeti la lokikelike la aiti aleko ta lobeko lofi. ¹¹ Kola ongoma yomba oiti la momongo ta mbeko ii bakute babe, ndai atoesa bakute ba'omongo ta baoo bino? ¹² Yomba mbo oiti la omongo ta bieka bi buto asiya, ndai atofe'nu yeke imbe loka lino? ¹³ Bokuwi aiyengani olitisa bangene baele; loka mbo otoiyana la amoi la ye kola ongoma onomoi, ao koto'amana la amoi la atoseola onomoi. Oengani ndjo olitisa Mungu tinga bakute. ¹⁴ Bafalisai beke basamaka bakute eokaka bo ye mbeko, la bakaseka Yesu. ¹⁵ Akabeka libo mbo: Enu otolongisomoi ta baiso ba baito, ndjo Mungu alembeli betema bino; loka yamo imbe bofi ta baito, ndjo imbe la lilo ta baiso baya Mungu. ¹⁶ Bikela bi banangoli bimbaka kota mbile eya Yoani, ndjo mbisa ii yamo Mboli Itanu ii Bokota Mungu itonangolomo la baito batotina bafo'otisa yo la bofoka. ¹⁷ Lokpose lo likoi limoi li ekela ifoeta lolimowo lo lobola la nyele la bofoka. ¹⁸ Botolome la botolome ono akafoya boali inde ekosonga botaali asiya, atokela bosambo; la botolome ono atosonga botaali ono akaofoyomo ta botolo asiya, atokela bosambo. ¹⁹ Buto amoi ambaka lifoka, la abataka tulu enenu elo, la aomalaka lisiyo la lisiyo la lieti lilo. ²⁰ La ibube imoi, lina linde mbo Lasalo, alalisomoko ta boinda winde, bindo binde bimbaka la bafwa. ²¹ Ambaka la yeme iyosilisa ango semba inde ta mbumbusi yeke imbaka itokpase ta mesa eya lifoka; ndjo ngea imbaka itolauna bafwa binde. ²² Ibube akangba la akatolomo la bakitomo ta bokuku boya Abalayama. Buto a lifoka aleko akangba, la akaseliomo. ²³ Ambaka ta bomusi ta eseke lo bangbei, akaila baiso binde la akaena Abalayama esika, la Lasalo ta bokuku winde. ²⁴ Ye akata mbo: Afa Abalayama! Okelekei ngandi! Tomaka Lasalo ate yombo ii inekele inde ta baye la aunde ango lolame lange loka ta bomusi likama ta imbé ye. ²⁵ Ndjo Abalayama akabeka linde mbo: Wana, enyelaka mbo o'oshaka mbeko yao ilo ta liwawi liao, kola ongoma aleko Lasalo aoshaka mbeko ibe; ndjo kanikani aofomo bofoka la owe ofo'oka bomusi. ²⁶ Lisiya aleko mbo katikati ii liso lino likemba lifi limbe, ndjo beke bambe la yeme iyofoka eke loka elo embe'nu, baitoengana, baiyengani aleko olekisa fangi ene embesu. ²⁷ Akabeka mbo: Kola ongoma, Afa, lo'olengila lao mbo otome ango ye elo ta mbele eya Ise ange, ²⁸ loka lombe la banduku batolome liondo, loka baiyaka eke ta eseke lo bomosi. ²⁹ Abalayama akabeka mbo: Bambe la kasa iya Mose la banangoli, tikaka mbo baoke bo. ³⁰ Ndjo akabeka mbo: Tinga alo, Afa Abalayama, yomba mbo buto amoi atofowa ta bangbei loko elo embe bo, batokikolia betema. ³¹ Ndjo akabeka linde mbo: Yomba mbo baiyoki Mose, la banangoli, baimboimila aleko imbe ende mbo buto amoi ta bangbei atoyayowa.