¹ Basondji ba bakute be wenda, la baito ba bobe bakambaka bo atotina loyo ambe Yesu loka lo'okaye. ² La Bafalisai la basoni kasa bakambaka lobeko mbeko iniyo iniyo mbisa inde likama mbo: Buto ono afo'omala loyambo baito bobe la ongoma atolala libo bieka eseke lomoi. ³ Akabeka libo bombila we mbo: ⁴ Lamba buto amoi ino ambe la bekoko mia, ongoma bomoi ibo bokaobunga, atotika bo tuku libwa la libwa atiteni ii liombele, kola ongoma aitoka okalinga weke bokabunga kombile eto'osha ye wamo? ⁵ Ekaosila o'osha ye wamo, atota wo ta batoto binde la liomali, ⁶ ongoma etoinowa ye ta mbile atosela bee amoi la basiya, kola ongoma atobeka libo mbo: Omalakai lange, loka mbo losi'osha bokoko wange we bokabungaka. ⁷ Lo'obeka lino mbo:Ongoma liomali litongala atiteni ii lobola loka lo buto amoi a bobe ono atokikolia liwawi itoeta liomali loka lo baengani tuku libwa la libwa beke baiti la yeme iyokikolia botema. ⁸ Lisiya lamba botaali amoi ambe la touma to bakute liou, lamba aleko atokomya yuma imoi, ato'sa lopambolo tala la lo'ombo mbele la atolukaluka kota mbile ene ye aitoanya? ⁹ Ekaosila ye lo'anyo, atongalisa baito linde la kendisani inde, la atobeka mbo: Omalaka lange, lokambo lofoanya yuma yeka akabungaka. ¹⁰ Lo'obeka lino mbo: Liomali litomba ongoma aiteni ii bakitomo baya Mungu loka lo buto amoi ono a bobe ono akakikolia botema. ¹¹ Atobeka loka mbo: Buto amoi akambaka la bana batolome baele. ¹² Ono a mbisa aiteni ibo akabeka la ise inde mbo: Afa, fekei iniyo ii bibongo bitoengana lange. Aka anela bo bibongo binde. ¹³ La liko li basiyo iniyo ango, wana a liko akakanda bibongo bitotina, ongoma akaka ta boki bosiya bo esika, la akaseisa bibongo binde oko ekaka ye ta lokendo la baenyeli baike. ¹⁴ Oko esilaka ye bibongo binde bitotina, semba efi aleko ekatomowa ta boki wamo, ye aleko aka'akola lotchango bibongo. ¹⁵ Kola ongoma akaka la aka'anya likuwa ambe buto a boki bo wenda wamo, la akatoma ye ta bilanga binde loka lo loleso nama ikumo ngulube. ¹⁶ Akamba la yeme ii lowaliso solo inde la mbso yeke nama ikumo ngulube batola, la buto aikafayaka ye ango leka. ¹⁷ Aka enyela ta liwawi la abeka mbo: Bakuwi ba lilipomu baya ise ange likama bambe la beila beike. Kani ei lo'ongba la semba eke. ¹⁸ Lotofowa la lotoka ambe ise ange, ongoma lotobeka linde mbo: Afa, lo'okelela lobola bobe, lo'okela bobe ta baiso bao, ¹⁹ loiyengani ale otomo wana ao lisiya, selekei kee amoi a bakuwi bao ba lipimomu. ²⁰ Akafowa, la akakoma ambe ise ende aleko. Kola ongoma la ani akombe esika, ise akaena ye la akaokela ye ngandi; akaka mangu la akatukumaela ye la akaloma ye likeka ani ongoma imbe ndembe ee losamo. ²¹ Wana inde aleko akabeka linde mbo: Afa lo'okela bobe ambe lobola, la lo'okela aleko bobe ta baiso bao, loiyengani ale lotomo wana ao lisiya. ²² Afa aleko akabeka la bekowa binde mbo: Yokoi la tulu ene e'eti itotina la bolo kani kani lotobatisa ye, la taka ye ikomo ii loketi ta inekele, ongoma batisaka ye aleko lipapa ta bakolo binde, ²³ kola ongoma yokoi la wana a bokoko ono ambe la baina la ongoma itakai wo, loka tole, la to'omale, ²⁴ lokambo wana ange ono eke akambaka boliyo ongoma akombe la liwawi lisiya: Akambaka bobungi ongoma afoenena. Baka'akola lo'omalo onga. ²⁵ Ongoma wana inde a felo-felo akambaka ta mbele akaoka be'ele la lobilo lo bisha. ²⁶ Akata amoi a bakuwi ambe ye, la akaiyola ye lamba ini mbeko yeke itoeta imbe ini. ²⁷ Ye aleko akabeisa ye mbo: Nduku ao aoya, ongoma ise ao akaita wana a bokoko a baina loka mbo asio'anya ye la bindo bi bofoka. ²⁸ Akaokalisomi aikalanga lo'oto, kola ongoma ise inde akatomowa la akasombolela ye. ²⁹ Ye aleko akainoisa bonoko mbo: Enyelaka mbo lo'okelelo we miaka likama ani, nla loikafeka bonoko wao ango lisiyo. Ongoma oikafei ango wana a bokoko ango mbile emoi lokambo lo'omale la baito lange, ³⁰ kola ongoma eke akaya wana ao, ono akaosilisa bibongo la bataali ba belefe, osi'itela ye wana a bokoko bo baina. ³¹ Ye aleko akabeka li nde mbo: Wana, owe ombe lange eseke lomoi mbile itotina, la ongoma bibongo biangebitotina bimbe biao. ³² Kani ekaengana mbo to'omale la tongale la liomali lokambo nduku ao ono akambaka boliyon la ongoma akombe la liwawi lisiya, ambe bobinoi la asioshamana.