¹ Akabeka la baeki binde mbo, Bakulia baitoeno, ndjo ndjo ngandi la ono atoesa yo; ² yomba mbo atoumisa amoi ta beke bake likulia, iyengani linde mbo litali lifi likandomoko ta ngingo inde la akusomoko ta libande lifi. ³ Kebakai lino! yomba kembo nduku ao aokela bobe, mamilaka ye. Yomba mbo atokikolia botema, mesilaka ye. ⁴ Imbe ende mboaokelelo we bobe mala bosambale ta lisiyo limoi, la ekoya ambowe mala bosambaele obeka mbo, lokosa; mesilekei, oengani omesila ye. ⁵ Batomomu bakabeka la Ngene mbo, talielekesu limeli. ⁶ Ngene akabeka libo mbo, yomba kembo otombai la limeli kee yuma i botshitsha, ani oengani obeka la isandu yeke mbo, yolomoko la lobomoko ta baye, la itolitisenu. ⁷ Yomba kembo amoi inoambe la bokowa ono atobusha nyele lamba atokuka bokoko, la bokowa atofoa ta elanga oota t mbele, atobeka linde mbo, Yooko mangu ongala ta mesa? ⁸ Ndjo aitobeka linde ani mbo; Komanyaka bieka biange biola, bataka tulu, la fekei bieka tii kani etosilei ola la lomwo; lambisa otoola la otomwa aleko. ⁹ Atofa bokowa kelekele loka aokela likuwa lieke libekakaye? ¹⁰ Kolaongoma enu aleko, yomba mbo osilai okela mbeko itotina yeke ika bekelomo enu, bekaka mbo, toiti bekowa belo, tosila okela lotomo liso. ¹¹ Oko embaka Yesu atoka ta Yelusaleme, akaeta katikati i Samalia la Galilai. ¹² Ekambaka ye atoota ta boki bomoi,batolome liou ba baandi bakatoamna linde. Bakaemala esika. ¹³ Bababeka mbo, Yesu! Ngene! Okelekesu ngandi. ¹⁴ Akamoila bo la akabeka libo mbo, kakai okaenisa bakanga bindo bino. Ekaka bo, bakatanisomo. ¹⁵ Amoiibo ekaenaka yeafouwa, akabinowa la akasimolla Mungu la limiki lifi. ¹⁶ Akasulua ta bombo winde ta bakolo baya Yesu la akafa ye kelekele. Yeambaka Mosamalia. ¹⁷ Yesu akabeka mbo, baito liou baitanisomu? Libwa bambe endei? ¹⁸ Buto asiya aibinoi oyafa Mungu kelekele, sakolo ko we boenda? ¹⁹ Akabeka linde mbo, emalaka, la kaaka eyao. Limeli liao liosila ouwiso we. ²⁰ Bafalisai bakaiyola ye lamba Bokota boya Mungu botoya ta eni mbile, la akabinoisela bo mbo, Bokota boya Mungu boitoya ta bofono weke otomoilai. ²¹ Baimbo beka mbo, tene owe! lamba mbo, Tene oye elo! Lokambo Bokta boya Mungu bombe katikati ino. ²² Akabeka la baeki binde mbo, basiyo batoya eko etombenu la yeme iyoena lisiyo limoi ta basiyo ba Wana a buto, ndjo oitoenai yo. ²³ Batobeka lino mbo, Tene ye ete! Tene ye ono! Ndo tutai bo. ²⁴ Loka kee ani etobana ikalikali, itobana ta fangi e likolo kota fangi esiya, etomba lisiyo li Wana a buto ongoma. ²⁵ Ndjo iyengani koni linde felo oena wale ta mbeko likama, la ofekomo ta we bofindi. ²⁶ Kanda emoi ta basiyo baya Noa, itomba ongoma ta basiyo baya Wana a buto. ²⁷ Bambaka batola, batomwa, bakasonga, baka songamana, tii kota lisiyo liotaka Noa ta lisuwa, la fela ekaya oyaita boatotina. ²⁸ Lisiya kanda emoi ta basiyo baya Lota, balaka, bakamwa, bakasomba, bakaungisa, bakaloba, bakashwa, ²⁹ ndjo ta lisiyo lifoaka Loti ta Sodomo, litundulundu li imbe li likolo likayase la ikaita bo batotina. ³⁰ Itomba kee ye mbeko ta lisiyo litoenena Wana a buto. ³¹ Ta lisiyo liamo, ono atomba ta bosambu bo mbele, la biengo binde ta mbele, aitosulua oosa yo; kolaongoma ono ambe ta bilanga aimbo binoa ale. ³² Enyelaka boali aya Lota. ³³ Yomba mbo oni buto atota botema winde okuka liwawi linde, atoseisa yo; ndjo ono atoseisa liyo, ye ndjo atokuka. ³⁴ Lobeka lino mbo ta lotiyo lamo baito baele batomba ta litamba limoi, amoi atosomo la asiya ato tikala. ³⁵ Baito baele batomba ta bilanga, amoi atosomo la asiya atotikala. ³⁷ Bakabinoisela ye mbo, Ngene ambe Endei? Ye akabeka libo mbo, eseke lombe boliyo, oko ndjo etotoamana ndjou.