¹ Mbisa iyo, Ngene akatchakola aleko baeki tuku liambe, la akatoma bo baele baele felo inde ta beki befi betotina, la ta bilela bitotina bie asamaka loko. ² Akabeka libo mbo: Ɛula lombe lofi, kolaongoma bakuwi bambe bake, totolelikiela Ngene a ɛula mbo atome bakuwi ta ɛula. ³ Kakai lokendo; tene, lo'otome'nu kee bekoko felo ii koi. ⁴ Oitolakai ango tulu, kee litanga, kee bilato, la oifakai boto samo ao kalibo ta ndole. ⁵ Ta mbele isiya ye ot'otai, bekekei koni mbo: Ɛyai lombeke koni ta ene mbele. ⁶ Yomba mbo imbe la wana, a ɛyai, ɛyai lao lombeke ambe ye, yeiti alo, lokoinowa ambe'nu. ⁷ Ngalakai ta elo mbele elo, mwakai bieke bitofomo'nu; loka bakuwi baengani la bosombo, oiyotakai ta mbele la mbele. ⁸ Ta beki befi bemoi bie bito'otenu, la oko batonyangele'nu, lakai bieka bie batofe'nu, ⁹ uwisakai baito ba biale beke otoanyai, la bekakai libo mbo: Bokota boya Mungu bombe tina lino. ¹⁰ Kola ongoma ta beki befi besiya bie bieito'ote'nu, bainyangeli'enu, ka-akai ta ndole, bekakai mbo: ¹¹ To'ofufola ambe'nu ango nyele ii boki ye imbe ta batindi biso, la oluwei mbo bokota boya Mungu bombe tina. ¹² La lobekile'nu mbo lobeko lo Sodomo lotomba la bofoka lamo kee tinga lo boki wamo. ¹³ Ngandi lao Kolaji! Ngandi lao Betesaida! Loka mbo lamba bakuwa ba bofoka baokelomo katikati ino bakuwa bakelomoko ta Tula la Sidona, ndjo ani bakikoliaka betema esiyo, la bangbalaka .... la buta bo imbe. ¹⁴ Lisiya lokambo lo Tula la Sidona itomba bofoka ta mbile ee losambisomo le loiti lino. ¹⁵ Owe aleko Kapelanauma! Otoilama la likolo? Oto, otosuluwa ta eseke lo bangbei. ¹⁶ Ono ato'okenu ato'okei, la ono akambwelenu aosabwelei aleko; ndjo ono akasambwelei aosambwela botonomu wange. ¹⁷ Bo tuku bosambale bainowaka la liomali, la babekaka mbo: Ngene, ango bellimo bebe baolitisa esu loka lo lina liayo. ¹⁸ Abekaka libo mbo: Lokaenaka Satana lokpose la likolo kee ikalikali. ¹⁹ Tene, lo'osila ofe'nu bokota bo lomatelo fele la tokpakpa, la bokota felo ii tala iya bokota wamo, la leka ango lomoi loimbo okisa enu wale. ²⁰ Ango ongoma, oiyomalakai yeke mbo belimo beolitisa enu, ndjo omalakai mbo baina bino baosila osonomo ete likolo. ²¹ Ta mbile amo aomalaka la Bolimo Botanu, la abakaka mbo: Afa, Ngene a lobola la sekala, lo'osimolowe mbo ofoisa mbeko ii baito ba weli la baito ba loenyelo, la ofoenisa ambe bana bakikelike. Ko'ongoma Afa, loka mbo ifo'omaliso we ko'ongoma. ²² Bieka bitotina bifayomoko ei kola ise ange, la buto ailuwi ndai ambe Wana, Yeiti ko Afa, ndai aluwi Afa yeiti ko Wana la ono Wana alangi oenisa ye. ²³ La akakikowa ambe Baeki, akabeka ta Buto la buto mbo: Liomali ta baiso be bakaena yeke okaenai! ²⁴ Loka lobeka lino mbo betondoli likama la bekota bambe layeme ioena ye' enu okaenai la baikaena, la ooka ye itoke'nu, la baiyoki 'yo. ²⁵ Boekesi amoi a bikela akaemala, la akabeka la Yesu, loka lookota ye mbo:Boekesi lowe, isani loka looshe liwawi li layaya? ²⁶ Yesu akabeka linde: Ini isonomu ta lokasa lo bikela? Otangei isani ta yamo? ²⁷ Akamutola mbo: Otosama Ngene, Mungu ao, ta botema wao bototina, ta bolimo wao bototina, ta bofoka wao bototina, la baenyeli bao batotina, la otosama bochaki lao lani esamiowe angene. ²⁸ Yesu akabekela ye, limutoli liao limbe lilo; waka ongoma, la otouwa. ²⁹ Ndjo ye, akalinga mbo alonge, la akabeka la Yesu: Ndai ambe nduku ange? ³⁰ Yesu akabinoisela ye baoi, la akabeka mbo: Buto atofowa ta Yelusaleme atoka ta Yeliko. Akaoshamana la baito ba liyeye, bakafoya ye tulu, bakakucha ye, bakatika ye tinatina la lingba. ³¹ Kanga emoi akaeta kotandole amo, akaena buto ono, akaeta fangi esiya. ³² Molewi amoi, aka koma aleko ta eseke lamo, akafafa ndole. ³³ Lisiolie limoi Musamaliya amoi ambe ta lokendo linde, ekomakae onga, akaokela ye ngandi ani aenaka ye. ³⁴ Akaya tina linde, la akakanda bafwa binde, la loutoko ye baina la baana la akatola ye tiii kota eseke lo liuwisi, la akaosha liuwisi. ³⁵ La nongo, akaosha falanga yele akafa bouwesi uwiselekei ye, la imba mbo isietela, lotofowe falanga isiya ta lobinoo lange. ³⁶ Ndai ta bo basaso aengani omba bosamomu boya ono bokutchomu ta bao ba baito baliyeye? ³⁷ Boekesi akamutola mbo: Ko'ono akakelela buto bolo, kola ongoma Yesu akabeka mbo: Akaaka la kelaka ongoma lisiya. ³⁸ Oko ekaka Yesu ta ndole la baeki binde, akaota ta boki bomoi bokikelike, la botaali amoi, ako Malata, akanyengela ye ta mbele inde. ³⁹ Malata ambaka la etungani linde ako Maliya angalakase ta bakolo baya Ngene, loka aoke baoi baya Yesu. ⁴⁰ Malata aka'angaika loka lo bakuwa likama, akaemala felo inde, akabeka mbo: Ngene, otoena tale mbo etungani lange atikei eiyangene lokomanye bieka? Bekelaka ye aya sungei. ⁴¹ Ngene akamutola ye mbo: Malata, Malata, otowangaika la loto baenyeli ta mbeko likama. ⁴² Leka ango lomoi lombe la litina. Maliya asiosa leka lolo le loiti la kanda eosela ye.