¹ Yesu akatoamanisa Baliou la baele la akafa bo bofoka la ishosha likolo li baloimo babe, la ouwisa biale betotina. ² Akatoma bo bake okanangola Bokota bo likolo boya Mungu, la louwiso biale. ³ Akabeka libo mbo, oiyosakai leka ango lomoi loka lo lokendo, imbe itumbo, imbe litanga, imbe boila, imbe falanga,lamba tulu yele. ⁴ Yomba mbo otootai ta eni mbele,ngalakai onga; tii kani embokekenu. ⁵ Loka lo beke baitotukumaelenu, oko embo foekenu ta boki wamo, kusakai bouta bo bakolo bino loka lokebisa -bo. ⁶ Bakafoa onga la bakaeta ta beki beke la bakanangola Mboli itanu la bakauwisa fangi la fangi. ⁷ Ekaokaka Bokota Elode ye mbeko itotina etomoaka, akakendisa baenyeli likama loka basiya bakabeka mbo Yoani aofufuka ta lingba, ⁸ La basiya mbo Eliya aotomowa, la basiya mbo amoi ta Banagoli ba kwala aofufuka. ⁹ Elode akabeka mbo, ei lotenaka Yoani botchwé, la ono ambe ndai lotooka ye mbeko ta litna linde? La akalinga ndole eona ye. ¹⁰ Batomomu bakabinowa la bakabeisa ye mbeko itotina yeke bakelaka. Akaosa bo la akaka, ko bo ta bokibomoi la lina mbo Betesaida. ¹¹ Ndjo ekalembelaka linginda ongoma, bakatuta ye. Akatukumaela bo la akasumulia libi lobeko lo Bokota boya Mungu, la akauwisa beke bambaka la yeme iyouwa. ¹² Eko esuluwaka lowa, Baliou la baele bakaya linde la bakabeka linde mbo, faka linginda fofe mbo bake ta boki boke la mbele fangi la fangi loka lolalase la ola, loka mbo eke tombe ta lokpangebe. ¹³ Ndjo akabeka libo mbo, Enu fakai bo bieka biola. Bobalabeka mbo, Toiti la bieka bisiya sakolo ko beila liondo la suwe yele, ambo tokaoka oka sembela baito batotina bieka. ¹⁴ Loka mbo batolome bambaka lamba elefu liondo.Akabeka la Baeki binde mbo, ngalisaka bo ta belenga tuku liondo tuku liondo. ¹⁵ Bakakela ongoma la bakangalisa baito batotina. ¹⁶ Akaosa beila biamo liondo la suwe yamo yele, la akamoila la likolo la akautchela- yo la akabuna- yo. Kolaongoma akafa yo la Baeki loka bate yo felo i linginda. ¹⁷ Bakala la baito batotina bakakuma soolo. La bakasondja tochunga liou la yele ta bikende bieke bitikalaka. ¹⁸ Oko embaka Yesu atosombola koye angene, baeki binde bambaka linde eseke lomoi, la akaiyola bo bo, Baito baatobeka kono mbo lombe ndai? ¹⁹ Bakabinoisela ye bonoko mbo, Yoani bolufi; basiya mbo Eliya; la Basya mbo amoi ta Banangoli ba kwala aofufuka. ²⁰ Ndjo akabeka libo mbo, Enu ase otobekai mbo lombe ndai? Petelo akabinoisa bonoko mbo, Kilisito a Mungu. ²¹ Akakebesa bo la akalaka libo mbo baibeisaka buto ango amoi, ²² La akabeka mbo, iyondu la Wana a buto oena wale ta mbeko lokama,la ofekomo la batolioso ba boki, loitomo la ofufuka ta lisio liasaso. ²³ Akabeka aleko libo batotina mbo, ono ambe la yeme iyokenda mbisa yange, tikaka mbo afeke koni engene, la aose lieka linde lisiyo la lisiyo, la atutekei. ²⁴ Loka mbo ono ambe la yeme iyouwisa liwawi linde, atoseisa yo; la oni buto atoseisa liwawi linde loka lange, ye ndjo atouwisa amo. ²⁵ Ono atoosa wenda bototina atoseisa yomba mbo akaosesela atomba la lini ltina? ²⁶ Loka mbo onu buto atooka sooni ta baoi bange, Wana a buto ambokelaka alekoye sooni oko etoya ye ta talaa inde, la Ise inde, la bakitomo batanu. ²⁷ Ndjo ltobeka lino wéwé mbo bamoi bibo baemali eke batoena lingba tikani etoena bo Bokota boya Mungu. ²⁸ Basiyo lamba bonanei mbisa i baoi be, akaosa Petelo la Yoani l Yakobo la akalila ta longo loka losombola. ²⁹ Ekambaka ye atosombola, bomuna winde bo bombo bokakikowa,la tulu inde ikangenga la bofufou. ³⁰ Batolomé baele bambaka batobekana linde, Mose la Eliya. ³¹ Bo bakaenena la talaa, la bambaka batobeka ta litomoi linde ye ikalingo oenganisa ye ta Yelusaleme. ³² Baiso ba Bapetelo bembaka la ilo, bakafowa la bakaena tala inde la batolomé bamo baele beke baemalaka linde eseke lomoi. ³³ Oko eyananaka bo linde, Petelo akabeka la Yesu mbo, Boekesi, iyengani liso ongala eke, la ifondo mbo tokele bambau basaso, emoi loka lao, emoi loka loya Mose, la emoiloka loya Eliya. Akaluwa yeke itobeka ye. ³⁴ Ekambaka ye atobeka ye mbeko, lifita lakaya oyaufa bo, la bakamba la bowa oko eotaka bo ta lifita. ³⁵ Limiki likatomoa ta lifita mbo, Ono ambe Wana ange, Botshakolomu. Okakai ye! ³⁶ Mbisa i limiki obeka, Yesu akaenena ko engene. Bo bakangala hai, la ta mbile amo baikabeisa buto lobeko aango lomoi ta yeke baenaka. ³⁷ Ta lisiyo limbisa bakasulua ta lonngo, la likama li baito baka toamana linde. ³⁸ Botolome amoi ta linginda akamama likama mbo, Boekesi, lolengila lao, tene wanaange botolome, loka ambe wana koamoi ³⁹ Bolimo bobe atounda ye la mangu ye komama la ye kokusa ye la bolondi bokotomoa ye tabonoko, la mangu aitotika ye. ⁴⁰ Lolengilaka la baeki bao mbo batomoise ye ndjo baitilonga otomoisa ye. ⁴¹ Yesu akabinoisa bonoko mbo, Enu bofindi boiti la limeli la liseseli! Lombe lino la botema bosa koata eni mbile? Yoko la wana ao eke. ⁴² Eko ekambaka ye atoya, bolimo bobe akakusa ye ta nyele, la akakutsha ye. Ndjo Yesu aka mamila bolimo bobe wamo, la akauwisa wana la akafa ye la ise inde. ⁴³ Batotina bakamwala bofi boya Mungu. Oko embaka boya totina omwala ta mbeko yeke ikelaka ye, akabeka la baeki binde mbo, ⁴⁴ Enu takai batoi bino ta baoi be, loka mbo Wana a buto atofomo ta bao ba baito. ⁴⁵ Ndjo baitilembela litina li lobeko lamo. Isamelaka bo mbo bailuaka litina, la bakamba la bowa boiyola ye litina li lobeko lamo. ⁴⁶ Fiye ikatomoa katikati ibo lamba ndai aeti bofi. ⁴⁷ Yesu akalembela baenyeli ba botema wibo, la akaosa wainenge la akaemalisa ye fangi inde, ⁴⁸ la akabeka libo mbo, Lamba ndai atotukumaela wainenge ono la lina liange, lamba aleko ndai ato tukumaelei ao tuku maela Botomomu wange. Loka ono ambe boke ambenu ye oko ambe bofi. ⁴⁹ Yoani akabinoisa bonoko mbo, Boekedi, toene buto amoi atotomoisa belimo bebe la lina liao, la tokafekila ye loka mbo atotuta eseke lomoi liso. ⁵⁰ Yesu akabeka libo mbo, Oifekilakai ye, loka mbo atoemelenu ambe lino eseke lomoi. ⁵¹ Eko imbaka basiyo baya Yesu ake ta lobola ikaengana, akata bombo winde la bofilili oka ta Yelusaleme, ⁵² la akatoma Batomomu felo. Bakakoma ta boki bo Samalia loka bakomanyele ye eseke, ⁵³ ndjo baikatukumela ye loka akambaka atomoila ndole oka ta Yelusaleme. ⁵⁴ Ekaenaka baeki binde Yakobo la Yoani ongoma, bakabeka mbo Ngene, olangi mbo tote imbe ofoa ta lobola isuluwe la iite bo? ⁵⁵ Ndjo akakikowa akammila bo, ⁵⁶ la bakaka ta wenda bosiya. ⁵⁷ Oko embaka bo batokenda ta ndole, buto amoi akabeka linde mbo, yomba mbo otoka endei , lototutowe. ⁵⁸ Yesu akabeka linde mbo, nama iyokale imbe ta bakemba, la noli i lokonda bambe la ndowe,ndjo wana a buto aiti ango la eseke lota botswe. ⁵⁹ Akabeka la buto asiya mbo, Tutekei! Ye akabeka mbo, fekei koni ndole loke okaselia ise ange. ⁶⁰ Akabeka linde mbo, tikaka bangbei baselie bangbei lemo, ndjo owe kaka okanangola Bokota boya Mungu. ⁶¹ Buto asiya akabeka mbo, Ngene, lototutowe, ndjo tikekei koni lolakane la beke bambe ta mbele ango. ⁶² Yesu akabeka linde mbo, buto ono akata boo ta weli la atomoila la mbisa aiyengani la Bokota boya Mungu.