¹ Yesu ambaka atosombola ta eske lomoi,okoesilisaka ye, amoi ta Baeki akabeka linde mbo, Ngene, ekisekesu losombolo, ani ekisaka la Yoani Baeki binde. ² Akabeka libo bo, oko etosombolenu, bekakai mbo: Afa! lina liao limbe botanu,la bokta wao boye. ³ Feke'su boila boengani lisiyo la lisiyo; ⁴ Mesilekesu bobe wiso, loka esu totomesila aleko batotina beke bambe la bolima wiso. Oiyotisekesu ta bakoteli. ⁵ Akabeka libo lisiya mbo, yomba mbo amoi ino ambe la buto linde aokoma ambe ye katikati i lotiyo, la ekobeka linde mbo, buto lange, sungekei la beila besaso, ⁶ Loka buto lange asiya ambe ete embei ta lokendo, loiti la leka losela imbu felo inde. ⁷ Lambo eko binoisela ye limiki ta katikati e mbele mbo, Ndo kelei ito. Boinda bosila olikomo, la bana bange bambe lange ta litamba. Loiyengani ale otomowa loka lofo yo. ⁸ Lotobeka lino mbo imbe atotomoa lokalofa ye loka aimbaka nduku inde, atotomoa ofa linde itotina yeke ambe la yeme loka aiti la sooni. ⁹ Ei lotobeka lino mbo, lengilaka la itofomo lino. ¹⁰ Loka bolengeli la bolengeli atoanya, bolingi atoanya,la itolikolomo ta ono atouma. ¹¹ Yomba mbo wana aya moi ino atolengila suwe ambe ise nde, ekofa ye fele ta eseke lo suwe? ¹² Yomba mbo atolengila like, ekofa ye ikpakpa? ¹³ Kolaongoma yomba ombo enu baito babe baluwi ofa bana bibo baano balo, Afa iso a likolo aitofa Bolimo Botanu ta beke baka lengila? ¹⁴ Ambaka atofoya bolimo bobe.Bolimo wamo bombaka bo ebebe. Eko etomoaka bolimo bobe, ebebe akabeka la likama li baito bakamwala. ¹⁵ Bamoi bibo bakabeka mbo,aotomoisa bolimo bobe la bofoka boya Belejebula ngene a belimo bebe. ¹⁶ Ndjo basiya loka lokota ye, bakalengila ndembe eofowa tla likolo. ¹⁷ Eluaka ye baenyeli bibo, la akabeka libo mbo, Bokota la bokota we bokaosila owanana botoseisama, la mbele ene ekaowanana, etoukowa. ¹⁸ Yomba mbo Satana anani katikati inde, bokota winde botoemala kola isani? Loka obekai mbo lotomoisa bolimo bobe la bofoka boya Belejebula. ¹⁹ Yomba mbo ei lofoye belimo bebe la bofoka boya Belejebula, bana bino batomoise ase belimo bebe la bofoka boya ndai? Bo batomba batosambisesu. ²⁰ Yomba mbo lofoye belimo bebe la inekele iya Mungu, bokta boya Mungu botomoelenu. ²¹ Yomba mbo buto angbulu la nguya inde atokuka mbele inde, biengo bikukomu laweli. ²² Eko etoya buto asiya a ngbulu ono aeti ye la ngbulu, la ekobuna ye, eko foya nguwa inde yeke atelaka botema, la ekoana biengo binde. ²³ Ono aiti lange eseke lomoi atoemaelei, la ono aitokuka eseke lomoi lange atomeanisa. ²⁴ Tambile etofowa bolimo bobe ambe buto, atokendakenda ta biseke biomeli atolinga etchuelo lo liena; la eitoanya ye, ekobeka mbo,lotobinowa ta mbele elo ekatomoekei. ²⁵ Ekoyanya amo ekaosila ombomo la okomanyomo. ²⁶ Mbisa ekoka okaosa belimo bebe besiya bosambale beke baeti ye la bobe,bokota ongalase onga.Bomuna bo buto amo botomba la tale kooeta kanda ene efelo. ²⁷ Oko embaka ye atobeka mbeko ye,botaali amoi ta lingida akaila limiki, la akabeka linde mbo, liomali la soolo ene eka botowe la balomi beke bamwesoko'we. ²⁸ Ye akabeka mbo,liomali limbe ambe be bakaoka Lioi liya Mungu la baolitisa yo. ²⁹ Linginda li baito bekatikala ta litoamani, Yesu akakola obeka mbo, Bofindi we bombe bofindi bobe. Batolinga ndembe, la ndembe eimbofomo libo koene ndembe eya Yona. ³⁰ Kanda emoi ani embe Yoani ndembe ta baito ba Niniwe, ko ongoma aleko etomba wana a buto ndeme ta bofindi we. ³¹ Bokta botaali ta boki bo mbole atofufuka ta mbile e litenomu eseke lomoi la batolomé ba bofindi we, la atosuluwisa bo, loka mbo afoaka ta liko li boki oyaoka weli boya Solomo, tene, ono aeti Solomo ambe. ³² Batolomé ba Niniwe batoemala la we bofindi eseke lomoi ta litenomu la batosuluwisa bo, loka bakikole betema bibo ta inangoli iya Yona, tene buto ono akaeta Yona ambe. ³³ Buto ono akabanisa tala aimbota amo ta eseke loisami, ndjo atota amo likolo ta etelo lo tala loka beke batoota baene liangangi liamo. ³⁴ Liso liao limbe tala e bindo. Yomba mbo liso liyao limbe lilo, bindo biao bitotina bimbe lowa. Ikaomba bobe, la bindo biao bitotina bimbe lilima. ³⁵ Kebaka mbo lowa le lombe katikati ao liembaka lilima. ³⁶ Yomba mbo bindo biao bitotina la lowa, ndoenango iniyo i lilima, yamo itotina itomba la lowa kee tala ene etobana la liangangi . ³⁷ Oko embaka ye atobeka, Mofalisai amoi akata ye mbo bale bieka. Akaota la akala, ³⁸ la ekaenaka Mofalisai amo, akamwala mbo aola bieka ndo soola bao. ³⁹ Ndjo Ngene akabeka linde mbo, kanikai enu Bafalisai oto tanisai lousa lino la kopo la saani e baye, ndjo aiteni ino iwali la bolefe la bobe. ⁴⁰ Bibebe! ono akakela yo, imbe lousa, aika kela aleko la munga? ⁴¹ Fakai ndjo yeke imbelamunga kee liano li ngandi, la mangu bieka bitotina bino bimbe botanu. ⁴² Ndjo ngandi lino Bafalisai! loka mbo otoesai botuku bo liou endiosomo,la mpegana, la totaki tototina, la ototikai Lingani la losamo loya Mungu. Ikaenganaka lino okela koni liyengani la losamo loya Mungu la oeno okela mbeko isiya aleko. ⁴³ Ngandi lino bafalisai! loka mbo otolangai ko bingaelo bi lokuku ta bituanelo, la kalibo ta baongo. ⁴⁴ Ngandi lino! loka ombei kee mbila yeke yeitoenena, la baito baokenda likolo liamo la baito lembela. ⁴⁵ Amoi ta baekesi ba bikela akabeka linde mbo, Boekesi,etobekowe ye mbeko, otoseole esu. ⁴⁶ Akabeka mbo ngandi lino baekesi ba bikela! loka mbo otofai baito belito bembe la bofoka loilo, la enu aleko oitoengani ango ounda yo la tonekele tshuino. ⁴⁷ Ngandi lino! loka mbo oshwai mbila i banangoli, ndjo bangau bino baitaka bo. ⁴⁸ Kolaongoma obekelai loka lo bakuwa ba bangau bino, la ofoimilai yo, loka bo baitaka bo ndjoenu okashwai mbila ibo. ⁴⁹ Yamo yo weli boya Mungu akabeka mbo, lototomela bo banangoli la batomomu, batoita bamoi bibo la batoenisa basiya bemusi, ⁵⁰ loka mbo ngelo i banangoli batotina ye ikautama se oakola ta liako li wenda, baiyolomo ta bofini we. ⁵¹ kota ngelo iya Abele tii kota ngelo iya Jekalia ono aitomoko katikati i Etumbelo lo liano ta mbele. Lobeka lino wewe mbo, batoiyolomo ta bao ba we bofindi. ⁵² Ngandi lino baekesi ba tokela! loka mbo ofoyai fungola e weli; enu kabisa oiyoti ango, la ofekilai baito beke bakambaka la yeme mbo baote. ⁵³ Ekafoaka ye onga, Bandiki la Bafalisai bakakola osoma linde la bakaiyola ye litina li mbeko likama, ⁵⁴ Kolaongoma bakakota okomanyela ye ilonga loka lounda ye ta baoi binde.