¹ Isalaele aimbomba la liomali kee beki besiya, osamakai bendanda, kee baito beke bakasiumowa la belefe felo iya Mungu, la yoko esameke'nu lilipomu li leka liengani ta lingali liisa li lokoloo lo bakoke! ² Lotuwa lo bofonga lo'ongba, la mewiti eosela bobe. ³ Baimbotikala ta wenda wange; Efalaima amboinowaka ta Ejipito, bambolaka bieka ta Asuliya, bieke bieiyengani libo. ⁴ Baitoutela ambe Mungu baana: Yeimbo ngaela bo bolo fafo. Bafaefi bibo batongaela bo bofono bo bekati be lisiyo li boliyo; baito batotina bambolaka bekati bioko, batchangoko liengani lokambo beila bieimbombaka be boengani, baimbo'ota lisiyo ango limoi ta mbele eya Mungu. ⁵ Otokela isani ta lisiyo li lienisomu? Ta lisiyo li liengani liya Mungu? ⁶ Yamo yoko moilakai, baoka loka lo liseisomu; Ejipito bokutukumaela beenda, Nofo ye koila bo; la bibongo binde la loketi bi bakute bibo, itomba bieka bi nama ikumo losase, la keke itolingela likolo li bambau bibo. ⁷ Bakokoma ta lisiyo liamo li bemusi, la bakokoma ta lisiyo lio'ana bakuwa: Isalaele bokomba la ngandi! Botondoli akamba loseka, buto a weli bolimo bokafowa, loka lo lotchango libo loluwo la liemaeli libo li bakuwa babe ambe Mungu. ⁸ Efalaime ambe boemaleli boya Mungu; batondoli... Lotela bo wengo bo noli bombe ta ndole itotina, omba boiyani amoi ta mbele eya Mungu inde. ⁹ Bakaota ta lilimbi kee ta basiyo baya Gilebeya; Mungu akaenyelisa batchwanelo bibo, atoesa bemusi ta be'ebe wibo. ¹⁰ Losianya Isalaele kee touma toisandu ii mewiti ta liombele, losiena baise bino kee touma to felo-felo toisandu ii bosuke; yamo yoko bo atotina baoka ambe Bala Peole, la baokuela befono be bilende-lende, la bakamba kee lilo likasamaka bo. ¹¹ Liangangi liya Efelaime, litofumbowa kee noli, ndoena liboti, ndoena baeeme, ndoena lienyeli. ¹² Iomba mbo bainenge bibo bakaokonda, lombofekilaka bo lani baitakamba tosenge; la ngandi libo loka mbo lombotikaka bo! ¹³ Efalaime, etomba esika lange mbile etomoilelei fangi eya Tuliya, ene engali ta elela lo Efelaime; kwani Efelaime atoila bana binde ta lingba. ¹⁴ Faka libo, Ee, Mungu...! Ingi itofayomo libo?... Fayaka libo tololomi totokuma la baye, la balomi baomeli! ¹⁵ Basomi bibo batotina basienena ta Gilegale; onga ende lo'osaka bo ta loloto lousa lo batchwanelo la bakuwa bibo babe, lotosaya bo ta mbele ange. Loimbo sama ale bo; bekota bibo betotina bambe la tchwauli. ¹⁶ Efalaima aokutchomo, beili binde besiomela; aimbo bota ale touma; ikaomba mbo ambe la bana; lotoseisa bibongo bibo bi liomali. ¹⁷ Mungu ange atokusa bo, loka baikaoka, la batofoyomo ta wenda.