¹ Tikaka ifonge ta bonoko wao! Boiyani ambe kee ndjou ta etanda loya Mungu, lokambo baseisaka liokamani, la lobinoko'elo. ² Okamamakai ambei mbo; Mungu ange, toluwi owe, esu Isalaele! ³ Isalaele bakakusa bikela bibo; boiyani totuta bo. ⁴ Bakataliya bekota ndoena ishosha yange, la baemaeli ta bilela bibo; bakakela befono be kanga la bakute bibo la baina ba mbela; yamo yoko batokusomo ta liliseli. ⁵ Mungu akafeka bofono bo elendelende bo wana a ngombe, a Samaliya! Lisomo liange liobaana loka libo. Kota eni mbile etofeka bo likomanyomu? ⁶ Atoesela Isalaele, botuli bo befono, kola ongoma yeiti ei Mungu; yamo yoko yana ii ngombe ii bofono bo bolendele boya Samaliya, totoselomo kee leka. ⁷ Lokambo balombe lofofo la lotobuna lofofo lofi; yeimbomba la mbelembele ii bakoke; yeke imbo botaka yeimbo tomoisa bunga; iomba mbo itomba la leka onga baito basiya bokoya oyalese'su. ⁸ Isalaele bambe ta ilingila! Baomba kanda emoi la beki bembe la befono be mbilika ene eiti la loketi. ⁹ Ikaomba mbo baoka ta Asuliya, kee bokoko bo bolome bo lokonda bokakusomo lousa; Efalaime aoluka beki beongala libo lisau. ¹⁰ Ikaomba mbo baokela liokamani li beki, lombokukaka bo, la kani bato'okisomo la bemusi be belito be bokota la wana aya bokota. ¹¹ Efalaime aoshwa mbele ii beenda loka lo bobe, la mbele itotina ifoukowa ta batchwanelo. ¹² Kwani lotosoma loka libo ta tolotelo tototina to bikela biange, la batomoila kee leka lomoi lo esika. ¹³ Bakaosala bobe bo mbeko yeke bakeleliei, la bakalesana la beniyo: Mungu aikaomala ango iniyo. Kani Mungu akaenyelisa batchwanelo bibo, akafaya bo likutchi loka lo batchwanelo: Batoinowa ta Ejipito. ¹⁴ Isalaele bakaosala buto ono akakelaka bo; kani akashwa mbele ilo-ilo, la Yuda akamba la beki bilo-bilo bi bofoka; kolaongoma lotoesa imbe ii liangangi litofetcha mbele la beki biamo, la itoseisa mbele ii bule.