¹ Isalaele ambaka kee isandu ii mowiti, weke botobota touma likama. Likama li touma, likalila likolo; likama li wenda winde likamba la lokuku, kani akakomanya befono be belende-lende binde. ² Botema winde bokaanana, bolangi oila bemusi, Mungu atosuluwisa lisomi linde, la atoseisa befono be bilende-lende binde. ³ Kola ongoma bokobeka mbo: Toiti ango la bokota bomoi, loka mbo toikabanga Mungu, la bekota, tokele isaii loka liso? ⁴ Bokobeka baoi ba likase la lilaki li lolanga, ta mbile embokandamanaka bo ta liokani: La bemusi koakola loeneno, kanda emoi la isandu ii likase ilobomu ta elanga lo Silowe. ⁵ Baito ba Samaliya, bokoakola lomoilono loka lo befono bo belendela be bana ba ngombe ii bilende-lende ta elela lo Betele Ewene; baito ko'akola ongba loka lo befono bo bilende-lende, kwani bakumi bibo bokoakola obilikima loka libo, loka lo taala, imbo bungaka atiteni ibo. ⁶ Bambo'osomoko ta Suliya, loka bakuwele bokota ako Yalebe. Litchwanani liokoenena ambe Efalaime kani Isalaele batomba la bowa loka lo ilingila ibo. ⁷ Bokota bo Samaliya, atolimowa kee limbunge li nyele. ⁸ Biseke bi likolo bi Betele-Awena, onga Isalaele bakelaka litchwanelo, Bilela bitoseisomo; keke la beliki biokotaluwa likolo linde. Bokobeka la longo lofi mbo: Iseke'esu! La ta fongo baoi mbo: Ukweleke'su! ⁹ Kota mbile eya Gelibele, ekelaka Isalaele bobe onga, bakaemmakala, bitumba la baiyani baimbosila ta Gubele. ¹⁰ Yeme yange imbe mbo, lofa ye bo bemusi ta befindi betosondjamanaka bo, mbile embo kandomoko bo. ¹¹ Efalaime ambe la yana ii ngombe yeke yeikaekisomo, ono alangi okuku bofonga loka lo'okomanya; loto'otisa Efalaime, Yuda koloba, Yakobo koutaka baye. ¹² Lobakai bibongo la losamo, bunakai oengana la ngandi iya Mungu, akolakai elanga lo kanikani! Esiengana mbile eolinga Mungu kota mbile ene etoya, la omeyanisakai losamo. ¹³ Olobakai litchwanelo, okabunai bemusi, okalai touma to lilimbi; lokambo otelelakai botema ta tondole-ndole tchwino, la bofindi wao bo likama. ¹⁴ Kwani libuya litotomowa ta baito bao, la bofoka wao bototina botoseisomo, kani eseisomoko Solomo Bete-Alebele, ta lisiyo li bitumba, onga inango atosesomo la bana binde batotina. ¹⁵ Yamo yoko oto'onolai elela lo Betele, loka lo losomi limbe katikati ii loyo ta beki be basongo bekumo Elope, bokota bo Isalaele botolimowa nongo-nongo.