¹ Yaokoi, inowakai ambe Mungu loka akaafakaka, la ekouwisesu; akokutcha, kwani akakandaka bafwa biso. ² Atoinoiselesu liwawi ta basiyo baele; la lisiyo li basaso ye koile'su likolo, kwani esu kouwa felo inde. ³ Luwakai, akolakai loluwo Mungu; loyo linde lombe bofono weke buto aitoluwa. Atoya ambesu bofono bo ndjaluke, kee ndjaluke ee esiyo etoyalisa nyele la baye. ⁴ Otokela isani Efelaima? Otokela isani owe Yuda? Ngandi yao imbe kee lifita li nongo, kee limba lieke litosesela la mangu. ⁵ Yamo yoko lotokutcha labatondoli, lomboitaka bo la baoiba bonoko wange, la lisambisomu liange litosuluwa la liangangi. ⁶ Lokambo lolangi ndjo limesila tinga bafaefi, la loluwo Mungu oeta bafaefi bao baofectha. ⁷ Bambe kee Adamu, basiuta lio kamani, yamo yoko bakakuwelei la lilimbi. ⁸ Gilada imbe boki bo baito babe, eoseisomo la ngelo ii baito. ⁹ Imbe kee bakanga bafi ba boiba baumbakeli buto ta isembekeli, batoitakana la baito ta ndole ekumo Sikeme; loka baesi lokomba ta loseyo. ¹⁰ Ta mbele ee Isalaele, lisiena bibongo bi tale fafo: Oko etokela Efalaima bolefe, lokuku lo Isalaele lotoseisama. ¹¹ Ambe aleko Yuda, lisiyo li obuna touma lisiengana, la yamo lotolingoisa likandisomu li baito bange.