¹ Okakai ase, kanga efi! Mbakai la lioki, mbele ee Isalaele! Takai batoi, mbele ee bokota, lokambo ambenu ende lisambisomu litoenisomo, lokambo enu ombei ilonga ta Misipiya, kanda emoi la Wengo botomu ta Tabola. ² Ta bafaefi bibo, baito batchangu liimeli bambo kendelaka ta loseiso, kolaongoma lotomba la likutchi likolo libobatotina. ³ Loiluwi Efelaima, la Isalaele baimbo isama lisiyo ango limoi, okela bolefe, la lokuku lo Isalaele lo liseisomu. ⁴ Bakuwa bibo baitofaya bo fofe mbo bainowe ambe Mungu, litina mbo bolimo bo bolefebombe atiteni ibo, lokambo bailuwi ale Mungu. ⁵ Lofofo lo Isalaele lotoenisa bongaenelo wibo; Isalaele la Efelaima bamboukowaka aleko la lotchango losuluwo; loka libo aleko Yuda batoukowa. ⁶ Bakaka la nama ibo ii bekoko la ngombe ibo ta loluko Mungu laongoma baika'anyamana la Mungu: Akafowa katikati ibo. ⁷ Bambaka baito batchangu liimeli ambe Mungu, lokambo babotaka bana bee baiyengani la Mungu; kwani tengai emoi loka lo'oenisa bibongo binde bitotina. ⁸ Umanga ifonge ta Gulebeya, ifonge ta Lama! Mamakai ta elela lo Bete-Evena! Mbisa iya, Beyamina! ⁹ Efalaima atomba la bomusi bofi ta lisiyo liamo; lotobeka la befindi be Isalaele leka la limwali. ¹⁰ Baemaeli ba Yuda baomba kee baito bakafoya tokenge; lotosuluwisala bo lisomi lifi kee fela. ¹¹ Efalaima ekotchomo, la likutchi li lisambi, loka batute baoi bafomu libo. ¹² Lotomba kee libala loka lo Efelaima, kee bolela loka lo mbele eya Yuda. ¹³ Efelaima atoena bobe winde, la Yuda ambo lelaka, Efelaima atoka ta Suliya; kwani bokoenisa ambe bokota boko Yalebe; kola ongoma bokota aimbo longa louwiso, lamba loeso limutoli ta bafwa bino. ¹⁴ Lotongala kee koi loka lo Efelaima, kee yana ii koi ta mbele eya Yuda; Ei, Ei, lotofaaka, la lombokaka, lombo'osaka onga amoi aimbo uwisa ta bao bange. ¹⁵ Lombo kaka, lombo inowaka ta bingaelo biange, kota mbile ene embo tenanaka bo la oluka bombo boya Mungu. Kota mbile emboselakaka bo bobe wibo, bokoinowa ambei.