¹ Okakai baoi baya Mungu, bana ba Isalaele! Lokambo Mungu ambe la lioi limoi ambe baito ba wenda, loka yeiti ango la iniyo ii momongo, ndoena liluani, ndoena weli bo'okotcha la Mungu ta wenda. ² Imbe ango la bimolo la saki yeiti la litina, loiti baito, wiba la belefela be baali ba baitola balome eleko; batokela bobe, ngelo itotuta ngelo. ³ Yamo yoko wenda bototikala ta lingba, batotina bauwi ta nyele batomba ta lilewi, la baito, la nama ii loknda la noli ii lobola; lamba la suwe ii baye itomeyana. ⁴ Yamo buto ango amoi aitomaka la buto linde; lokambo baito bao bambe kee baito batotana feye la kanga efi eya Mungu. ⁵ Ombo ukowaka ta lisiyo, batondoli lao bambo ukowaka lotiyo, kola ongoma ei koseisa ba bande. ⁶ Baito bange baoseisama, lokambo baotchango weli liliwi. Loka mbo o'okusa weli bo'okotcha, lamba lotchango wo, la otoseisomoi ta mbele ange Mungu; Loka mbo osi'osalai ekela loya Mungu ino, loto'osala aleko bana bao. Embaka bo likama, yamo bakakela lichuanelo ambei: Lombo kikoisaka liangangi liyo kokindowa soni. ⁸ Itomba kanda emoi la baito kee sowe. ⁹ Itomba la ba kanga efi kanda emoi la baito; lotofa bo bemusi ta likendi libo la lo'ofaya bo kandaemoi la bakuwa bibo. ¹⁰ Ombolakai la oimbokumai solo, otokelai belefe ndoena liboti, lokambo o'otikai Mungu la o'osala bikela binde. ¹¹ Belefe, bana la bewiti itofoya lienyeli. ¹² Baito bange bakamoila tosandu tchwibo, la totumbo loka tobekelebo, lokambo bolimo bo bolefe bo'oka esika, baokela bolefe esika la Mungu ibo. ¹³ Bakaesa bafaefi ta isoko ii longo, ofetcha ba faefi la linono ta fongo, sekala ii liona, la felo ii baito, la loka baite, imbe la lifiyofiyo lilo. Yamo yoko baseka biso batokela belefe, la baseka lokelo belefe la balome ba baito. ¹⁴ Loimbo foya likutchi ta baseka bino loka mbo baokela belefe, laomba ba manga ii baseka imbo baokela bolefe la balome ba baito, lokambo bo angene bambo foaka ta likuwa li bolefe, la bafaefi ta baali ba bosambo. Baito batchangile lienyeli. ¹⁵ Yomba mbo okaofaya lokomba ta bakuwa ba bolefe, fafo Isalaele, lokambo Yuda ambo tonemo; oikakai ta eseke loko Gulegale, oililaka ta eseke loka betauwana, oilolapaka la lilimbi lokambo Mungu ambe la liwawi! ¹⁶ Lokambo Isalaelebao soma kee yana ii bokoko ito'omala losuluwo ta longo. ¹⁷ Efalaima baotikana la befono: Tikakai bo! ¹⁸ Embo silisakaibo bobuwo, bokoesa lokomba ta bakuwa ba bolefe, baosama soni koeta loluku. ¹⁹ Lofofo lokaya oya fandokola bambau, yamo bo kongala la bowa ta bafaefi bibo.