¹ Mbile etobeka Efalaime, imbe iyeli ifi, yokoenisa Isalaele, iomba mbo bakaotikana la Bala, la akaongba. ² Kani boko'akola lokelo batchwanelo, bo kokela la bakute bibo befono be elende-lende, bechangu litina, la belende-lende be weli bibo; itotina imbe bakuwa ba bilendelende. Bo kobeka ta litina li yamo mbo: Ingi itofe'su lifaefi loka lo osuluwise ngombe! ³ Yamo yoko batoma kee lifita li nongo, kee liumba litosombuwa ta libande, kee bopila boka bunga la lofofo. kanda emoi la boi bototomowa ta lililisa. ⁴ Ei lombe Mungu, Ngene ao, kota wenda bo Ejipito oitimba la Mungu amoi felo yange; yeiti la bokuki asiya kee ei. ⁵ Loluwokowe ta liombele, elo ta nyele ii bofoka la botchanga. ⁶ Bakumaka solo la bekati; la bakateko besiya, la bawawi bibo bakaamba la liomali; yamo yoko bakaosalei Mungu. ⁷ Lotomba ambe bo kee nama ekumo koi, kee nama eko simba, lombo nokilaka bo ta ndole. ⁸ Lotonanisa bo bofono bo nama eko mboko atolukana la nama inde, la lotofayakana la batutu ba betema bibo, lotomeyanisa bo kee koi ee botaali; nama ii lokonda iseli ye ta elela. ⁹ Isalaele, etoseisowe ani, lokambo osiemalelei, ei bosungi wao. ¹⁰ Bokota wao bombe endei, imbo ouwise owe ange, la boki wao bototina? Basambisi bao endei, beke obekaka libo mbo: Fayekei bokota bo wana a bokota? ¹¹ Lofoko'o bokota la lisomi, la lotomoisaka ye la ibeelekpa fafo. ¹² Batchwanelo ba Efalaime bakokukami, bobe winde bokoisami; 13 Yelo; yoyeela ye; imbe wana ambe la weli boke, ta mbile ee liboti aimbotomowa mangu ta ndole ene botaali atobotelaka. ¹⁴ Lokafaaka ende buto eseke lo likandomu? Louwise ende buto ta lingba? Eee, lingba li bomusi wao endei? Eseke lo beliyo biao bembe endei? Ngandi efoisamela baiso bange. ¹⁵ Efalaime ambe kee touma likama katikati ee banduku binde, lofofo lototomowa ete etotomowaka lowa; lofofo loya Mungu ofowa ta liombele. Eliya linde lototikala la baye, lilomi li baye binde lito'omela; etoseisa ta ekukelo linde biongo bitotina bi loketi. ¹⁶ Samaliya atoanya bomusi, loka mbo aosomela Mungu inde; batoitomo la bopanga, bana bibo batotchwangomo ta tuwa kee bofonga, la batofaa baeme ba baali bibo.