¹ Efalaime atolana la lofolo, aotutana la lofofo loete etotomoaka lowa mbile etotina, basiyo batotina batotaliya lolanga lobe; boko'okana la Suliya loka lo baina ta Ejipito. ² Mungu akombe la feye la Yuda, la yekoesa bomusi ambe Yakobo loka lo likendi, atofoya bo koengana la bakuwa bibo. ³ Ta solo ibo, Yakobo akaunda litindi li lofeko linde, kani la bofoka winde, atonanisa loka loya Mungu. ⁴ Akanana la bokitomo la kwani akalonga, akalela, la akasombola ambe Mungu. Aka'anyamana linde ta Betele, oko Abekanaka liso atotina onga. ⁵ Ye Mungu abaito batotina, lina linde Mbula Olimo Akondja Oki. ⁶ Lao, inowaka ambe Mungu, la lokuku lo losamo lo liengani, la moilelaka Mungu mbile etotina. ⁷ Efalaime ambe boungisi ono aundi ipimomu ii bobe, asami ko lolanga. ⁸ Efalaime akabeka mbo: Ee, ei lombe la bofoka, losianya bibongo bi bule. Kani yamo itotina imbe bakuwa ba bao bange, baito'anya ango imoi ii bobe ambei, laomba litchwanelo. ⁹ Ei lombe Mungu, ino ta wenda bo Ejipito; lotongalisowe lisiya katikati ee limbau kee bofono bo lisiyo likomanyomu li linengina. ¹⁰ Loka beka la batondoli, la otaliela bo baenesi kani lokabeka la botondoli, lokaesa bembila loka libo. ¹¹ Iomba mbo Gilada ambe la litchwanelo, baito batotina bangalisomu kee leka loiti la litina, bokotumbaka ngombe ta elela lo Gilada, la ngbaka ibo bokomba bofono bo litale li Silowe. ¹² Yakobo ye koka mangu ta wenda bo Asuliya, Isalaele bo kokuela botaali, kwani botaali akakukaka bo kee bokoko. ¹³ Loka lo batondoli, Mungu atonoisa Isalaele lousa lo Ejipito, kani loka lo botondoli, Isalaele akambaka ta likukani. ¹⁴ Efalaima akafekela lisomi likama fafo, Ngene inde atoutela ye ngelo inde ikaseisomoko, atokomanya ye la boulo.