¹ Saulo akaimila lingba liya Setefano. Ikambaka, ta liö lisiyo, bomusi bofi oemaela Mbele ee Mungu ee Yelusaleme, la batotina, sakolo ko batomomu, beke bameyaka ta fangi ee Yudeya la Samaliya. ² Batolome beke baengani, bakaomba Setefano, la bakalelae ta iyeli ifi. ³ Saulo ta fangi inde, akaokisa wale mbele ee Mungu; Oota aiteni ii mbele, la akaunda batolome la bataali, la akakusa bo ta bonyololo. ⁴ Beke bameyanaka bakaka biseke la biseke, ani batongola mboli itanu ii lioi. ⁵ Filipo, akaka ta bloki bo Samaliya, loka lonangola Kilisito. ⁶ Banginda batotina bakambaka la keba ta yeke Filipo abekaka, mbile baokaka la bakaena tokesa chueke akelaka. ⁷ Belimo be lilo bekafowa la belimo bebe be bule, ta limami la bauwe bafi, la beke baikambaka batokenda la bilema bakauwa. ⁸ Ikamba la liomali lufi ta aiteni ii boki wo. ⁹ Ikambaka ta boki buto amoi lina linde Simona, ono ambaka buto a lokuku, ambaka buto a bate fafo, la akambaka atomwalisa baito ba Samaliya. ¹⁰ Batotina, kowakola ta ono bokikelike kota bokonde, batookae la likebi, la bakabeka mbo: Ono ambe la bofoka boya Mungu, yeke ikatomo mbo bofi. ¹¹ Bakambaka batookae la likebi, loka akambaka atomwalisa bo ta bakuwa binde ba bate. ¹² La, tambile bakaimilia ambe Filipo, ono akabekelaka bo mboli itanu ii bokota boya Mungu ta lina liya Yesu Kilisito, batolome la bataali baka lufiomo. ¹³ Simo engene akaimila, la mbisa iyo lufiomu, aikatikele Filipo, la akaenaka ta limwali tokesa la bamwali yeke imbaka itokelomo. ¹⁴ batomomu, beke bambaka ta Yelusaleme, bakaoka mbo Samaliya bafoimiliya lioi liya Mungu, bakatoma Petelo la Yoani. ¹⁵ Bo, bakakoma ta baito ba Samaliya, baka sombola loka libo loka baoshe Bolimo botanu. ¹⁶ Loka baikaoshaka koni bilimo botanu, baka lufiomo ango ta lina liya Ngene Yesu. ¹⁷ Kola ongoma, Petelo la Yoani bakatelela bo bao, la bakaosha Bolimo Botanu. ¹⁸ Mbile Simona akaena mbo Bolimo Botanu bokafomoko ta litomu li bao li batomomu, akafa bo falanga ao bakute, ¹⁹ akabeka mbo: Fekei aleko we bofoka, loka mbo ono aleko lombotelakae bao, aoshe Bolimo Botanu. ²⁰ Petelo akabeka linde mbo: Tikaka bakute bao baseisame lao eseke lomoi, loka otoenyela keembo liano liya Mungu liengani oosomo ta loketi lo bieto! ²¹ Oiti la leka ango lomoi ta lobeko le, loka mbo botema wao boiti bolo felo iya mungu. ²² Kikowaka ta bobe wao, la lengilaka la Ngene loka baenyeli ba botema wao imesilomo, yomba mbo itoengana; ²³ Loka lofoena kembo ombe ta likasi la okandomu ta bobe. ²⁴ Simona akabinoisela mbo: Sembolaka owe angene Ngene loka lange, loka mbo yeikomelekei otutana la'ani okabeka. ²⁵ Mbisa iyobeka ta lioi liya Ngene, la mbisa iyonangola, Petelo la Yoani bakabinowa ta Yelusaleme, la'ani bato nangola mboli itanu ta beki be bule bi ba Samaliya. ²⁶ Bokeitomo amoi aya Ngene, akabeka la Filipo, ye mbo: Emalaka, la kaaka ta fangi esiya, ta ndole ene ekaka ta Yelusaleme la Gaja, ene embe leombele. ²⁷ Akaemala, la akaaka. Tene, Boetopia, bokuku bo bataali, buto bouku, bokota botaali bo Etopia, bokuki bo biengo bi loketi binde bitotina, akafowa ta Yelusaleme loka losembola, ²⁸ atobinowa, la akangalakase ta Mobilete winde, la'ani atotanga lokasa loya bonangoli Isaya. ²⁹ Bolimo bokabeka la Filipo mbo: Kaaka, la komaka tina lawo Mobilete. ³⁰ Filipo akaka mangu, la akaoka Boetopia atotanga Bonangoli Isaya. Akabeka linde: Oluwile yeke ototanga? ³¹ Akabinoiselae mbo: Eni kanga loengani oluwa, la'ani buto aitaka beisei? Akata Filipo lioi alile la angale linde eseke lomoi. ³² Ekende lo lisonomu ene akambaka atotanga ikambaka ani: Baoka linde kee bokoko ta eseke leke batoitaka nama; kee wana a bokoko ono aitobeka felo iya ono atotenae fuu, aika'asola ango bonoko winde. ³³ Aiteni ii loeneno bule linde, ndjo lisambisomu linde likaemalisomo. La bofindi winde, ndai atomoila bo? Loka liwawi linde liosila ofoyomo ekee ta wenda. ³⁴ Bokuki bo botaali akabeka la Filipo: Loolengila lao, Bonagoli atobeka loka loya ndai? Atobeka loka linde andene, ao loka lo buto asiya? ³⁵ La'ani Filipo, akalikola bonoko la akaakola ta lo ekende, akabeisae mboli itanu iya Yesu. ³⁶ Ani embaka bo batokenda ta ndole ibo, bakakoma ta baye. La Bokuki bo botaali akabinoisala mbo: Tene baye ingi imbo fekilekei mbo lo lufiomo? ³⁷ Filipo akabeka linde mbo: Yomba mbo okafoimila ta botema wao bototina, itoenganisomo. Bokuki bo bataali akbinoiselae mbo: Lofoimila mbo Yesu Kilisito ambe Wana aya Mungu. ³⁸ Akaemalisa Mobilete; Filipo la bokuki bo botaali bakasuluwa bowa baele ta baye la Filipo akalufiyae. ³⁹ Mbile ekatomoaka bo ta baye, Bolimo boya Ngene bokaila Filipo, la bokuki bo bataali aikaena ale ye. Ta liomali, akatuta ndole inde, ⁴⁰ Filipo akambaka Azoti la akaaka kota Kaisaliya, ani atonangola ta beki betotina bieke ambaka atoeta.