¹ Bokumo bofi bokabeka: Mbeko imbe amboko ani? ² Setefano akabinoisela bo: Banduku batolome la ba afa okakai! Mungu a bofoka akaenena la ise iso Abalayama, mbile embakae ta Mesopotaniya, felo inde iyongala ta Halana; La akabeka linde mbo: ³ Fowaka ta boki wao la bofindi wao, la kaaka ta boki weke lotoenisa lao. ⁴ Akafowa ta boki bo ba Kaladi, la akangala ta Halana. Onga, mbisa ii lingba liya Ise inde, Mungu akaetisae ta boki we botongalae kanikani; ⁵ Aikafakae leka ango lomoi ta boki wamo, oto ango eseke lotela likolo, la akalakae loka lofae leka, ta bofindi winde mbisa inde, imbe ani eikambakae la wana. ⁶ Mungu akabeka ani: Bofindi winde bombo ngalaka ta boki bo beenda; Batootisae ta bokowa la batookisa bo wale basiyo miya inati. ⁷ La bofindi weke botokisomo wale, eii ndjo loto sambisa bo, Mungu aobeka ongoma. Mbisa ii yonga, batotomowa, la batokuwelei ta le eseke. ⁸ La Mungu akafa la Abalayama liyokani liyotena itombe; la aleko, Ablayama, akabota Isaka, akatenae itombe lisiyo li bonanei; Isaka akabota Yakobo la akatenae itombe, la Yakobo akabota bangau liou la baele. ⁹ Bangau, bakaokela Yosefe liiya, bakaungisae loka lotolomo ta Egipito. ¹⁰ La Mungu akambaka linde, la akasombuelae ta bomusi betotina; akafae weli la akaosha ngbengbele felo iya Falao, bokota bo Egipito, la akatae bo Egipito la mbele inde etotina. ¹¹ Semba emoi ekaya ta boki bo Egipito, la aleko ta Kanana. La ngandi imbaka bofi, baise bibo baikaoshaka ango leka loola. ¹² Yakobo akaoka mbo bakoke bambe ta Egipito, la akatoma baise bibo mala ee felo-felo. ¹³ La mala ee baele, Yosefa akaluamana la banduku binde, la Falao akaluwa mbo akambaka ta bofindi woko. ¹⁴ Yosefe akatoma bake okaluka ise inde Yakobo, la bofindi winde bototina, yeke imbaka la baito tuku bosambale. ¹⁵ Yakobo akasuliwa ta Egipito, oko engbakae, la aleko la baise biso; ¹⁶ La bakalomo ta Sikema, la bakatae ta mbila yeke Abalayama asombaka, la loketi lo bakute, ta bana baya Hamola, ise aya Sikema. ¹⁷ Mbile ekamba tina loka loenganisa lolakomo leke Mungu awaka ambe Abalayama, la baito bakamba ba bule ta Egipito, ¹⁸ tii kani etomoaka bokota bosiya, ono aikaluaka Yosefe. ¹⁹ Bokota wamo, akamba la baenyeli babe loka lo bofindi wiso, akaokisa baise biso wale, tina ango mbo aite bana binde, loka mbo baiyuwaka ale. ²⁰ Ta mbile amondjo, Mose abotomoko, ono ambaka bolo ta baiso baya Mungu, akalesomo tengai isaso ta mbele eya ise inde; ²¹ La, ta mbile ekusomoko ye, boseka boya Falao akaosae, la akakondisae kee wana inde. ²² Mose akaekisomo ta weli bototina bo baito ba Egipito, la akambaka la bofoka ta baoi la bakuwa. ²³ Akambaka la miaka tuku inati, mbile ekatakae ta botema winde loka lokaena banduku binde, bana ba Yisalaele. ²⁴ Akaena amoi batoenisae wale, la aka soma, loka loya ono bakambaka batoenisae wale, la akauma oko buto a Egipito. ²⁵ Akaenyela kembo banduku binde bamboluaka kembo Mungu ambo sombulaka bo ta boo winde; ndjo baikaluwaka. ²⁶ Lisiyo lisiya, akaoshamana aiteni ibo ani embaka bo batonana, la akaima bo bambe la kimia; Akabeka: Banduku, ombei banduku; Loka loingi otonanai amoi la osiya? ²⁷ Ono ambaka atokisa buto linde wale akachindjae, la akabeka: Ndai akaselo bokota la bosambisi wiso? ²⁸ Olangi oitei, ani oitaka lao ta mbele buto a Egipito? ²⁹ Ta liö lioi, Mose akakimbiya, la akaka okangala ta boki bo Mediane, elo abotaka bana baele. ³⁰ Mbisa ii miaka tuku inati, bokeitomo amoi akaenamana linde, ta liombele ta longo lo Sinai, ta litundulundu li imbe ta isandu ikikelike. ³¹ Mose, akaena ongoma, akmwaala ta lioko lieneni, la, ani ekakomakae onga tina loka lo moila, akaoka limiki liya Ngenelitobeka: ³² Lombe Mungu a baise bao, Mungu aya Abalayama, la Isaka la Yakobo, la Mose, akamba la bowa, aikaengana ango omoila. ³³ Ngene akabeka linde mbo: Foyaka lipapa ta bakolo bao, loka eseke leke ombe imbe nyele itanu. ³⁴ Lofoena bomusi bo baito bange beke bambe tab Egipito, la lofooka bileli bibo, la loosuluwa loka loya fungola bo. Kanikani, kaaka, lototomowa ta Egipito. ³⁵ Mose, ono bafekakae, obeka mbo: Ndai akatowe bokota la bosambisi wiso? Ye ndjo Mungu akatomae kee bokota la kee bofoi ta lisungi liya bokeitomo ono akaenenaka linde ta isandu ikikelike. ³⁶ Ye ndjo akatomoisa bo ta Egipito, la tokesa to limwali ta boki bo Egipito, aiteni ii libande linenu, la ta liombele, miaka mia-inati. ³⁷ Oko Mose ndjo akabeka la bana ba Yisalaele mbo: Mungu atoemalisele'enu Bonangoli kee ei aiteni ii banduku bino. ³⁸ Ye oko ambaka aiteni ii mbele ee Mungu ta liombele, la bokeitomo ono asumuliaka lindea longo lo Sinaï, la baise biso aleko, ye akaosha baoi ba liwawi loka loofa liso. ³⁹ Baise biso baikamba ilitisa ye, la bakachindja ye fangi esiya, la betema bibo bikabinowa ta Egipito. ⁴⁰ Bakabeka la Alona mbo: Kelelekesu ba mungu beke batoka telo iso; loka loya Mose ono akafoye'su ta boki bo Egipito, toiluwi lamba loni lobeko loka tomoela ye. ⁴¹ Ta basiyo bamo bakakela ekeko kee wana a ngombe, la bakaesa baano ta ekeko lamo, la bakaomala bakuwa ba bao bibo. ⁴² Mungu akakikowa la akatika bo osembola tolonge to bose, ani ikaosila osonomo ta kasa ii banangoli mbo: Enu okanakai nama yeke ikaotomo la liano liange miaka miaka tuku inati ta liombele, Enu baito ba Yisalaele? ⁴³ Ofoilai mbele eya Moleke, la ilonge iya mungu Lefana, bikelekenda bieke okakelai loka losembola yo. Lotokese'nu elo mbisa ii Babilona. ⁴⁴ Baise biso bakambaka la mbele Mungu ee bobekeli ta liombele, ene ekashomo ta baenyeli baya Mose. ⁴⁵ La mbisa, baise biso bakaila yo eseke lomoi la Yosua ta boki bo bofindi bieke Mungu akafoya felo ii baise biso. Imbaka ongoma Kota basiyo baya Dawidi. ⁴⁶ Dawidi akailomo ta Baiso baya Mungu la akalengila mbo aoshele Mungu aya Yakobo bongaelo; ⁴⁷ la Salomona ndjo akashoelae mbele. ⁴⁸ Ndjo ono Aeti-Likolo aitongalaka ta mbele ene ikashomo la bao ba baito, Kanda emoi ani bonangoli akabeka mbo: ⁴⁹ Bose bombe keka ii bokota winde, wenda bombe etelelo lo bakolo bange. Ngene aobeka mbo: otoshuelei mbele eni kanda? Loni eseke lombombaka efeumelo lange? ⁵⁰ Boo wange boikeli yo mbeko itotina? ⁵¹ Enu baito ba bochue bofoka! Bapakano ba betema la batoi! Enu otoemaelai Bolimo Botanu, Enu la baise bino. ⁵² Baise bino bakaenoko okisa ndai wale ta banangoli? Bakaita beke bakanangola felo ii loyo loya Boengni; ono akakesei ye la okaitaiye, ⁵³ enu beke okaoshai bikela bikafomo ta benoko be bakeitomo la oikalitisai yo. ⁵⁴ Ekaokaka bo mbeko yamo, bakaoka bobe ta betema bibo la balelae baino. ⁵⁵ La Setefano akawalaka la Bolimo Botanu, akamoila bose, la akaena bofoka boya Mungu, la Yesu aemali ta boo bolome boya Mungu. ⁵⁶ Akabek mbo: Lofoena Bose olikolomo, la Wana a Buto aemali ta boo boya Mungu bo bolome. ⁵⁷ Bakakanda batoi bibo, la bakambaka la bamiki bafi, la bakakenda mangu mangu ta botema bomoi ambe ye. ⁵⁸ Bakakusae lousa lo boki, la bakaumae babuki. Baeni bakata tulu ibo ta bakolo baya Wana botolome amoi lina linde Saulo. ⁵⁹ Kola ongoma, bakaumae Setefano ba buki, oko ambaka atosombola mbo: Ngene Yesu, osaka bolimo wange! ⁶⁰ La akasuluwa labaluwi binde, la akamama la limiki lifi mbo: Ngene, oitangelaka bo we bobe! Ekasilakae obeka ongoma akakpa ilo.