¹ Ta mbile Saulo, ofeuma lisiya la liyembu li liitomu oemaela baeki baya Ngene, akaka ambe kanga eya Mungu, ² la alengilaka kasa loka lo mbele eya Mungu ene ee Damase, la litina mbo: Yomba mbo o'onyaka baito la mboli ilo ii bikela, batolome lamba bataali, ambotolaka bo baundamane la Yelusaleme. ³ Ani embaka ye ta ndole, la asumaka tina la Damase, la mala emoi liyangangi likafowa ta lobola lika anganga pembeni inde. ⁴ Akakpa ilingila ta nyele, la aokaka limiki limoi litobeka linde: Saulo, Saulo, loka loingi ototeswei ani? ⁵ Amutolaka: Owe ase ndai, Ngene? La Ngene akabeka: Lombe ono ototeswa ye. ⁶ Akabilima la aundaka itumbo, akabeka: Ngene osami lokele ingi? La Ngene akabeka linde: Emalaka, otaka ta boki bofi, la batobeka lao yeke oengani okela. ⁷ Batolome bee akendaka libo bangalaka; baokaka limiki, la baitiyena ango buto amoi. ⁸ Saulo akaemala ta nyele, la, ango ani baiso bibo bafongwanaka baitiena leka; bakaunda ye ta boo, la bakaka ta Damaseke. ⁹ Ambaka basiyo basaso ndoena, la aitila la aitimwa. ¹⁰ Imbaka ta Damaseke boeki bomoi lina linde Ananiya. Ngene abekaka linde ta saki: Ananiya! Ei ono, Ngene! ¹¹ Ngene akabeka linde: Emalaka, kaaka ta ndole fangi ee boo bolome, la lukaka ta mbele eya Yuda, buto amoi akumo Saulo. ¹² Ta mbile esombolaka ye, la akaena ta saki botolome amoi lina linde Ananiya, aotaka, la atalielaka ye baoo, loka mbo aene lisiya. Ananiya amutolaka: ¹³ Ngene, lokaka ta baito likama bobe bototina weke bokelaka ye baengani bao ta Yelusaleme; ¹⁴ imbe eke la befoka, ta fangi ee bakanga baya Mungu, loka loundamanisa itotina la lina liao. ¹⁵ Ngene abekaka linde: Kaaka, loka mbo ono botolome aomba ekuwelo leke lokaotchakola, loka lo'otola lina liange ta wenda, felo ii bekota, la felo ii bana ba Isalaele; ¹⁶ lomboenisaka bo itotina yeke baengani lo'oko bomusi loka lo lina liange. ¹⁷ Ananiya atomowaka; ta mbile ekomaka ye ta mbele, atalielaka Saulo baoo, ani atobeka : Saulo, nduku ange, Ngene Yesu, ono aenenaka lao ta ndole ene oyelaka, aotomei loka oene lisiya la owalismo la Bolimo Botanu. ¹⁸ Kota mbile amo, ta baiso binde kee mboso, la aenaka lisiya. Aemalaka, la alufiomoko; ¹⁹ mbisa aundaka bieka, bofoka, la bofoka bokaya ta bindo. Saulo atikaka basiyo bakikelike la baeki beke bambaka ta Damaseke. ²⁰ Kota elo mbile anangolaka ta esondjamelo leke Yesu ono Wana aya Mungu. ²¹ Batotina beke baumbakelala ye bambaka la limwali, la babekaka: Oiluwi ono atesweke'nu ta YElusaleme ambaka ota lieye lina, la aitiya eke loka lo'otolabo baundamane felo ii bakanga baya Mungu ba litina? ²² Ta mbile Saulo ambaka la bofoka lisiya la lisiya, akakolokanisa Bayuda beke bauwaka ta Damaseke, ounisa mbo Yesu ambe Kilisito. ²³ Ta botuku bo mbile emoi, Bayuda baokanaka loka mbo baite ye, ²⁴ likita libo limbaka likolo li liluwi liya Saulo. Batchungaka beinda lowa la lotiyo, la litina mbo bafoye ye liwawi. ²⁵ Ta lotiyo lomoi baeki bakaunda ye, la basuluwaka ta etutu, aiteni ii itchunga. ²⁶ Ta mbile ekaka bo ta Yelusaleme, Saulo aundamanaka libo; bo batotina bambaka lobango ye, la ndoenyela mbo ambaka boeki. ²⁷ Kola ongoma Balabase, aosomoko linde, aandaka ye felo kota batomomu, osemoela bo ta ndole aniki Saulo aenaka Ngene, abekaka linde, la loka loingi ta Damaseke anangolaka ndobanga ando lekata lina liya Yesu. ²⁸ Akaka la ayaka libo ta Yelusaleme, la abekaka la bofilili bototina ta lina liya Ngene. ²⁹ Abekaka aleko la aitanaka la Balenisite; la beke balukaka bafoye ye liwawi. ³⁰ Banduku, eokaka bo, batolaka bo ta Kaisaliya, la lokambo bake ta Talase. ³¹ Mbele eya Mungu embaka la kimia ta Yuda itotina, Galilaya la Samalita, bakaishimiya la bakendaka la bowa boya Ngene, la aimilaka la limoili li Bolimo Botanu. ³² Aniki Petelo amoilaka batanisomu batotina, asuluwaka aleko beke bambaka ta Lide. ³³ A'anyaka botolome amoi lina linde Enaye, alali se likolo li litamba miaka bonane, la abundukalaka. ³⁴ Petelo akabeka linde: Enaye, Yesu Kilisito atouwiso we; emalaka, la komanyaka litamba liao. La mangu aemalaka. ³⁵ Baito batotina ba Lide la Salo aenaka bo, la bakikowaka ambe Ngene. ³⁶ Imbaka ta Jopa, ta baeki, botaali amoi lina linde Tabita, litina mbo Dolokase: Akelaka bakuwa likama la bafaefi. ³⁷ Ta mbile amo ambaka la wale, la angalaka, mbisa iyokpelisa ye, batikaka ye ta ekende lomoi lo mbele lo likolo. ³⁸ Aniki Lide tina la Jope, baeki, akaoka mbo Petelo a'anyaka, atomaka batolome baele ambe ye, loka lo osombola oya ambe bo lo mangu. ³⁹ Petelo akaemala, la akaka la be batolome. Ta mbile ekomakabo, bakaanda bo felo ta mbele ee likolo. Beke batotina bakaongbelo balome balelaka tina linde, la bakaenisa biongo, la tulu, bieke Dolokase akelaka ani akombe libo la liwawi. ⁴⁰ Petelo atomoisaka bo batotina lousa, akauma baluwi ta nyele, akasombola; akakikowa fangi ee bindo, akabeka: Tabita, emalaka! Akalikola baiso, la akaena Petelo, akangala se. ⁴¹ Akatambaye boo, la akaemalisa ye. Akata lisiya batanisomu la bataali beke bangbeeli balome, la akaenisa bo buto ono akaoyayowa. ⁴² Yamo iluwanaka ta Jopa itotina, la likama bakaimiela Ngene. ⁴³ Petelo aumowaka mbile emoi ta Jopa, ambe buto amoi lina linde Simona.