¹ Petelo la Yoani bakambaka batolila eté ta Tepelo tambile e basomboli, ta saa e libwa. ² Botolomé amoi ono ambe Etukulu lo libotomu, bambaka batotola ye la batota ye basiyo batotina ta boinda bo Tepelo botomoko mbo boolo, loka lolengila lifaefi li ngandi ta beke batoota ta Tepelo. ³ Akaena Petelo la Yoani batoota taTepelo akalengilsa bo lifaefi li ngandi. ⁴ Ongoma Petelo, la Yoani, akatela ye baiso la akabeka linde mbo: moileke'su! ⁵ Ongoma la akatela bo botema, oenyela kembo atoosha lifaefi limoi ta bao bibo. ⁶ Petelo akabeka linde mbo, falanga la nbgele la batalé ba loketi loiti layo, ndjo ye imbe lange, lotofayo yamo. Ta lina liya Yesu Kilisito a Nasaleta, emalaka la kendaka! ⁷ Akaunda ye ta boo bolomé, la akaemalisa ye, la mangu batindi la bakakalaka binde bakangema. ⁸ Akatila tila, akakenda la akaka libo ndole emoi kota Esongamelo atokenda kenda ato tila tila la akasimola Mungu. ⁹ Baito batotina be bakaena atokenda la atosimola Mungu. ¹⁰ Bakaluwa mbo imbe ono angalakase felo i boinda boolo bo Esongamelo loka lolengila lifaefi li ngandi la bakawala la limwali ta litina li lobeko leke lokomelaka ye. ¹¹ Ani eititikale ye Petelo laYoani , baito baka mwala la bakaka mangu elo embe bo, ta balele baya Salomo ani batomwala fafo. ¹² Ekaenaka Petelo ani akabeka libo mbo, Batolomé ba Isaelaele, otomwalai buto ono loka loingi? la loka loingi otomoile'su, yomba mbo imbe loka lo bofoka wiso la liengani liso ndjo tokakendisa buto ono ? ¹³ Mungu ay'Abalayama, la Isaka, la Yakobo, Mungu a ba ise biso, akafa bokowa winde Yesu lokuku, ono owanakai ye, la ofekakai ye felo iya Pilato, ani akaotena lobeko mbo otei yese ta bonyololo. ¹⁴ Enu ndjo okafekai ono botanu, la liengani, la okalengilai ngbengbele ambe boiti bo baito. ¹⁵ La ositai Bokota bo liwawi, kolaongoma Mungu akafufukisa ye ta bangbei, la tombe baeni la babekeli. ¹⁶ Imbe la litina lio imila lina linde loka lina linde ndjo likaangemisa ono buto otooilai,ono oluwi ye, imbe oimila Yesu mbo aofa buto ono bindo bofoka ta baiso bino batotina. ¹⁷ Nde ko kanikani, Banduku, loluwi mbo okelei ongoma lo boeno boliluwi namuna emoi la bekota bino. ¹⁸ Kolaogoma Mungu akaenganisa lamo leke lonangolaka ye ta benoko be banangoli batotina felo mbo Masiya ko linde atooka wale. ¹⁹ Kolaongoma, kikowakai, la kikolikai betema bino, tutakai ye loka otanisomoi la bobe loka mbile e liyeumi efoe ambe Ngene. ²⁰ La loka mbo atome Masiya ono akautchelomo enu, ye Yesu. ²¹ Iyengani mbo aumowe elo likolo kota mbile la loenganiso baoi batotina, bamo babekomo la Mungu ta benoko be benangoli binde etokelo bambile ee kwaala. ²² Mose abekaka mbo, Ngene Mungu ino atoemalisele'nu botondoli aiteni ii banduku bino kee'i, okakai ye ta baoi batotina bambo bekaka ye lino. ²³ Buto on aitooka bonangoli wamo, atoitomo fée katikati i baito. ²⁴ Betondoli betotina beke banangolaka, koakola ko ambe Samueli, banangolaka aleko basiyo bamo. ²⁵ Enu ombei baana ba betondoli la liokamani lieke Mungu akelaka la ba ise bino, akabeka la Abalayama mbo: befindi betotina be wenda betoutcholmo tandole e bofindi wao. ²⁶ Ekasilaka Mungu ofufukisa bokowa winde ta lingba, akatoma ye felo koni ambenu, loka loutchelen'u, loka buto labuto akikowe ta bobe winde.