¹ Ekaengaka basiyo tuku liondo, bakasondjamana batotina eske lomoi. ² Limiki likaokana lakolo futuku, limiki ke lofofo lo likama. likawala mbele etotina oko embe bo. ³ Ndame kee imbe ikaenena ambe bo, ikanana, ikangala ambe amoi la amoi likolo li botchwe bo buto la buto ibo. ⁴ Batotina bakawala fu la Bolimo botanu, la bakabeka la benoko besia ani embaka bolimo atafa bo baoi. ⁵ Bayuda be bambaka onga ta Yelusaleme, batolomé ba esomala Mungu, la befindi betotina be wenda bototina bi eni sekala. ⁶ Ekasilaka limiki liamo okana, likama li baito baka sondjamana ani batomwala, loka bambaka batoota-bo buto la elombo linde, buto la elombo linde. ⁷ Bambaka la lotolilmo la limwali, la bakabeka ani, tene! be batotina batoleka eke, baiti Bagalilaya? ⁸ Loka loingi totooka-bo ta elombo liso buto la elombo linde, buto la elombo linde? ⁹ Tombe basiya Bafatatia, la Bamadaya, la Baelama; basiya baito ba Mesopotamia, la Yuda, la Kapadokiya, la Poto, la Asia, ¹⁰ la Fulukiya, la Pafulia, la Egipito, la boke bo libwa la boki bo Kulene; basia beenda be Baloma,la Bayuda, libo beke bakaoki kowa Bayuda, ¹¹ La Bakeletaya, la Baalaba. ongoma totooka bo ta benoko biso batobeka bakuwa bafibafi baya Mungu. ¹² Batotina bakatolima ta betema bibo la limwali, ani batobeka mbo: le lobeko lee litina mbo isani? ¹³ Baito basiya bakambaka batomola-bo mbo, baolewa baana ba loete. ¹⁴ Ndjo Petelo akaemala eseke lomoi la ba lioi la emoi, akaila limiki limnde likolo, akanangola ambe bo aniki, Batolomé ba Bayuda, lino batotina be bambe ta Yelusaleme, lobeko leke loluamane ambe enu, la okei baoi bange. ¹⁵ Loka be batoenenu bailewi baana kee ani etoenyelise enu, loka imbo, imbe ango mbile eya saso e lowa. ¹⁶ Imbe le lobekomoko ta bonoko bo botondoli Yoele mbo, ¹⁷ Mungu akabeka ani mbo: lotoutela baito batotina bolimo wange. bana bino batolomé, la bana bino bataali batotondola,la liemba lino batoena lienesi, la batoolo bino batota saki. ¹⁸ La bekowa biange, batolomé la baatali, ta basio bo lotoutela bo bolimo wange, la batotondola. ¹⁹ Lotoesa mbeko i- ilo mbo la likolo, la befoono eniki nse, la ngelo, la imbe, la batumba ba boi. ²⁰ Lowa lotokikokwa lilima labondofa botokikowa ngelo, felo-i loyo lo lisiyo liya Ngene, lisiyo liamo lifi, lisiyo li taala. ²¹ La ono ambotayaka lina liya Ngene atouwisomo. ²² Batolome bo Yisalaele, okakai be baoi! Yesu a Nasalete, buto ono Mungu aka beka felo ino ta tokesa, to limwali la ndembe ye akawa linde aiteni ino, ani eluwi enu wngene; ²³ Buto ono akafomo ta likomanyi liye likambaka ta baenyeli baya Mungu, oikaitakai ye ta lieka, okaitaiye ta bao ba baito babe. ²⁴ Mungu akafufukisae, la ofoyae ta likandomu li lingba, loka mbo yeikaenganaka linde aundomo elo. ²⁵ Loka Dawidi akabeka linde mbo: Lokaenaka Ngene felo yange, loka akambaka ta boo wange bo bolome, loka kembo boikpakase. ²⁶ La aleko botema wange bombe la liomali, la lolame bitomba ta lilendelu, ²⁷ loka oimbotika bolimo wange ta eseke lo bangbei, la oimbotika boengani wao aene liseisomu. ²⁸ Oluwisei ndole ee liwawi, otowalisei la liomali felo yao. ²⁹ Banduku batolome, tikekeni koni kobeke lino fololo loka loya ngau Dawidi mbo; Angbaka la aombomo ta mbila inde imbe aiteni iso tii kowa boni. ³⁰ Ani embaka ye bonagoli, la akaluwaka mbo Mungu alakaka ye ta lilapi loka longalisa amoi ta bofindi winde ta keka inde, ³¹ imbe lofufuko loya Kilisito yeke akomanyaka la abekaka, mbo aitikomu ta eseke lo bongbei, la bindo binde biei toola. ³² Loka loya Yesu ono, Mungu akafufukisae, la esu atotina tombe baeni ta lobeko lamo. ³³ La ongoma aosila oilomo likolo ta boo boya Mungu bo bolome, la aosila oosha lolakomo lo Bolimo Botanu boya Afa, afoutayo lani otenai la otookai. ³⁴ Loka mbo, Dawidi aitaka lila ta bose, la ye akabeka mbo, Ngene aobeka la Ngene angene mbo, ngalaka ta boo wange bo bolome. ³⁵ Tii kani lombotaka bayiyano bao kee ee maliselo lo bakolo bao. ³⁶ Kola ongoma tikaka mbo bofindi bototina bo Yisalaele baluwe la weli mbo Mungu aosela ye Ngene la Kilisito, ye Yesu ono okataliyai ye ta lieka. ³⁷ Ekaokaka bo ongoma bakateya betema, la bakabeka la Petelo la Batomomu basiya mbo, tokele isani banduku? ³⁸ Petelo akabeka libo mbo, kikoliakai betema, la lufuomokoi amoi la amoi ta lina liya Yesu Kilisito loka lo limesila li bobe wino, la otoshai lisno li Bolimo Botanu. ³⁹ Loka mbo lolakomo lamo lombe loka lino, la bana bino, la beke batotina bambe esika, beke batotina Ngene iso Mungu abotaka bo. ⁴⁰ La ta be baoi likama, bakabeka libo, la bakafa-bo bofoka, obeka mbo: uwisomokoi ta ene fectho ebe. ⁴¹ Beke baimilaka lioi linde bakalufimo; la ta lisiyo-limo, loketi lo baeki lokamba likama la loketi lo beke baimilaka lombaka elefu isaso. ⁴² Bakaimuwa ta likisomu li Batomomu, ta losamo la banduku, la lobuno lo boila, la ta basomboli. ⁴³ Bowa bombaka libo batotina, la tokesa to limwali lika womoko ta bao ba Botomomu. ⁴⁴ Baimieli batotina bakambaka eseke lomoi, la bakambaka la biongo bibo ta eseke lomoi. ⁴⁵ Bakaungisa biengo bibo la bilanga la bakaana bioo ta baito batotina ani embaka bo la yeme. ⁴⁶ Kila lisiyo bakambaka ongala eseke lomoi la botema bomoi aiteni ee Tepelo *[Esondjamanelo], la bakabuna bokati ta kila mbele la bakaana bieka ta liomali la wewe ta betema. ⁴⁷ Ofa Mungu lokuku, la oosha ngbengbele ta baito batotina. Ngene aleko akataliya lisiyo la lisiyo beke bakambaka batouwa.