¹ Ee Teyofili, lokasonaka lokasa lo felo ta litina li ndjaso itotina yeke Yesu akoolaka okela la lokiso, ² tii lisiyo lieke alilaka ta bose, oko ekaosilae oekisa batomomu, beke achakolaka, ta bofoka bo Bolimo Botanu. ³ Mbisa inde oena wale, akaenisa ta beke bambe la liwali, ta tokesa to bule bieke bieti la fiye. Akaenena libo basiyo tuku inati, la akabeka ndjaso ye imoili bokota boya Mungu. ⁴ Ekambaka ye libo eseke lomoi, aka laka bo mbo baifowaka ta Yelusaleme, la baumbakeleke lolakomo loya Afa. Akabeka mbo: osilai ooka ta bonoko wange. ⁵ Lokambo Yoani alufiaka ta baye, enu otolufiomoi ta Bolimo botanu ta basiyo bake. ⁶ Mbisa ibo iyotamana eseke lomoi, bakaiyolae mbo, Bonangoli, otobinoisela Yisalaele bokota ta eni mbile? ⁷ Akabeka libo mbo: Yeiti lobeko lino looluwa mbile lamba lolakomo leke Afa akaota ta bokota winde. ⁸ Otoshai bofoka, bo Bolomo Botanu botoya ambenu, la otombai babekeli bange ta Yelusaleme, la Yudeya itotina, la Samaliya, la kota liko li wenda. ⁹ Mbisa inde obeka ndjaso ye, akalila, ani batoenaye, la lifita likaufae ta baiso bibo. ¹⁰ Ani ekambaka bo batomoila, ani atoka ta bose, la baito baele bakaemala oko embe bo, babati tulu ifufu, la bakabeka mbo: ¹¹ Batolome ba Galilai. loka loingi otomoilai ta bose? Kooko Yesu, akafoyomo ambenu loka looka ta bose, amboyaka amboko ta bomuna okaenai ye oota ta bose. ¹² Lambisa bakafowa ta longo lo Bilaya ofowa ta Yelusaleme longo lomoi lombe tinatina la Yelusaleme esika kee lokendolo lisiyo li Yenga. ¹³ Mbisa ibo iyokoma, bakalila ta ekende lo mbele lo basomboli elo embaka batokpa ilo; Bambaka beke: Petelo, la Yoani, la Yakobo, la Adeleya, la Filipo, la Toma, la Balatomai, la Matayo, la Yakobo wana aya Alafai, la Simona Moselota, la Yeda wana aya Yakobo. ¹⁴ Batotina bakaumowa la botema bomoi la bofilili ta basemboli, la bataali, kee Maliya inango a Yesu, la banduku binde batolome. ¹⁵ Ta mbile amo Petelo akaemala aiteni ii banduku, baito beke bangalaka eseke lomi bambaka miya emoi la tuku yele, la akabeka mbo: ¹⁶ Banduku, iyengani mbo tosiyo toenganisomo, ani Bolimo Botanu abekaka felo, ta bonoko boya Dawidi, loka loya Yunda, ono ambaka boandi felo wibo ta beke baundaka Yesu. ¹⁷ Loka ye aleko atangomo amoi iso, la akaosha ekende linde lo likuwa. ¹⁸ Ye Yuda akasomba elanga la lipimomu li bobe winde; Bindo binde bikakuma la soolo inde ekafaama la aleko la besolo binde betotina bikautomo se. ¹⁹ Lobeke leke lokaluamana ta Yelusaleme ta baito batotina, la elanga lamo lokatomo ta lioi libo, Akeledama, ilangi obeka mbo: "Elanga lo ngelo". ²⁰ Loka lo sononu ta buku bo Biele mbo: Tikaka mbo eseke linde lombe bule, la buto aingalaka onga. La buto asiya aoseke likuwa linde. ²¹ La aiteni ii batolome beke bangalaka liso mbile etotina oko enbaka Ngene Yesu looto la lotomoo liso, ²² owakola ta lilufi liya ayoani kota lisiyo lieke lifowaka Yesu aiteni iso, iyengani mbo amoi ibo ambe bobekeli ta lifufukomu linde ambesu. ²³ Bakataya baina ba baito baele, Yosefe, ono atomoko Balasaba, lina linde lisiya mbo Yusutu, la Matiya. ²⁴ Baka sombola mbo: Owe Ngene oluwi betema be baito ba totina, eniseke'esu ndai okachakolae ta be baito baele, ²⁵ loka atikale ta likuwa liee, la Batomomu ono yuda akakpase loka loyamo mbo ake ta eseke linde angene. ²⁶ Bakakusa bikende bi tosandu biochakola loka libo, lichakolomu likapkela Matiya, ta eseke lo Batomomu liou la imoi lika fomo linde.