¹ Embaka Petelo la Yoani batobekana la baito, baito ba bweli, la kapiteni la bakuki ba mbele Mungu, la Basadukaya, bakaya felo ibo, ² La bakasoma loka lo liekisi la linangoli ta baito mbeko i lifufukomu ta lingba loka loya Yesu. ³ Bakaunda bo, la bakakusa bo ta ekandolo kota lisiyo limbisa loka imbaka oko la likolase. ⁴ Kolaongoma likama li baito be baokaka liyo lioi, bakaimila, la loketi lo batolomé loka lila kota bilefu liondo. ⁵ Ta lisiyo limbisa, bekota, la batoolo ba boki, la baandiki ba bikela bakasondjamana ta Yelusaleme. ⁶ La Ana, buto a weli, la Kayafa la Yoani, la Alesandala, la basiya ta libotomu li buto a weli. ⁷ Bakaemalisa Petelo la Yoani katikati ibo la bakaiyola mbo, ta eni bofoka, la ta lina liya ndai okakelai yo? ⁸ Kolaongoma, Petelo akawalisomo la bolimo botanu, la akabeka libo mbo: bekota be baito, la bakumi ba Isalele, ⁹ Loka esu tosioyolomo laboni loka ol likuwa litanu likakelemo ambe ono buto a Etukulu, mbo auwe isai, ¹⁰ Kanga mbo iluwané ambe batotina la baito ba Isalaele, mbo, ta lina liya Yesu Kilisito buto a Nasaleta, ono okaitakai ye, la Mungu akafufukisa ye ta bangbei, la loka linde ono buto afoemala felo ino la bindo bofoka. ¹¹ Yesu Kilisito ambe litalé likafekomo la bashwei, ye aomba buto a liko. ¹² liuwesi lieti ta lina li buto asiya, loka lina lisiya liefomu liso eke ta wenda loka touwisomo lamo. ¹³ Enaka bo bofilili boya Petelo la Yoani, la eluwaka bo mbo baitilendelo ksa, la baitiekisomo mbeko, bakamwala la bakaluwa mbo bakaimila wewe mbo bambaka la Yesu eseke lomoi. ¹⁴ Kolaongoma enaka bo auwaka,atoemala eseke lomoi libo, baiti luwa obinoisa lioi ango limoi. ¹⁵ Bakafa bo ishosha iyotomowa lousa lo esongamelo, ani batobekana, ¹⁶ Tokele isani loka lobe baito? loka iluwamane fololo la baito batotina be bambe ta Yelusaleme mbo ikesa imoi ifoenganisomo loka libo, la toiyengani ofeka yo ango iniyo. ¹⁷ Kanga mbo totele bo ekala mbo bailekaka ale la liye lina ambe buto ango amoi, loka lo le lobeko loimeanaka ta kenge isiya. ¹⁸ Ongoma bakata bo lioi la bakabeisa bo mbo, baibekaka la baiyekisaka ta lina liya Yesu lisiyo ango limoi. ¹⁹ Ongoma Petelo la Yoani bakabinoisela bo ani, tolitise'nu lamba tolitise Mungu, tenakai lobeko lamo. ²⁰ Yomba loka lo baoi baluwi esu labe bakaoke'su, toimbo tika obeka yo. ²¹ La bakaotela bo londo lisiya la bakasombula bo ta ekandelo, loka batiena ango likutchi liofaya bo, loka lo baito likama, loka mbo batotina bambaka batosimola Mungu ta lobeko le lokakelomo. ²² Loka ono buto, bofoono bo liuwesi bokakelomo ye, ani akaosila oetisa miaka tuku inati. ²³ Mbisa iyotika bo, Petelo la Yoani bakatuta baito bibo, la bakaoshamana la itotina yeke bekota la bakumi babekelaka bo. ²⁴ Tambile eokaka bo ongoma, bakaila limiki ambe Mungu batotina eseke lomoi mbo: Ngene, ono aka kela lobola, la nyele, la libande lifi, la itotina ye imbe, ²⁵ Okabeka ta bonoko boya Dawidi bokowa wao, ise iso, la bolimo botanu mbo, mbo befindi be wenda be okelaiyeli la baito baoluka bieli lilingela loka loingi? ²⁶ Bekota be wenda basiemala, batoolo baosongamana, baemaele Ngene la Kilisito. ²⁷ Loka mbo bakasondjamana ta boki we loka loya Yesu, bokuwi wao botanu weke okauwako wo baina. Elode, la Pilato, la baito ba wenda eseke lomoi la baito ba Isalaele. ²⁸ Bakasondjamana okela itotina loka ini loka boo wao la lisangi liyao felo mbo ikelomo. ²⁹ Nde kanikani, Ngene, tene londo libo la faka bekowa biyao ndole mbo baluwe la weli lioi liayo ta bofilili bototina. ³⁰ Ani etoilowe boo likolo, loka lo liuwesi la loka lokela tokesa la bamwali ta lina lia bokowa wao botanu Yesu. ³¹ Embaka bo batosembola, Esongamelo loka tuka tuka. Batotina bakawala la Bolimo botanu, la bofoka bakanangola lioi lya Mungu. ³² likama libaimieli bambaka batotina la botema bomoi la baenyeli ko bamoi. yomba mbo amoi ibo aokaomba la leka,aitobeka mbo lombe lange angene,kanga mbo bieka bitotina bimbe bibo lisanga. ³³ Batomomu baka nangola la bofoka likama lobeko lo lifufuki liya Ngene Yesu, la lisungi lifi ambe bo batotina. ³⁴ Katikati iye itotina yeitimba la buto aenoko leka, loka batotina be bambaka la bilanga, imbe e mbele, bakaungisa yo, la kakaya la falanga la loketi leke batchambitchaka layo. Bakasela se felo i bakolo ba Batomomu. la bakaana yo ambe buto la buto oengana la yeme inde. ³⁶ Yosefe, Molewi a boki bo Kupulu, ono Batomomu bakafa ye lina liko Balanaba, litina mbo wana a beimo, ³⁷ Ambaka la elanga, akaungisa la akaya la falanga felo ii Batomomu.