¹ Akaka lisiya ta Delebe la Lisitula. La moilakai, imbaka onga la boeki bomoi lina linde Timote, wana botolome a botaali bo Moyuda a kimia la botolome a Geleke. ² Banduku baya Lisitula la Ikoneyo bakuwelaka ye lilendelu lilo. ³ Paulo asamaka oya linde; la, aosaka ye, atenaka litina loka lo Bayuda beke bambaka ta biseke biamo, ta mbo bo batotina baluwaka mbo ise inde ambe Mogeleke. ⁴ Oeta ta boki bofi, abekelaka banduku mbo bamoile lisomi li batomomu la batoolo ba Yelusaleme. ⁵ Mbele ii Mungu imbaka la bofoka ta liimeli, la otaliyaka botuku bo baito lisiyo la lisiyo. ⁶ Efekilomoko bo mbo bainangolaka lioi li Bolimo Botanu ta Asiya, la lekisaka ta Filigiya la boki bo Galatiya. ⁷ Bakomaka tina la Misiya, bakomanyaka mbo baote ta Bitiniyani; Bolimo boya Yesu bofekilaka bo. ⁸ Babekaka ongoma ta Misiya, la basuluwaka ta Towase. ⁹ Ta mbile elotiyo, Paulo ataka saki: Botolome amoi a Mekedoniya atomoelaka ye, la asomboelaka ye lisomboli: Etaka la Mekedoniya, osunge'su! ¹⁰ Mbisa ii saki iya Paulo, tolukaka la mangu atute'su ta Mekedoniya, la baenyeli mbo Ngene ateke'su lioi loka tonangole mboli ilo. ¹¹ Ekaka ye ta Towase, toufomoko elamo ta Samotalase, la botembale baundakaka esu ta Neapolisiya. ¹² Elamo ndjo tokaka ta Bafilipiya, ime boki bofi bofelo-felo, bo Mekedoniya, la tombaetisaka basiyo bakikelike ta weke boki bofi bo Mekedoniya. ¹³ Lisiyo li Yenga, tokaka, lousa lo boinda ta pembeni ii isolo, endei toenyelaka mbo itomba eseke lo basomboli. La tobekaka la bataali beke basondjamanaka. ¹⁴ Amoi ibo lina linde Lidiya, baungisi ba pulupe, ta boki bofi bo Tulatila, embaka botaali bomoi obanga Mungu, la aokaka Ngene alikoelaka ye botema, loka alaile la weli yeke ibekaka Paulo. ¹⁵ Ta mbile elufiomoko ye, la bofindi winde, alengilaka liso ani: Yomba mbo otosambeni boimili ambe Ngene, otaka ta mbele ange, la ngalaka onga. ¹⁶ Kee ani etoke'su ta eseke lo lisomboli, bosungi bomoi botaali weke bombaka la bolimo bo pitane, la ye, ambaka la weli bo li'iya lifi ambe boekesi waibo, ambe felo iso, ¹⁷ la atute'su, Paulo la esu. Amamaka: Batolome bambe basungi baya Mungu ono ambe likolo, la batonangoele'nu ndole ee liuwesi. ¹⁸ Akelaka yo basiyo likama. Paulo akaolewa akakikowa la mbisa, la akabeka la bolimo: Lotobeka lao ta lina liya Yesu Kilisito, foyaka ono wana botaali lousa, la akafowa kota mbile amo. ¹⁹ Baekesi baya bosungi botaali, oena ani elimowaka liimeli libo, baundomoko la Paulo la Sila, bachelewaka felo ii baito likama la felo ii basambisi. ²⁰ Baenisaka felo ii basambisi obeka: Batolome be bato-buyanisa boki bofi wiso; ²¹ imbe Bayuda, atobeise'su bokoko weke toiyimili la wo oanya ango lotuto, ambe'su beke Baloma. ²² Linginda loko liemaelaka bo, bakabasitiki, bakelaka namuna ee fayaka tulu ibo, la balamolaka baume bo totumbo. ²³ Mbisa iyouma bo bangumi, bakusaka bo ta bonyololo, la obekaka la bokuki mbo akuke bo bolo. ²⁴ Bokuki eyanyaka ye ishosha iyokusa bo ta kati-kati ii bonyololo, la bataliyaka bo chuma ta batindi. ²⁵ Ta kati-kati elotiyo, Paulo la Sila basombolaka la ochwa beele beya Mungu, la bakandomu balailaka bo. ²⁶ La mangu imbaka la lotuko-tuko lo nyele, la litina mbo liako li bonyololo likalikolamana; kota mbile amo, beinda betotina kale, la lioamani li baito ba bonyololo liwalaka. ²⁷ Bokuki akalingowa, la, mbile e'enaka ye beinda bee bonylolo kale, aosaka kembe inde la akaka mbo aite bo, oenyela mbo baito ba bonyololo baokimbiya. ²⁸ Paulo amamaka la limiki lifi: Oikelaka buto ango amoi bobe, tombe esu atotina eke. ²⁹ Bokuki, alengilaka liangangi, o'ota mangu-mangu, la akaya ta batindi baya Paulo la Sila la lobilimo; ³⁰ Atomoisaka bo, la akabeka: Ngene lokele ase ingi loka louwisomo? ³¹ Paulo la Sila bamutolaka ye mbo imilaka Ngene Yesu, la otouwa, owe la bofindi wao bototina. ³² La banangoelaka lioi liya Ngene, ta mbo itotina yeke ikambaka ta mbele ao. ³³ Aosomoko linde, kota mbile emoi ee lotiyo, aso'olaka bafwa bibo, la mangu alufiomoko, ye la banduku binde. ³⁴ Akaka libo ta mbele inde, akayela bo bieka, ls somslsks libo atotina la bofindi winde aniki emiyelaka bo Mungu. ³⁵ Endjaka bose, bakandisi batomaka basola loka ba beke la bokuki: Atike beke batolome. ³⁶ Bokuki abeisaka Paulo mbeko imoi: Bakandisi baotoma baito mbo lotike'nu; kani-kani tomowakai, la kakai la kimia. ³⁷ Paulo akabeka la botomomu mbo: Mbisa iso iyoumomo la totumbo felo ii baito batotina la ndosambisomo, esu beke tombe Baloma, akuseke'su ta bonyololo, la kani-kani asami atomoise'su ta wisakumbo! Yeimbokelomo ongoma. Bayeke bo angene batikele'su kimia. ³⁸ Batomomu batolaka beke baoi ambe bakandisi, ndai abangisaka bo mbo bambe Baloma. ³⁹ Baengani okotomo, la baengani otikelomo, la osomboela bo bafowe ta boki bofi. ⁴⁰ Ta mbile etomowaka bo ta bonyololo, baotaka ta mbele eya Lidiya, la. mbisa iyoena la onangoela banduku, bakaka ta boki bofi.