¹ Batolome basiya, bakafowa ta Yudeya, bakaekisa banduku, obeka mbo: Yomba mbo oitaka tenomoi itombe itombe otutana la tokpelo toya Mose, oimbouwisomoi. ² Paulo la Balanaba baka'akola libo fiye la libeki fafo; la banduku bakabeka mbo Paulo la Balanaba, la bamoi bibo, balile ta Yelusaleme elo embe Batomomu la bakumi, loka lokomanya leke lofelo. ³ La mbisa iyokenda la Mbele Mungu, bakatuta ndole ibo oetela ta (phenicie) la Samaliya, ani batobeka likikolomu li Bapakano, la bakaesa limali lifi fafo ta banduku batotina. ⁴ Bakakoma ta Yelusaleme, bakayambomo la Mbele ee Mungu, Batomomu la bekumi, la bakabeka itotina yeke Mungu akawaka libo. ⁵ Bamoi ta ekende lo Bafalisai, beke baimilaka, bakaemala, la aleko bakabeka mbo: Iyengani la otena itombe Bapakano la obekela bo bamoile bikela biya Mose. ⁶ Batomomu la bekumi Bakangala eseke lomoi loka loomoila lo lobeko. ⁷ Fiye la fiye ifi baka akola, Petelo akaemala, la akabeka libo mbo: Banduku batolome, oluwi kembo kowaala Mungu aowa lichakolomu aiteni ino, loka, ta ndole ee bonoko wange, Bapakano bakaoka lioi li linangolomu la bakaimilia. La aleko Mungu, ono aluwi betema, akabekela loka libo, akafa ba Bolimo Botanu kee esu; ⁹ aikawa litekanisomu ango limoi ambe'esu la libo, akataanisa betema bibo ta limeli. ¹⁰ Kani kani, loka loingi otopimai Mungu, ta ndole eota ta ngingo ee baeki bolito weke baise biso lamba esu toikatolakai? ¹¹ La ngbengbele eya Ngene Yesu ndjo tokaimila louwisomo, Kanda emoi aleko libo. ¹² Mbele ee Mungu etotina bakangala haï, bakaoka Balanaba la Paulo, batobeka tokesa tototina to limwali yeke Mungu akakelaka libo aiteni ii Bapakano. ¹³ Mbile ekasilisaka bo obeka, Yakobo akaosha lioi, akabeka mbo: Banduku batolome, okekeni! ¹⁴ Simona aobeka eni kanda Mungu akamoila koni ta bapakano loka lochakolaaiteni ibo buto ono ambotolaka lina linde. ¹⁵ Ta yamo ndjo itoenganisomo baoi ba benangoli, ani ikasonomo mbo: ¹⁶ Mbisa ii yonga, lotoya lisiya, lomboilaka likpomu se libo la mbele eya Dawidi, lombo komanyaka liseisomu, la lotochua lisiya, ¹⁷ loka mbo beke batikali ta baito baluke Ngene, la bapakano batotina beke lina lianga litotomo, Ngene akabeka, ono akakela yo ndjaso, ¹⁸ ambe ye iluamani kota kwaala. ¹⁹ Kola yamo lombe la baenyeli kembo toimbotai liembu ta bapakano beke bakaimila ambe Mungu, ²⁰ kanga tosonole bo bafowe ta lilo li befono, bolefe, nama yeke ikaongba la ngele. ²¹ Loka, kota fecho, Mose ambe ta kila boki baito beke batonangola ye, loka bakambaka bato tanga ye basiyo batotina ba Yenga ta esondjamelo. ²² La ikaenena bolo ambe batomomu la biange, la mbele ee Mugu etotina, bachakole aiteni ibo la batolome ta Atiokia, Paulo la Balanaba, Yunda ono akatomo mbo Balanaba la Sila, batolome ba lokuku ta banduku. ²³ Bakatoma bo la lokasa loka sonomo ani: Batomomu, biange, la aleko la banduku, banduku aiteni ii bapakano, beke bambe ta Atiokiya, la Sulia, la Kilikia, kalibo! ²⁴ Tofoka mbo batolome bamoi bakafowa ambe'esu, beke toikafaka ango bo ishosha, baotungise'nu ta ndole ee baoi libo la yo'okpesa belimo bino. ²⁵ Tofoena mbo ta yo ndjaso, mbisa iso iyotowamana eseke lomoi, tochakola batolome la totomele'enu bo la basamomu biso Balanaba la Paulo, ²⁶ beke bakaosila oota liwawi libo loka lo lina liya Ngene iso Yesu Kilisito. ²⁷ Tootoma Yunda la Sila, bondjo bato bekele'nu ta bonoko wibo ye ndjaso. ²⁸ Loka mbo iyenene bolo ta bolimo Botanu la liso toitalieleke'enu bolito bosiya, kanga koye mbeko imbe ilo, ²⁹ mbo ofekei bieka bikafomo ta bofono bikelekenda, la ngelo, la nama ikaongba, la bolele, okaokukamanai ta ndjaso ye otokuwai la weli. Tikalakai la weli. ³⁰ Mbisa ibo iyototomomo, bakakoma ta Atiokiya, bakatowanisa Mbele ee Mungu la bakafa bo lokasa. ³¹ Mbisa iyo tanga, banduku bakaomala ta lilendisomuliamo. ³² Yunda la Sila, beke bambaka banangoli, bakalendisa bo la bakafa bo bofoka lisiya. ³³ Bakaumowa onga mbile emoi, banduku bakatika bo obinowa la haïta beke batomaka bo. ³⁴ Mbile etotina Sila akaena bolo mbo atikale. ³⁵ Paulo la Balanaba bakaumoa ta Atiokiya, batoekisa la batonangola, ta babule basiya, mboli ilo ii lioi liya Ngene. ³⁶ Mbisa ii basiyo, Paulo akabeka la Balanaba mbo: Tobinowe koni ta boki we tokanangolaka lioi liya Ngene, okamoila lamba banduku bambe isani. ³⁷ Balanaba akalingo ooka la Yoani, ono akatomo mbo: Malako, ³⁸ la Paulo aikaomala osaye ono atikaka bo ta Pamfulia la aikaka libo ndole emoi ta likuwa libo. ³⁹ Fiye efi ekatomowa loka imbe litina libo lioseamana. La Balanaba, akaosa Malako, la akaaka la lisuluwi elo ta botungu bo Kupulu. Paulo akachakola Sila, la akaaka, ekasilaka banduku ota ye ta ngbengbele eya Ngene. ⁴¹ Akaeta ta Sulia la Kilikia, atofa bofoka ta mbele ee Mungu.