¹ Elo ta Ikoni Paulo la Balanaba bakaota koni ta esondjamelo lo Bayunda, la Bakakusae mbo likama li Bayunda la baela bakaimila. ² Ndjo Bayunda beke bakafeka oimila bakatombokisa bapakano la bakaenyelisa bobe ta banduku. ³ Bakaumowa mbile likama, la bakanangola la bofilili loka loya Ngene, ye aleko akambaka atobeka loka lo lioi li ngbengbele inde; akambaka aleko atofa tokesa to limwali bieke bikawomo ta bao bibo. ⁴ La likama li baito ta boki baka'anana, basiya bakamba ambe Bayunda, la basiya ambe batomomu. ⁵ Bapakano la Bayunda, bakambaka eseke lomoi la bekota bibo, baka akola omola bo, la ouma bo babuki, ⁶ Paulo la Balanaba, bakaluwa, bakaka okaisama ta beki be Lukaonia, Lusutula, Delebe, la tafangi onga tina tina. ⁷ La bakanangola aleko mboli itanu elo. ⁸ Elo ta Lusutula, ekangalaka buto amoi ono akumaka bakolo, elema lo libotomu, la aikakendaka ango lisiyo. ⁹ Akaoka Paulo atobeka. La Paulo, akamoila ye la akaena mbo akambaka la limeli loka mbo auwe, ¹⁰ akabeka la lomikili lifi mbo: Emalaka ifitika ta bakolo bao. La akaemala akakenda. ¹¹ Otutana ta yeke Paulo awaka, linginda bakaila limiki, la bakabeka ta lioi li Lukaonia mbo: Ba mungu ta bofono bo baito baokomele'esu. ¹² Bakata Balanaba Yeu, la Paulo Eleme, loka ye Ndjo akambaka la lioi. ¹³ Bokumi bo (Jupiter), ono Tepelo Ekambaka ta bo'otelo bo boki, akatolanama la bikende bi tulu ta beinda, la akawalaka, kembo linginda bakese liano. ¹⁴ Batomomu Balanaba la Paulo, bakaoka ongoma, bakafaa tulu ibo, la bakaka la mangu aiteni ii linginda, ¹⁵ bakambaka mbo: O baito, loka loingi otowai ongoma? Esu aleko tombe baito kee enu; la totoele'nu mboli itanu, totobeka lino mbo otikei yo ndjaso ibule, loka okei ambe Mungu Ono a liwawi, ono akawa bose, la nyele, libande lifi, la itotina yeke imbe. ¹⁶ Mungu, ta basiyo bakaeta, akatikaka befindi betotina ba tute ndole ibo engene; ¹⁷ imbe ende ani eikatikakae obeka ta ye imbe, okela bolo, la otomele'nu ta Bose ndjaluke la biula bilo, la ofenu bieka bi bule la ofenu aleko liomali ta betema bibo. ¹⁸ Ta bo baoi, bakafekila linginda mbo baitaka ye liano. ¹⁹ La ikambaka ta Atiokiyala Ikoni Bayunda beke bakambaka la linginda, la mbisa ii youma Paulo la babuki, bakatomoisae lousa lo boki, ta baenyeli mbo aongba. ²⁰ Baeki bakalingilae, akaemala, la akaota ta boki, elengo lamo, akaka ta Delebe bola Balanaba. ²¹ Mbile enangolaka bo ta wo boki la bakakela baeki, bakabinowa ta Lusutula, la Ikoni la Atiokiya, ²² baka angemisa bolimo bo baeki, ofa bo bofoka loka baumowe ta limeli, la obeka mbo ta ndole ee bemusi ndjo likama tombo'otaka ta bokota boya Mungu. ²³ Baka chakola batoolo ta kila mbele ee Mungu, la, mbisa ii yosembola la okila bieka, bakatika bo ambe Ngene, ono bakaimielaka ye. ²⁴ Bakalekisa ta Pisidia, baka koma ta Pamfulia, ²⁵ bakanangola lioi ta Pelege, la bakasuluwa ta Atalia. ²⁶ Elo bakaka ta Atiokiya, loka bakatomomoko ta ngbengbele eya Mungu loka lo likuwa lieke bawaka. ²⁷ Mbisa ii likomi libo, bakata Mbele ee Mungu, la bakabeka itotina yeke Mungu akawaka libo, ani ekalikolelakae ta Bapakano bo limeli. ²⁸ Bakangala mbile esa la baeki.