¹ Ekaetaka bo katikati i Amfipoli, la Apolonia, bakakoma ta Tesaloniki, elo embaka esongamelo lo Bayuda. ² Paulo akaota libo, kanda emoi la bomuna winde, ta sabata isaso akatana libo fiye ta lobeko lo Tosiyo. ³ Akatomoisa litina, la akabeka mbo fololo mbo iyengani la Yesu oena bomusi la ofufuka ta bangbei, la akabeka mbo, loka loya Yesu ono loto nangoelenu, ye ndjo ambe Kilisito. ⁴ Basiya aiteni ibo baimilisomo, la bakangala eseke lomoi la Paulo la Sila, la likamali Baela basimoli baya Mungu, lamwa ikakama i bataali ba lokuku. ⁵ Ndjo Bayuda bakaoka itshome, la bakaosa batolome basiya ba basendji, baito ba liyeye, baka toamanisa likamali baito, la bakasomisa boki. Bakatilela mbele eya Yasona olinga Ba-Paulo mbo batomoise bo felo i baito. ⁶ Ani eikaosha bo Ba-Paulo, bakalutana la Yasona labanduku basiya ambe batoolo ba boki, batomama mbo, baito bo, baosila oana wenda, baokoma aleko eke. ⁷ Yasona aka tukumaela bo. Bo batotina batoseisa bikela biya Kaisala, la batobeka mbo bokta bosiya ambe Yesu. ⁸ Ekaokaka likama li baito, labatoolo ba boki, mbeko ye, betema bibo bika folomo. ⁹ Ekasilaka bo oosa tosiyo toya Yasona la basiya bibo, bakatomoisa bo. ¹⁰ Banduku bakatoma Paulo la Sila la mangu lotiyo ta boki bo Beloya. Ekakomaka bo elo, bakaota ta esongamelo lo Bayuda. ¹¹ Bo elo baetaka Batesaloniki la bolo likama, loka baotukumela Lioi la yeme likama, la baotanga tosiyo kila lisiyo, omoila lamba mbeko yamo imbe kongoma. ¹² Kolaongoma likama libo bakaimila, la bataali ba lokuku ba Baela la ikakama i batolome aleko. ¹³ Ndjo oko elembelaka Bayuda ba Tesaloniki mbo Paulo aonangola Lioi liya Mungu ta Beloya, baka onga oyatungisa la osomisa likama. ¹⁴ Kolangoma banduku bakatoma Paulo la mangu mbo ake ta bomongo bo baye, ndjo Sila la Timote bakaumoa onga. ¹⁵ Bakendisi baya Paulo bakakesa ye kota Atene, ndjo bakanya baoi loka loya Sila la Timote mbo baye elo embe ye mangu, la bakabinoa. ¹⁶ Oko embakaPaulo ato umbakelabo ta Atene, akaena mbo boki bowali la befono, ndjo bolimo winde bokaoka bobe aiteni inde. ¹⁷ Kolangoma katikati i esongamelo akatana fiye la Bayuda la beke batosimola Mungu, la ta liongo lisiyo la lisiyo bakatoana linde. ¹⁸ Basiya baito baweli kee Baepikuli la Basetoa bakao shamana linde aleko. Bamoi bambaka batobeka mbo, Bobekibeki ono ambe la yeme iyo beka ingi? Basiya baka beka mbo, atoenena kee bonangoli bo mungu e beenda; loka mbo ambaka atonangola Yesu, la lifufukomu. ¹⁹ Bakaunda ye, la bakakesa ye ta longo lo Ale, labaka beka mbo, Toengani olembela lamba lonangolo loyai leke otobeka imbe ingi? ²⁰ Loka mbo otokisesu mbekoi beenda. Kolaongoma tombe la yeme toluwe lamba mbeko ye imbe ingi. ²¹ Baatene batotina, la benda beke bangali elo, baikaetisa mbile ta lobeko losiya, sakolo ko mbo babeke lamba batooka lobeko loyai. ²² Paulo akaemala ta longo lo Ale, la akabeka mbo, Batolome Baatene! Lofoena mbo ta mbeko itotina ofoetai osimola bamungu; ²³ loka mbo ekambekei lotokenda omoila bisongamelo bino, lokaena etumbelo lomoi lo mbeka bakasona mbo, LA MUNGU ONO AILUOMU. Kolaongoma, ono enu otosembolai ani oitoluai ye, ei loto nangola ye lino. ²⁴ Mungu ono akakela wenda, la biengo itotina aiteni inde, ye oko ambe Ngene a ikolo la sekala, la aitongala ta mbele ye ikakelomo la bao ba baito. ²⁵ Bao ba baito aleko baito kelela ye, kee mbo ye ambe la yeme ileka, loka mbo engene atofa baito batotina liwawi, la lifeumi, la bieka bitotina aleko. ²⁶ La ngau koamoi, aobotisa befindi betotina be baito batongala ta bienda betotina eke sekala; ao tshakoela bo bilaka la aotela bo ikenge ta bingaelo bibo, ²⁷ mbo balinge Mungu, labofilili mbo baengane ounda ye ta ndole eolinga ye, la loanyo ye. V 28 Aiti aleko esika ta amoi la amoi iso, loka mbo aiteni inde tombe la liwawi la totokenda la totomba. Kee bamoi ta tosiyo to biele bino baosila obeka mbo, Tombe aleko bofindi winde. ²⁹ Kolaongoma, eke embesu bofindi boya Mungu, yeiyengani liso oenyelisa mbo bomungu labomuna bo wolo, lamba palata, lamba litale, la leka losonomu la weli labaenyeli babaito. ³⁰ Ta mbile e boeno bo liluwi, Mungu aitoenyela yo, ndjo kanikani atonangola ta baito batotina ta biseke bitotina mbo bakikole betema. ³¹ Lokambo aosila otshakola lisiyo liamo oko etosambisa ye bienda betotina la wewe, la atosambisa bo la buto ono akaosila otshakola. Akaenisa baito batotina fololo mbo imbe wewe, loka mbo aofufukisa ye ta bangbei. ³² Ekaokaka bo loka lo lifufukomu li bangbei, basiya bakaseka tola, ndjo basiya bakabeka mbo, Totoko we lisiya ta litina li lobeko le. ³³ Paulo akatomoa libo ³⁴ Ndjo batolome basiya bakangala linde la bakaimila. Katikati ibo, Dionusi,bosambisi bo longo lo Ale, la botaali amoi, linalinde mbo, Damali, la basiya bibo eseke lomoi libo.