¹ Ta lobeko la lobeko ambe abanisomu, loiti lange la litina mbo losonele'nulokasa. ² Ongoma loluwi yeme ino iosunga; loto'osela lokuku loka lino ta baito ba Makedoniya loka bekowa baosila omba tayali kota mwaka we bokasieta; ongoma yeme ifi ino yo'ofa likama libo lishoshila. ³ Ongoma lototoma baina loka o'osela lokuku lange yeimbaka bule ta leke lobeko le la ngalakai ta yali, ani ebeki ei, ⁴ loka mbo yomba mbo Bamekedoniya bakaoya bakasiene'nu oitii ta yali, esu toto'oka soni mbo tokaoselaka lokuku ongoma. ⁵ Ongoma losienyela mbo lo'olengila banduku mbo bake felo iso la bakomanye felo loka lo lifaefi likakele'nu loka lo liano, mbo lingale tayali kee lifaeefi li lisangi lilo inga kee epo. ⁶ Imbe ongoma mbo ono atoloba iniyo ato'sha iniyo, la ono atoloba likama atosha likama. ⁷ Buto la buto akeleke ani elangi botema winde, inga la yeme ikikelike la losakumomo; loka Mungu asamiono atofa la limengo. ⁸ Mungu aluwi ofenu bafaefi batotina balo mbo ombei la bieka bibule mbile etotina ta katikati ii ndjaso loka mbo oenganisei bakuwa batotina la weli, ⁹ kolaongoma lo'osonomo mbo, ambe atomelisa, ambe atofaka tobube, botanu winde botoumowa layalaya. ¹⁰ Ye ono atofaka bofoo ta balobi la beila loka lo bieka, atofaka la atofulikisa yeke itolobe'nu, la atokondisa mboli ii botanu ambe'nu. ¹¹ Otongalai bafoka ta ndole itotina mbo otomoisei bafaefi bafi la yamo itouchelomo ambe Mungu la ndole iso. ¹² Loka mbo etokele'nu bakuwa balo beke, yeiti angon loka lo'osilisa boeno bo batanisomu yamo itoesa kelekele elikama ambe Mungu. ¹³ Likuwa lie litonangole'nu felo ii baito batosimolaka Mungu loka lo lilitesi lino ta mboli ilo iya Ngene yeke ikaimile'nu, la loka lo bofi bo bafaefi bino ambe bo la batotina. ¹⁴ Batosembolaka loka lino, loka basame'nu loka lo ngbengbele eya Mungu ene eluwani likama katikati ino. ¹⁵ Kelekele ambe Mungu loka lo lifaefi linde lieiti lio'longana obekela.