¹ Banduku, tolangi mbo oluwei loka lo ngandi iya Mungu ye ikaenena katikati ii liase li Makedoniya. ² Ta katikati ii lipimomu la bofi likama, bakambaka la limengo li likama ngene, la katikati ii iyuwe ibo ta wewe, bakaeta la lokelo liutchi li bieka bibo. ³ Lotosemowa mbo bakafaka kota liko bo bofoko wibo la koeta, kota lisangi libo angene wewe. ⁴ Baolengile'su la bofilili mbo tofe bo ndole eobatemana libo ta lisungi li losungo batanisomu. ⁵ Baikaesaka loka ikambaka lilendelu liso bakafaka felo iya Ngene la ambesu loka lo lisangi liya Mungu. ⁶ Ongoma esu to'olengila Tito mbo, eke ekaakola ye likuwa lie ta ngandi, asiliseke liamo aleko. ⁷ Kolaongoma ani etoetenu felo ta ndjaso itotina, ta liimelila tonango la liluwi la bofilili la losamo lino loka liso, tikakai mbo oetei felo ta likuwa lieke li ngandi. ⁸ Loitobeka kee bokoko lotokota losamo lino la ndole ee basiya, la wewe bo lilitesi lino. ⁹ Kolaongoma oluwii ngandi iya Ngene iso Yesu Kilisito, mbo ye lifoka akangala ibube loka lino mbo ombei bafoka loka lo ibube inde. ¹⁰ Ta lobeko lee lotofe'nu boimo wange. Kolaongoma lotolengila lino mbo osilisei leke loakoleke'nu okela la osama la yeme ta mwaka we bokaeta. ¹¹ Ongoma silisakai likuwa liamo loka liko li yamo limbe kee oenganii la bieka bimbe lino. ¹² Ongoma yomba mbo yeme imbe, lifaefi liaelomoko otutana la bieka bimbe la buto, ndjo inga bieka bie bieti linde. ¹³ Loibeki ongoma loka basiya baese enu olukanei bofi. ¹⁴ Ndjo loka lo loenganiso lobeko, lifoka lino li ene mbile litosunga ibube ibo mbo lifoka libo lisunge likosi lino, ongoma itoengana la weli. ¹⁵ kolaongoma losonomo mbo: Ono atolokota likama aitikali la leka, la ono atolokota itotoko aikosi. ¹⁶ Kelekele ambe Mungu ono akata bofono wamo la bofilili loka lino katikati ii botema boya Tito, ¹⁷ loka asi'imila lisomboli liso la atokenda ambenu ta lisangi linde engene la bofilili bolikama winde. ¹⁸ Eseke lomoi linde to'otoma kendisani ono ambe la lokuku katikati ii baasa batotina loka lo lonangolola linde mboli ilo, ¹⁹ yeiti lo loka lo lobeko lamo, la asiyaomo ta baasa loka lo lokuku loya Ngene la loka lo loeniso yeme iso ilo. ²⁰ Totobanga mbo buto aikpeseke'nu loka lo likuwa liso li okomanya ndjasoye ifi-ifi. ²¹ Loka tolangi okela yamo imbe ilo inga ango ko felo iya Ngene kanga baito aleko. ²² Eseke lomoi libo to'otoma nduku amoi iso ono tokapima ye la la tokaena ye la bofilili bo ndjaso ibule. Ndjo kani embe ye la bofilili bo oeta loka aluwi omoilale'nu. ²³ Loka loya Tito, ye ambe bosangani lange la bokelani lange loka lino. La loka lo banduku liso, bambe batomomu ta baasa, lokuku loya Ngene. ²⁴ Kola ongoma enisakai bo fololo losamo lino la oenganisei lokuku lino ambei, ambe bo la felo ii liasa.