¹ Ɛkasioshe'nu weke bofono bo lilakomu, basamomu, totanekei ta lilo litotina liboniyo la bolimo, la oenganisa bofono wiso bo liengani ta libangi liya Mungu. ² Feke'su eseke lomoi ta betema bino! Toikeli bobe ta buto ango amoi, toibebisi buto ango amoi, toiyonokili leka lo buto. ³ Yaiti loka lo lobekana yamo itobekei; loka lo'osila obeka mbo ombei ta betema biso ta liuwi la ta lingba. ⁴ Lombe la mbiso efi ambe'nu, lombe la lokuku loka lino, lowali fuuu la lilisasisomu, lo'owala la liomali aiteni ii bomusi wiso bototina. ⁵ Loka, kota likomi liso ta Mekedoniya, boniyo wiso boiti la lifeumi; tokaenisomoko bomusi ta bofono bototina: La lousa bitumba aiteni bewa. ⁶ Ngoko Mungu, ono ato'ongondja beke bakaotukowa, loka o'ongondjeke'su ta likomi liya Tito, ⁷ yeiti ango ta likomi linde, aleko ta liongondjomu lieke Tito engene aongondjomu loka lino: Akasemele'su yeme ino, bileli bino, bofilili wino ambei, litina mbo liomali liange likambaka lifi fafo. ⁸ Ango ani ekokisei enu betema wale la lokasa lange, loito'oka ngandi. La, imba mbolo'okalanganya, loka losiena mbo lokasa lamolo'okise'nu betema wale, ango ta mbile euwe, ⁹ lofo'omala ta ene mbile, yeiti ta yeke ikeokeke'nu betema wale, ngoko ta betema wale bino o'okomai ta liko loka oikatchangoi leka ango lomoi loka liso. ¹⁰ Ta yamo betema wale loka loya Mungu itoesa likalangani li liuwi li liuwi lieke liyatotomosa mbisa ale, alafu betema wale bo wenda botoesaka lingba. ¹¹ Tene, woko amboko botema wale loka loya Mungu, okambakai la yeme iokamanyomo, okaokakai lisomi, okabangakai, okambakai la yeme ifi, okambakai la liimeli lifi okalukakai ombei baito ba liengani fangi itotina okaenisakai mbo oilangii opka'se ta leke lobeko le'. ¹² Imba mbo lokasoneleke'nu, yeikamba loka loya lioi; ikambaka loka lo bofilili wino loka liso baenene aiteni ino felo iya Mungu. ¹³ Ta yamo to'osila osungomo la beimo. Alafu likolo li loimomo, tosiomala likama ta limengo liya Tito, lieke bolimo winde bo'osuluwa la haii ambe'nu batotina. ¹⁴ Imba mbo felo inde lo'ofomo lokuku loka lino, loika mbuyanaka; kongo, ani etbekeke'su lino kila lisiyo loka lo wewe, kota yamo to'ofomo lokuku ambe Tito asiotchomo omba aleko wewe. ¹⁵ Losamo linde lo'okomele'nu, eke eto enyela ye lilitesi lino ta batotina, litukumaneli lieke likakeleke'nu ye la bowa la lobilimo. ¹⁶ Losiomala ta mbeko itotina loka lo'tomoilele'nu kota liko.