¹ Ɛi, Paulo, lo'olengela lino, eiangene ta ndole ee lilatemi la losamo loya Kilisito, ei ono lombe bo'ongu felo ino kumbi lotoenisa la bofoka eke embei esika lino. ² Lo'olengila lino mbo eke etombei lino eseke lomoi, oifekeni lishoshila mbo lombe la bofoka boengana lange oenisa ambe basiya bee bakabekaka liso mbo totokenda otutana la yeme ii bindo. ³ Loka ango lo totokenda katikati ii bindo, bitumba biso bieti katikati ii bindo, ⁴ loka biale bi bitumba biso bieti bi bindo, kola ongoma imbe la bofoka boya Mungu loka lo'oseeisa biseke bikatchungomo la bofoka. ⁵ La biseke bisiya bitotina bie bitoemaela liluwi liya Mungu. Totoukoisa baenyeli batotina la kanga mbo balitise Ngene. ⁶ Tombe toyali ofa likutchi la itotina iotchango lilitesi eke ekaosile'nu lolitiso. ⁷ Moilakai ndjaso ye imbe felo ii baiso bino. Lamba oni buto ato'osela lokuku mbo ambe buto aya Ngene, abekeleke loka linde engene mbo kolaongoma ye ambe buto aya Ngene, esu tombe loko ongoma. ⁸ Ango lombe lotoeta mbo lo'osele lokuku loka lo botota wiso, we Ngene afeke'su loka lo'owangemise'su la inga loka loseise'nu, ango ongoma lombo'oka soni. ⁹ Ongoma loyengani oenena kembo loto'okise'nu soni la ndole ee lokasa. ¹⁰ Baobeka mbo kasa inde imbe la bolutu la bofoka, ndjo bofono bo bindo binde bombe la bolembu la libeki linde limbe bule la likokomele. ¹¹ Tikakai mbo baito ba bofono wamo, baluwe mbo eke'etoese'su, totomba la bakuwa kanda emoi eotutana la'ani etobeke'su ta kasa. ¹² Esu toisami obunga kee otutanisa la bamoi bee batoosela lokuku ambe bo angene. Kola ongoma eke emba bo otutanisa libo angene la otutanisa libo angene, bee batchagile weli. ¹³ La esu totosela lokuku loiti lo'etela ikpelo, totosela la efinole loka lotena ikenge ikatomo liso la Mungu loka toye ambe'nu. ¹⁴ Toitoeta bolelo wiso kee toikaya ko ambe'nu, loka tombaka baito ba felo eoya ambe'nu la mboli ilo iya Kilisito Yesu. ¹⁵ Yeiti lousa lo tokpelo tototina, yeiti aleko likuwa li buto osiya ono totosimola ye; kola lilendelu liso limbe mbo, ike itokonda, liimeli lino, esu to'ose eseke lo likama katikati ino, ango toitoeta ikenge iso. ¹⁶ Ongoma totoila mboli ilo ta chwese toiti enu, toitosela lokuku ta bakuwa bakakelomo katikati ii eseke lo buto asiya. ¹⁷ Kola ongoma tikaka mbo ono atosela lokuku aoseleke katokati iya Ngene. ¹⁸ Kola ongoma buto ono atosela lokuku engene ambobaelomoko, ndoena Ngene afa ye lokuku.