¹ Yamo yoko eke embesu la likuwa lieke kanda emoi ani ekashesu ngandi, toito tika aleko botema. ² Tosila ofeka mbeko yeisami la sooni, toilangi okela mbeko i weli bobe, ndo seisai Lioi lya Mungu. Ndjo ta ndole eonangola mbeko iwewe fololo,totopima koni olembela liluwi li buto la buto felo iya Mungu. ³ Yomba mbo Mboli Itanu iso itoufama, iufami ango loka lo beke batoseisama. ⁴ mungu a we wenda aotiamisa baiso la baenyeli bibo baofeka oimilia loka baiyenaka liangangi li Mboli Ilo la talaa eya Kilisito. Ono ambe bolendela boya Mungu. ⁵ Loka toitonangola imbu mbeko iso kanda ndjo Kilisito Yesu mbo ambe Ngene, Esu tombe bekowa bino loka loya Yesu. ⁶ Loka mbo Mungu abekaka mbo, tikaka lowa loangange ta wenda, ye oko akaosila owanganga katikati i betema biso loka lofesu liangangi la liluwi la talaa eya Mungu katikati i bombo boya Kilisito. ⁷ Tombe la leka lo litina ta ebengu leke lokakelomo la nele loka bofoka winde boitomoaka ambesu ndjo la Mungu. ⁸ Batoamesu biseke itotina ndjo imbe kongoma toitobuneya; batokelesu itoo, ndjo toimbo tika aleko lilendelu; ⁹ Batoenisesu wale, ndjo ye aitotikesu aleko; batokusesu ta nele ndjo toitoseisama. ¹⁰ Mbile etotina tototola lingba liya Yesu ta bindo biso loka mbo liwawi liya Yesu liyenene fololo ta bindo bibo. ¹¹ Eke ekombesu la liwawi, totokesomo ta lingba loka loya Yesu loka liwawi liya Yesu boenene fololo ta boniyo wiso we botongba. ¹² Kolaongoma, lingba liokela likuwa ambesu ndjo liwawi katikati ino. ¹³ Tombe la Bolimo ta limeli kolimoi, ani ikasila osonomo mbo, Loimilaka, koangoma lokabeka. Esu aleko totoimila la totobeka. ¹⁴ Toluwi mbo ono akafufukisa Ngene Yesu atofufukisesu aleko eseke lomoi la Yesu atoemalisesu felo inde lino aleko. ¹⁵ Loka itotina loka lino, kanda emoi ani embe ngbengbele ta baito likama likama, yeke itokela kelekele loka lo talaa eya Mungu. ¹⁶ Kolangoma toimbo tika aleko botema. Imbe ende ani ekende liso lomoi lo lousa lotolelama, ndjo ekende lo munga lotokikowaleka lyai lisiyo la lisiyo. ¹⁷ Loka mbo bomusi we boiti la bolunndu boumowe ango mbile ekikelike botokomwesu ta talaa ene etoumowa wewe. ¹⁸ Esu toitokpa ilo ta mbeko itoenena; ndjo kanga ta mbeko yeitoenena. Meko itoenena imbe ango loka lo ene mbile ndjo mbeko yeitoenena itoumowa wewe.