¹ Toluwi, mbo, imba mbo ene mbele engali'su ta nyele ebunomu, tombe ta lobola la esiya ene embe likuwa liya Mungu, mbele emoi ee layalaya ene eikelomu la boo bo buto. ² Ani etoisame'su ta ene mbele, tombe la yeme iosha bongaelo wiso talobola, ³ mbile etobate'su toimbaka lofona. ⁴ Loka mbile embe'su ta ene mbele, totisama, okandamana, loka tosami, yeiti loka lo ofoya tulu iso, ngoko obata isiya, lokaye iongba imilomu la liwaw. ⁵ La ono akakomye'su ta yamo, imbe Mungu ono akafesu botuku bo Bolimo. ⁶ Tombe amboko kila lisiyo la mbiso, la toluwi mbo oumowa ta le lokomba totokenda esika la Ngene. ⁷ Loka totokenda la liimeli tinga ta lieni, ⁸ towawi ko fuu la mbiso, la tolangi ango otika lokomba tongale ambe Ngene. ⁹ Loka lo yamo totokela bofoka loka lo o'omalisa ye, kembo tongale ta le lokomba, kembo totike lo. ¹⁰ Loka iyengani su batotina toenamane felo ii lisambisomu liya Ngene, loka buto bototina aoshe yeke iyengani linde kee bolo, kee bobe ta yeke ikakelaka ye, ta lokomba linde. ¹¹ Oluwa libangi liya Ngene, totoluka oimilisa baito; Mungu aluwi'esu, la loenyelo mbo ta baenyeli bino oluwi esu aleko. ¹² Toitobeka loka liso ale ambe'nu: Alafu to'ofenu fofe otaluwei loka liso, loka oenganei omutola ambe beke batotaluwa ta loeniso libo yeiti ta botema. ¹³ La ongoma, imba mbo lombe loseka: Imbe loka loya Mungu! imba mbo lombe la weli, imbe loka lino. ¹⁴ Loka losamo loya Ngene losiunde'su, loka toenyeli mbo imba mbo amoi ango aongba loka lo batotina, batotina aleko baongba; ¹⁵ la aongbela batotina loka beke bambe la liwawwi baiyuwaka ale loka libo angene, loka ono akangba la aka'fufuka loka libo. ¹⁶ Limo, kota kani toiluwi buto ango amoi ta boniyo; la imba mbo tokaluwaka Ngene ta boniyo, kani toiluwi ale ye ta weke bofono. ¹⁷ Imba mbo buto amoi ambe ambe Ngene, ambe bokelomubo kani. Ndjaso uu felo isiyeta. Tene, mbeko itotina iyomba iyaii. ¹⁸ La itotina ifowe ambe Mungu, ono akamiye'suambe ye la Ngene, la akafe'su likuwa li liokani. ¹⁹ Loka Mungu akambaka ambe Ngene, akakamiya yese engene, ndotangela baito babe bibo, la akata ambe'su lioi li liokani. ²⁰ Totokela bakuwa ba batomomu loka loya Ngene, kee Mungu atote'nu ta benoko biso; to'olengila lino ta lina liya Ngene: Okanakai la Mungu! ²¹ Ono aikaluwaka bobe, akaomisa ye bobe loka liso, loka esu tokome la liyokani la Mungu.