¹ Tosiakola obeka lisiya loka liso? Kembo tombe la yeme, kee baito bamoi, kasa iotomomo tina lino, kee yeke ikasonele'nu? ² Ɛnu ombei kasa iso, isonomu ta betema biso, iluwomu la itangomu la baito batotina. ³ Ombei fololo lokasa loya Ngene, losonomu, ta likuwa liso, yeiti la lino, ngoko la bolimo boya Mungu a liwawi, yaiti ta mesa ii batale, ngoko ko mesa ii boniyo, ta betema. ⁴ Lilendelu lio, tombe la lio la Ngene ambe Mungu. ⁵ Yeiti obeka mbo totomba esu angene la bofoka bo lo'osho leka kee lokafowa ambe'su angene. Bofoka wiso ta efinole bofowe ambe Mungu. ⁶ Aokomye'su tombe bakuwi ba liokani li kani, tinga li nyele, ngoko li Bolimo; loka lokasa koita, ngoko Bolimo kouwisa. ⁷ Imba mbo likuwa liokuwela lingba, lieke lisonomu la kasa ta batale, lie ta tala, ta bofono bo bana ba Isalaele bailongi omoila bombo boya Mose, loka lo tala ee bombo winde, ango ekambaka amo eosesela, ⁸ loka loingi likuwa liokuwela Bolimo lieti la tala! ⁹ imba mbo likuwa liokosa liimeli liomba ta tala, likuwa li liimeli limbe likama likolo li tala. ¹⁰ Ta likomi liamo, yeke ikambaka ta tala yeitomba ale loka lo tala ene embe likolo linde. ¹¹ Ta yamo imba mbo yeke ikaseselaka ikatomoko ta tala, yeke imbe kani imbe likama ta tala. ¹² Ani embe'su la lilendelu liamo, tombo bekaka fololo, ¹³ la toitokela kee Mose, ono ataka tulu felo ii bombo winde loka bana ba Isalaele baienaka tunga ee tala iosesela. ¹⁴ Ngoko liimeli libo liomba li bolelamu. Loka kota laboni tulu amo ekombe, etotanga bo lokasa lo liokani li felo baiemalaka loka ambe Ngene atoseselisa. ¹⁵ Kota laboni, baotanga Mose, tulu emoi etokusomo taa betema bibo; ¹⁶ imba mbo botema beokalanganya ambe Ngene, tulu etofowa. ¹⁷ Loka, Ngene ambe Bolimo: la oko embe Bolimo oya Ngene, onga embe liengani. ¹⁸ Ɛsu batotina beke, bembo bekaokikowa, totoenamana kee etitchelo tala eya Ngene, tookikoisomo ta bofono winde kota tala ebofono bosiya ene ekafowa ambe Ngene ee Bolimo.