¹ Kolaongoma, Kilisito aokaka bomusi ta bindo, enu aleko, mbakai aleko ta lienyeli liamo. Lokambo ono akaanya bomusi ta bindo aosilisana la bobe, ² mbo auwe inga ale la bakuwa kee buto, kolaongoma kee yema iya Mungu, tambile ene etikali mbo auwe ta bindo. ³ Bofelo bo mbile ekafoeta ekelaka bo bofono bo bapakano, okenda ta liseisomu la tchweme tobe, lilewi la lolo lo bieka, la lomwo, la befono bebe beoita baito. ⁴ Lisiya baka'anyo bo oitokenda libo ta likendi li belefe bo bakandongo we. ⁵ Kola ongoma batobeisa bakuwa bibo ta ono ambe tina osambisa ba liwawi. ⁶ Okaka mboli ilo ibekomoko ta bangbei, loka mbo mbisa iosambisomo kee baito ta lokomba, bakuwa otutana la Mungu ta bolimo. ⁷ Losilo lombeko itotina lombe tina. Mbaka la liluani la lilatemi ta basomboli. ⁸ Felo ii itotina, mbakai bamoi ta basiya losamo lolo, loka mbo losamo lotoufa likama li bebe. ⁹ Kelakai likuwa liotukumaela beenda bamoi ta basiya, ndoena loimo'imo. ¹⁰ Kee bameyanisi balo ba ngbengbele eya Mungu, la buto la buto ambe la likuwa li buto linde la lifaefi lie lika'anya ye. ¹¹ Yomba mbo buto amoi akaobeka, imbe kee boeki bo baenyeli baya Mungu; iomba mbo amoi akafoenganisa likuwa awaliseke la bofoka boya Mungu we bokabeka ye, loka mbeko utotina iutchomo la ndole eya Yesu Kilisito, ambe ye bofoka la toshosha to layalaya. Ko'ongoma! ¹² Bosamomu, oimbakai la limwali kee lobeko lomoi loyai le lokakelomowe la toimbe tombe aiteni ino bofelo bokote'nu. ¹³ Omalakai, ta bemusi be betoanye'nu bofelo boya Kilisito bofelo ambe aleko ta liomali, la ta banengina ta mbile etoenena ye ta talaa inde. ¹⁴ Iomba otomolomoi ta lina liya Kilisito, ombei la liomali, loka bolimo bo talaa, bolimo boya Mungu, botouwa aiteni ino. ¹⁵ Ango amoi ino, ailuwaka mbo bambe kee biba, kee bokeli bo bobe, kee ono atoeta la batongi ta mbeko ii buto linde. ¹⁶ Kola onoma iomba mbo amoi atouwa kee Mokilisito, aimbaka ale la soni, la aileke Mungu likolo loka lo lie lina. ¹⁷ Loka mbo imbe mbile ene etoakola lisambisomu ta esondjamelo loya Mungu. Iomba mbo, itomba ase isai ta beke baitolitisa mboli ilo iya Mungu? ¹⁸ La iomba mbo bee balo batouwa la tale, itomba ase isai ta bakeli ba bobe? ¹⁹ Kolaongoma beke batoanya bemusi ta ndole eya Mungu batikeke ambe ye bokeli bolo, la lokelo mbeko ilo.